Oshileshwa 14

Ookuume kaKalunga ohaya yanda shoka oshiwinayi

Satana oha makele aantu ya ninge iinima iiwinayi. Omuntu ngoka a hala okukala kuume kaKalunga oku na okutonda shoka Jehova e tonde. (Epsalmi 97:10) Mpaka opu na iinima yimwe mbyoka ookuume kaKalunga haya yanda:

Omayono ge na ko nasha nomilalo. “Ino hondela.” (Eksodus 20:14) Omilalo komeho gondjokana odha puka wo.—1 Aakorinto 6:18.

Uunkolwe. ‘Oonkolwi oyo kaa thigulula uukwaniilwa waKalunga.’—1 Aakorinto 6:10, yelekanitha KB.

Edhipago, eikutho lyela. “Ino dhipaga.”—Eksodus 20:13.

Uufuthi. “Ino yaka.”—Eksodus 20:15.

Okufundja. Jehova oku tonde “elaka lyiifundja.”—Omayeletumbulo 6:17.

Elongithonkondo nondjahi ihaayi pangelwa. “Ngoka e hole elongithonkondo [Jehova] ote mu tondo.” (Epsalmi 11:5, NW) ‘Miilonga yonyama [omwa kwatelwa] ondjahi.’—Aagalati 5:19, 20.

Endombolo. “Ongele pe na ngoka . . . omunalwiho . . . mwaa endathane naye.”—1 Aakorinto 5:11.

Uutondwe wopamihoko. “Holeni aatondi yeni, galikaneni aahepeki yeni.”—Mateus 5:43, 44.

Iinima mbyoka Kalunga he tu lombwele otayi tu etele uuwanawa. Kashi shi aluhe oshipu okuyanda okuninga iinima iiwinayi. Kekwatho lyaJehova nokekwatho lyOonzapo dhe, ngoye oto vulu okuyanda okuninga iinima mbyoka tayi yemateke Kalunga.—Jesaja 48:17; Aafilippi 4:13; Aaheberi 10:24, 25.