Oshileshwa 13

Ongiini To Vulu Okumona Elongelokalunga Lyashili?

Mbela omalongelokalunga agehe oga hokiwa kuKalunga, nenge limwe owala? (1)

Omolwashike ku na omalongelokalunga ogendji unene ngoka tagi iti ogopaKriste? (2)

Ongiini mbela to vulu okundhindhilika Aakriste yashili? (3-7)

1. Jesus okwa tameke elongelokalunga lyopaKriste limwe alike lyashili. Onkee ano nena oku na owala okukala olutu lumwe, nenge ongundu yimwe ayike, yaagalikani yashili yaJehova Kalunga. (Johannes 4:23, 24; Aaefeso 4:4, 5) Ombimbeli otayi longo kutya aantu owala aashona ye li mondjila ya thinana ndjoka tayi fala komwenyo.—Mateus 7:13, 14.

2. Ombimbeli oya hunganeke kutya konima yeso lyaayapostoli, omalongo ga puka niilonga yaa shi yopaKriste oya li tayi ke ya kashona nakashona megongalo lyopaKriste. Aalumentu otaya ka hila ooitaali ye ya landule pehala lyokulandula Kristus. (Mateus 7:15, 21-23; Iilonga 20:29, 30) Omolwaashono tu wete omalongelokalunga ogendji unene gi ili nogi ili ngoka tagi iti kutya ogopaKriste. Ongiini mbela tatu vulu okundhindhilika Aakriste yashili?

3. Endhindhiliko lya tongomana unene lyAakriste yashili olyo kutya yo oye na ohole yashili mokati kawo. (Johannes 13:34, 35) Yo ihaya longwa ya dhiladhile kutya yo aawanawa ye vule aantu yomomihoko dhilwe nenge yomalwaala galwe. Noihaya longwa okutonda aantu yokiilongo yilwe. (Iilonga 10:34, 35) Onkee ano yo ihaya kutha ombinga miita. Aakriste yashili ohaya kala nAakriste yashili ooyakwawo ye li naamwahe aalumentu naakiintu.—1 Johannes 4:20, 21.

4. Endhindhiliko lilwe lyelongelokalunga lyashili olyo kutya iilyo yalyo ohayi simaneke unene Ombimbeli. Yo oye yi taamba ko yi li Oohapu dhaKalunga noyi itaala shoka tayi popi. (Johannes 17:17; 2 Timoteus 3:16, 17) Oya tala ko Oohapu dhaKalunga dhi li dha simana unene dhi vule omadhiladhilo nenge omikalo dhopantu. (Mateus 15:1-3, 7-9) Ohayi kambadhala okukala metsokumwe nOmbimbeli monkalamwneyo yayo yakehe esiku. Onkee ano ihayi uvitha oshinima shontumba shaaha longwe omanga yo yene tayi shi longo.—Titus 1:15, 16.

5. Elongelokalunga lyashili oli na wo okusimaneka edhina lyaKalunga. (Mateus 6:9) Jesus okwa tseyithile yalwe edhina lyaKalunga, Jehova. Aakriste yashili oye na okuninga sha faathana. (Johannes 17:6, 26; Aaroma 10:13, 14) Aantu yeni mbela momudhingoloko gwoye haya lombwele yalwe kombinga yedhina lyaKalunga?

6. Aakriste yashili oye na okuuvitha kombinga yUukwaniilwa waKalunga. Jesus osho a ninga. Ye okwa li ha popi aluhe kombinga yUukwaniilwa. (Lukas 8:1, KB) Okwa lombwele aalongwa ye yu uvithe etumwalaka olyo tuu ndyoka kombanda yevi alihe. (Mateus 24:14, NW; 28:19, 20) Aakriste yashili oyi itaala kutya Uukwaniilwa waKalunga owo awike tau ke eta ombili negameno lyashili kombanda yevi ndika.—Epsalmi 146:3-5.

7. Aalongwa yaJesus oye na okukala yaahe shi oshitopolwa shuuyuni mbuka uuwinayi. (Johannes 17:16, NW) Yo ihayi itula miinima yuuyuni yopapolotika nomoompata dhopankalathano. Ohaya yanda eihumbato, iilonga niikala tayi eta oshiponga mbyoka yi li apuhe muuyuni. (Jakob 1:27; 4:4) Oto vulu mbela okundhindhilika ongundu yopalongelokalunga momudhingoloko gwopune ndjoka yi na omandhindhiliko ngaka gUukriste washili?

[Pictures on page 26, 27]

Aakriste yashili oye holathane, oya simaneka Ombimbeli, nohayu uvitha shi na ko nasha nUukwaniilwa waKalunga