Ilonga sha mOohapu dhaKalunga

Ongiini to vulu okundhindhilika mo elongelokalunga lyashili?

Moshitopolwa shika omu na omapulo ngoka tashi vulika wi ipula kombinga yago notashi ku ulukile mpoka to vulu okwaadha omayamukulo gago mOmbiimbeli yoye. Oonzapo dhaJehova otadhi ka kala dha nyanyukwa okukundathana nangoye omayamukulo ngaka.

1. Mbela oku na owala elongelokalunga limwe lyashili?

Jesus okwa longa aalanduli ye kombinga yelongelokalunga limwe owala, ndyoka lyashili. Olya fa ondjila ndyoka tayi fala komwenyo gwaaluhe. Jesus okwa li a popi shi na ko nasha nondjila ndjoka a ti: ‘Aashona yowala mboka taye yi mono.’ (Mateus 7:14) Kalunga oha taamba ko owala elongelokalunga ndyoka lya kankamena koshili yOohapu dhe. Aalongelikalunga ayehe yashili oya hangana meitaalo limwe.—Lesha Johannes 4:23, 24; 14:6; Aaefeso 4:4, 5.

2. Omolwashike omalongelokalunga ogendji ga yoolokathana hagi iti kutya ogopaKriste?

Uukwakriste owa pukithwa kaapolofeti aaniifundja nohaye wu longitha omolwuuwanawa wawo yene. Ngaashi Jesus a li e shi hunganeke ohayi imonikitha ye li ‘ongoonzi’ dhe, ihe ohayi ihumbata ya fa omambungu ga sa ondjala. (Mateus 7:13-15, 21, 23) Uukriste wiifundja owa li wa holoka unene tuu konima sho aayapostoli yaJesus ya si.—Lesha Iilonga 20:29, 30.

3. Omaukwatya gamwe geni taga yoolola ko elongelokalunga lyashili komalongelokalunga galwe?

Aalongelikalunga yashili oya tala ko Ombiimbeli yi li Oohapu dhaKalunga. Ohaya kambadhala okukala metsokumwe nomakotampango gayo. Onkee ano, elongelokalunga lyashili olya yooloka ko kwaandyoka lya kankamena komalongo gopantu. (Mateus 15:7-9) Aalongelikalunga yashili ohaya kala metsokumwe naashoka hayu uvitha.—Lesha Johannes 17:17; 2 Timoteus 3:16, 17.

Elongelokalunga lyashili olya simaneka edhina lyaKalunga, Jehova. Jesus okwa li a tseyithile aantu edhina lyaKalunga. Okwe ya kwathele ya tseye Kalunga noku ya longa ya kale haya galikana kutya edhina lye li yapulwe. (Mateus 6:9) Moshitopolwa sheni, elongelokalunga lini hali humitha komeho okulongithwa kwedhina lyaKalunga?—Lesha Johannes 17:26; Aaroma 10:13, 14.

4. Ongiini to vulu okundhindhilika mo aalongelikalunga yashili?

Aakriste yashili ohaya uvitha kombinga yUukwaniilwa waKalunga. Kalunga okwa li a tumu Jesus kombanda yevi e ye u uvithe kombinga yUukwaniilwa. Uukwaniilwa waKalunga owo owala tawu ke etela aantu epepelelo. Jesus okwa li a tsikile okupopya kombinga yawo sigo esiku lyokusa kwe. (Lukas 4:43; 8:1; 23:42, 43) Okwa li a lombwele aalanduli ye ya kale nokuuvitha kombinga yUukwaniilwa waKalunga. Ngele owa talelwa po komuntu ta popi kombinga yUukwaniilwa waKalunga, mbela omuntu ngoka otashi vulika a kale gwelongelokalunga lini?—Lesha Mateus 10:7; 24:14.

Aalanduli yaJesus kaye shi oshitopolwa shuuyuni mbuka wa kolokosha. Ihaya kutha ombinga miinima yopapolotika nenge momaipumomumwe gopankalathano. (Johannes 17:16) Niishewe, ihaya holele iikala niilonga ya nyata yuuyuni mbuka.—Lesha Jakob 1:27; 4:4.

5. Oshike shoka hashi ndhindhilikitha mo unene Aakriste yashili?

Aakriste yashili oye holathane nohole ya hwama. Oyi ilonga mOohapu dhaKalunga okusimaneka aantu yomomihoko adhihe. Nonando omalongelokalunga giifundja ohaga ambidhidha noonkondo iita yiigwana, aalongelikalunga yashili ihaya ningi ngaaka. (Mika 4:1-4) Kakele kaashono, iilyo yelongelokalunga lyashili ohayi longitha nehalo ewanawa ethimbo lyayo niiyemo yayo okukwathela nokutsa yalwe omukumo.—Lesha Johannes 13:34, 35; 1 Johannes 4:20, 21.

Elongelokalunga lini lya kankamekela omalongo galyo agehe kOohapu dhaKalunga, hali simaneke edhina lye nokuuvitha kutya Uukwaniilwa waKalunga owo owala tawu ke etela aantu ayehe epepelelo? Mbela elongelokalunga lini li na ohole noihali ambidhidha iita? Uunzapo otawu ulike kutya Oonzapo dhaJehova.—1 Johannes 3:10-12.

Opo wu mone uuyelele wa gwedhwa po, tala ontopolwa 15 yembo ndyoka lyu ulikwa mpaka Omalongo gashili gOmbiimbeli ogeni naanaa?, lya nyanyangidhwa kOonzapo dhaJehova.

[Ethano pepandja 16]

“Oyo otaa ti kutya oya tseya Kalunga, ihe iilonga yawo itayi shi holola.”—Titus 1:16