Oshileshwa 1

Kalunga ote ku hiya u ninge kuume ke

Kalunga okwa hala u kale kuume ke. Owa dhiladhila nale mbela kutya oto vulu okukala kuume kOmuntu omunenenene meshito alihe? Abraham, ngoka a li ko nale, okwa li i ithanwa kuume kaKalunga. (Jakob 2:23) Yalwe ya popiwa mOmbimbeli oya li wo ya nyanyukilwa uukuume naKalunga noya li ya lalekwa nuuyamba unene. Nena, aantu okuza miitopolwa ayihe yevi oya ninga ookuume kaKalunga. Ngoye wo oto vulu okukala kuume kaKalunga.

Okukala kuume kaKalunga oku vule okukala kuume komuntu kehe. Kalunga iha yemateke nando ookuume ke aadhiginini. (Epsalmi 18:26) Okukala kuume kaKalunga oku vule okukala u na omaliko. Uuna omuyamba ta si, iimaliwa ye ohayi ningi po yayalwe. Ihe mboka ye na uukuume naKalunga oye na eliko ndyoka kaapu na gulwe ta vulu oku li ya kutha.—Mateus 6:19.

Aantu yamwe otashi vulika ya kambadhale oku ku keelela wi ilonge kombinga yaKalunga. Nokuli yamwe yomookuume koye nenge yaandjeni otaya vulu oku shi ninga. (Mateus 10:36, 37) Ngele yalwe taye ku yolo nenge taye ku tilitha, ipula mwene: ‘Olye mbela nda hala okunyanyudha—aantu nenge oKalunga?’ Dhiladhila kombinga yaashika: Ngele gumwe te ku lombwele we ethe po okulya, oto ka vulika mbela kuye? Hasho nando! Owa pumbwa iikulya opo u kale nomwenyo. Ihe Kalunga oye ta vulu oku ku kaleka nomwenyo sigo aluhe! Onkee ano ino pitika nando ogumwe e ku keelele wi ilonge nkene to vulu okukala kuume kaKalunga.—Johannes 17:3.