OSHILESHWA 08

Oto vulu okuninga kuume kaJehova

Shono sha pilintwa

Jehova okwa hala wu mu tseye nawa. Onelalakano lyashike? Okwa hala shoka to ilongo kombinga yomaukwatya ge, omukalo moka ha ningi iinima nosho wo shoka e ku halela, shi ku inyengithe wu pange uukuume naye. Mbela oto vulu ngaa shili okuninga kuume kaJehova? (Lesha Episalomi 25:14.) Oshike to vulu okuninga, opo wu pange uukuume naye? Omayamukulo gomapulo ngoka otaga adhika mOmbiimbeli. Oya popya wo kutya omolwashike okupanga uukuume naJehova kwa simanenena.

1. Jehova ote ku pula wu ninge shike?

Ombiimbeli otayi ti: “Hedheni kuKalunga, ye nota hedha kune.” (Jakob 4:8) Mbela shika osha hala okutya shike? Jehova ote ku hiya wu ninge kuume ke. Aantu yamwe oyu uvite kutya oshidhigu okupanga uukuume naye, oshoka ihaye mu mono. Ihe Jehova okwe tu lombwela mOmbiimbeli ashihe shoka twa pumbwa okutseya kombinga ye, opo tu pange uukuume naye. Uuna tatu lesha etumwalaka ndyoka Jehova e tu nyolela mOmbiimbeli, uukuume wetu naye ohawu kolo, nonando ihatu mu mono.

2. Omolwashike Jehova e li Kuume dhingi ngoka to vulu okukala wu na?

Kapu na ngoka e ku hole e vule Jehova. Okwa hala wu kale wa nyanyukwa nowu mu pule ekwatho ethimbo kehe we li pumbwa. Oto vulu ‘oku mu tsika iimpwiyu yoye ayihe, oshoka oye omusilishimpwiyu gwoye.’ (1 Petrus 5:7) Jehova okwi ilongekidha aluhe okukwathela ookuume ke, oku ya hekeleka nokupulakena kuyo. — Lesha Episalomi 94:18, 19.

3. Jehova okwa tegelela ookuume ke ya ninge shike?

Jehova oku hole aantu ayehe, ihe “okwi inekela aayuuki,” nenge tu tye, oha panga uukuume wopothingo naayuuki. (Omayeletumbulo 3:32) Jehova okwa tegelela ookuume ke ya kambadhale okulonga uuwanawa noya yande okulonga uuwinayi. Aantu yamwe otashi vulika ya kale yu uvite kutya itaaya vulu okulonga uuwanawa mboka Jehova ta ti natu longe noitaya vulu okweetha po uuwinayi mboka ta ti natu yande. Ihe Jehova omunahenda. Oha taamba ko kehe ngoka e mu hole shili nota kambadhala okulonga shoka tashi mu nyanyudha. — Episalomi 147:11; Iilonga 10:34, 35.

ILONGA OSHINDJI

Ilonga oshindji kombinga yankene to vulu okuninga kuume kaJehova nosho wo kutya omolwashike oye Kuume dhingi ngoka to vulu okukala wu na.

4. Abraham okwa li kuume kaJehova

Ehokololo lyOmbiimbeli kombinga yaAbram, ngoka a tseyika nawa nedhina Abraham, otali tu kwathele tu mone kutya okukala kuume kaKalunga okwa kwatela mo shike. Lesha kombinga yaAbraham muGenesis 12:1-4. Opo nduno tamu kundathana omapulo taga landula:

Jehova okwa li a pula Abraham a ninge shike?
Jehova okwa li e mu uvanekele shike?
Abraham okwa li inyenge ngiini komalombwelo gaJehova?

5. Shoka Jehova a tegelela ookuume ke ya ninge

Opu na iinima mbyoka hatu kala twa tegelela ookuume ketu ya ninge.

Iinima yimwe yini ho kala wa hala ookuume koye ye ku ningile?

Lesha 1 Johannes 5:3, e tamu kundathana epulo tali landula:

Jehova okwa tegelela ookuume ke ya ninge shike?

Opo tu vulike kuJehova, otashi vulika twa pumbwa okulundulula eihumbato lyetu nenge iikala yetu. Lesha Jesaja 48:17, 18, e tamu kundathana epulo tali landula:

Omolwashike Jehova a hala ookuume ke ya ninge omalunduluko?

Omuniilonga ta pe mukwawo egala lyekoko. — Kuume ketu omwaanawa ohe tu lombwele tu ninge shoka tashi vulu oku tu gamena noku tu etela uuwanawa. Jehova naye osho ha ningile ookuume ke

6. Shoka Jehova ha ningile ookuume ke

Jehova oha kwathele ookuume ke yi idhidhimikile omaupyakadhi nenge ye ga kandule po. Dhana OKAVIDIO, e tamu kundathana epulo ndyoka tali landula.

OKAVIDIO: Jehova okwa ningila ndje oshindji (3:20)

Ongiini Jehova a kwathele omukiintu ngoka a popiwa mokavidio kaa kale we e na omadhiladhilo omawinayi, ye kaa kale we a lulilwa?

Lesha Jesaja 41:10, 13, e tamu kundathana omapulo taga landula:

Jehova oku uvanekela shike ookuume ke?
Ngele owa ningi kuume kaJehova, mbela owa panga ngaa uukuume nomuntu omwaanawa? Omolwashike to tile ngawo?

Omathano: Ookuume kopothingo taya kwathelathana. 1. Omulumentu ta humbatitha ko mukwawo koshitaafula oshinene. 2. Kahewa ta lombwele mukwawo omaiyuvo ge. 3. Omulumentu ta kwathele mukwawo ngoka e li kempango. — Ookuume koye kopothingo ohaye ku kwathele uuna wa pumbwa ekwatho. Jehova naye ote ke ku kwathela

7. Opo tu kale ookuume kaJehova, otu na okukala hatu popi naye nokupulakena kuye

Aantu ohaya kala ye na uukuume wa tsa kesipa ngele ohaya popi aluhe. Lesha Episalomi 86:6, 11, e tamu kundathana omapulo taga landula:

Ongiini tatu vulu okupopya naJehova?
Jehova oha popi natse ngiini?

Omathano: 1. Omukadhona ta galikana. Okakuti ke li kombanda yomutse gwe ku ulika pombanda. 2. Omukadhona ta lesha Ombiimbeli. Okakuti ke li kombanda yomutse gwe ku ulika pevi. — Ohatu popi naJehova okupitila megalikano; ye oha popi natse okupitila mOmbiimbeli

AANTU YAMWE OHAYA TI: “Itatu vulu okupanga uukuume naKalunga.”

Enyolo lini to ka longitha wu ulukile yalwe kutya otaya vulu okuninga ookuume kaJehova?

OWI ILONGO SHIKE?

Jehova okwa hala wu ninge kuume ke, note ke ku kwathela wu hedhe popepi naye.

Omapulo geendululo

Jehova oha kwathele ngiini ookuume ke?
Omolwashike Jehova a hala ookuume ke ya ninge omalunduluko?
Sho to dhiladhila, mbela oshidhigu okukala kuume kaJehova? Omolwashike to tile ngawo?

Oshileshwa owe shi mana momasiku:

Itulila po elalakano

Lombwela kuume koye shoka wi ilonga kombinga yaJehova.

Omalalakano galwe:

Your other goal

UUYELELE WA GWEDHWA PO

Okupanga uukuume naKalunga, otaku vulu ngiini okulundulula onkalamwenyo yoye?

“Jehova oKalunga dhingi ngoka twa pumbwa okutseya” (Oshungolangelo, 15 Febuluali 2003)

Ilonga nkene to vulu okupanga uukuume naKalunga.

“Ongiini tandi vulu okupanga uukuume naKalunga?” (Omapulo ngoka aagundjuka haya pula taga yamukulwa, Embo 2, ontopolwa 35)

Omolwashike omukiintu gumwe a ti kutya okupanga uukuume naKalunga okwa hupitha omwenyo gwe? Lesha oshitopolwa shika.

“Onda li nda tila okusa” (Oshungolangelo No. 1 2017)

Pulakena kwaashoka aagundjuka ya popya kombinga yankene haya kala yu uvitile Jehova.

Okukala kuume kaKalunga okwa kwatela mo shike? (1:46)