Oshileshwa 4
Nkene to vulu okwiilonga kombinga yaKalunga
Oto vulu okwiilonga kombinga yaJehova mokulesha Ombimbeli. Nalenale Kalunga okwa hogololele aantu yontumba ya nyole omadhiladhilo ge. Omanyolo ngoka ohagi ithanwa Ombimbeli. Nena otatu ilongo kombinga yaKalunga mokulesha Ombimbeli. Molwashoka mOmbimbeli omu na oohapu dhaJehova, nenge etumwalaka lye, oyi ithanwa wo Oohapu dhaKalunga. Otatu vulu okwiitaala shoka Ombimbeli tayi popi molwashoka Jehova iha fundju nando. ‘Kalunga iha fundju.’ (Aaheberi 6:18, OB-1986) Oohapu dhaKalunga odho oshili.—Johannes 17:17.
Ombimbeli oyo shimwe shomomagano gaKalunga ge na ongushu unene kutse. Oya fa ontumwafo ya za kutate omunahole a nyolela oyana. Otayi tu lombwele kombinga yeuvaneko lyaKalunga okulundululila evi mehala ewanawa lyokukala—sha hala okutya, oparadisa. Otayi tu lombwele shoka a ninga nale monakuziwa, shoka ta ningi ngashingeyi naashoka ta ka ningila oyana aadhiginini monakuyiwa. Otayi tu kwathele wo okukandula po omaupyakadhi getu nosho wo okumona elago.—2 Timoteus 3:16, 17.
Oonzapo dhaJehova odho ookuume kaKalunga; otadhi ke ku kwatha okuuva ko shoka Ombimbeli tayi longo. Dhi lombwela owala kutya owa hala okukonakona Ombimbeli. Ihadhi pula oshimaliwa mwaashika. (Mateus 10:8) Kakele kaashono, oto vulu okukala pokugongala kwopaKriste. Huka ohaku ningilwa momahala gokugalikanena Kalunga hagi ithanwa Iinyanga yUukwaniilwa. Ngele to kala pokugongala kwopaKriste, ontseyo yoye yokutseya Kalunga otayi ka koka neendelelo.
Oto vulu okwiilonga kombinga yaKalunga mokutala kiinima mbyoka a shiti. Pashiholelwa, Ombimbeli otayi ti: ‘Kalunga okwa shiti egulu nevi.’ (Genesis 1:1) Sho Jehova a shiti “egulu,” okwa shiti etango. Ano shika mbela otashi tu longo shike kombinga yaKalunga? Otashi tu lombwele kutya Jehova oku na oonkondo oonene. Oye awike ta vulu okuninga sha shi na oonkondo ngaashi etango. Otashi tu lombwele wo kutya Jehova omunawino, molwashoka otashi pula uunongo okushita etango, ndyoka hali tu pe uupyu nuuyelele noihali pi po nando.
Eshito lyaJehova ohali ulike kutya ye oku tu hole. Dhiladhila kombinga yomaludhi agehe gi ili nogi ili giiyimati ngoka ge li kombanda yevi. Jehova okwa li ta vulu oku tu pa owala oshiyimati sholudhi lumwe aluke—nenge kee tu pe sha nandonando. Pehala lyaashono, Jehova okwe tu pe omaludhi ogendji giiyimati ga yoolokathana unene momalupe, momaunene, momalwaala nomomulyo. Shika otashi ulike kutya Jehova oye Kalunga ngoka kee shi owala omunahole ihe oha gandja wo nehalo ewanawa noku na omadhiladhilo nomunambili.—Epsalmi 104:24.