Oshileshwa 6

Oparadisa oyi li popepi!

Iinima iiwinayi mbyoka tayi ningwa ngashingeyi kombanda yevi otayi ulike kutya Oparadisa oyi li popepi. Ombimbeli oya ti kutya otatu ka mona omathimbo omatilithi manga owala Oparadisa inaayi ya. Otu li ngashingeyi methimbo lya tya ngaaka. Mpaka opu na yimwe yomiinima mbyoka Ombimbeli ya popi tayi ka ningwa:

Iita iinene. “Iigwana otayi thikama okukondjithathana, niilongo otayi matukilathana.” (Mateus 24:7) Ehunganeko ndika olya gwanithwa. Okuza momumvo 1914, opwa li pu na iita iyali yuuyuni nosho wo iita yilwe iishona oyindji. Aantu omamiliyona oya sile muyo.

Omikithi dhi ihanena apuhe. Otapu ka kala ‘omalega golukayu komikunda nomikunda.’ (Lukas 21:11) Mbela shino osha gwanithwa? Eeno. Okankela, uuvu womutima, otiibii, omalaria, oAIDS nomikithi dhilwe odha dhipaga aantu omamiliyona.

Ompumbwe yiikulya. Kombanda yevi alihe oku na aantu kaaye na iikulya ya gwana yokulya. Aantu omamiliyona otaya si kondjala omvula kehe. Ndika olyo endhindhiliko lilwe kutya masiku Oparadisa otayi ya. Ombimbeli otayi ti: “Otaku ke ya oondjala.”—Markus 13:8, OB-1986.

Omakakamo gevi. ‘Otaku ya omakakamo gevi okiilongo niilongo.’ (Mateus 24:7) Shika osha gwanithwa wo methimbo lyetu. Aantu ye vulithe pemiliyona oya sile momakakamo gevi okuza mo 1914.

Aakolokoshi. Aantu otaya ka kala “aanalwiho yiimaliwa” ‘notaya ka kala nokwiihola.’ Otaya ka kala “aaholiihulo komeho gaKalunga.” Aanona otaya ka kala “ihaa vulika kaakuluntu.” (2 Timoteus 3:1-5, yelekanitha KB.) Ito shi zimine mbela kutya nena opu na aantu oyendji ya tya ngawo? Ihaya simaneke Kalunga nohaye etele uupyakadhi mboka taya kambadhala okwiilonga kombinga yaKalunga.

Omuyonena. Otapu ka kala wo ‘uulunde wa lunda pombanda.’ (Mateus 24:12, OB-1986) Otashi vulika to shi zimine kutya omuyonena ogwa kwata miiti shi vulithe moomvula dha piti. Aantu shaampono oye li moshiponga shokuyugwa, okukengelelwa, nenge okweehamekwa.

Iinima ayihe mbika otayi ulike kutya Uukwaniilwa waKalunga ou li popepi. Ombimbeli otayi ti: “Nge tamu mono mbino ya ningwa, tseyeni, [uukwaniilwa waKalunga ou li, KB] popepi.” (Lukas 21:31) Uukwaniilwa waKalunga owo shike? Owo epangelo lyaKalunga lyomegulu ndyoka tali ke eta Oparadisa kombanda yevi ndika. Uukwaniilwa waKalunga otau ka pingena po omapangelo gopantu.—Daniel 2:44, KB.