Oshileshwa 7
Elondodho okuza methimbo lyonale
Jehova ita ka pitika aantu aawinayi ya yonagule Oparadisa. Ookuume ke oyo owala taya ka kala mo. Oshike mbela tashi ka ningilwa aantu aawinayi? Okumona eyamukulo, konakona ehokololo lyoshili lyaNoa. Noa okwa li ko oomvula omayuvi dha piti. Okwa li omulumentu e li nawa ngoka a li ha kambadhala aluhe okulonga ehalo lyaJehova. Ihe aantu yalwe kombanda yevi oya li ya ningi iinima iiwinayi. Onkee ano Jehova okwa lombwele Noa kutya Ye ote ke eta eyelu li hanagule po aakolokoshi ayehe mboka. Okwa lombwele Noa a tunge onguluwato opo ye nuukwanegumbo we kaaya se sho Eyelu tali ya.—Genesis 6:9-18.
Noa nuukwanegumbo we oya tungu onguluwato. Noa okwa li a londodha aantu kutya Eyelu otali ya, ihe inaye mu pulakena. Oya tsikile okuninga iinima iiwinayi. Konima sho onguluwato ya pu, Noa okwa fala iinamwenyo monguluwato, nokwa yi mo wo pamwe nuukwanegumbo we. Opo nduno Jehova okwe eta oshikungulu oshinene. Omvula oya li ya loko uule womasiku 40 omutenya nuusiku. Omeya oga li ga yelula evi alihe.—Genesis 7:7-12.
Aakolokoshi oya si, ihe Noa nuukwanegumbo we oya hupu. Jehova okwe ya hupitha mEyelu nokwe ye eta kevi lya yogolwa uukolokoshi. (Genesis 7:22, 23) Ombimbeli otayi ti kutya otapu ya ishewe ethimbo sho Jehova ta ka hanagula po mboka taya tindi okulonga shoka shi li mondjila. Aantu aawanawa itaya ka hanagulwa po. Otaya ka kala nomwenyo sigo aluhe mEviparadisa.—2 Petrus 2:5, 6, 9.
Nena aantu oyendji ohaya ningi iinima iiwinayi. Uuyuni owu udha omaupyakadhi. Jehova ota tumu Oonzapo dhe ethimbo nethimbo dhi londodhe aantu, ihe oyendji inaya hala okupulakena oohapu dhaJehova. Inaya hala okulundulula omikalo dhawo. Inaya hala okutaamba ko shoka Kalunga ta popi kombinga yaashoka shi li mondjila naashono sha puka. Oshike mbela tashi ka ningilwa aantu mbaka? Sikulimwe mbela onaya ka lunduluke ngaa? Oyendji itaya ka lunduluka nando. Ethimbo otali ya sho aakolokoshi taya ka hanagulwa po noitaya ka kala po we nando.—Epsalmi 92:8.
Evi itali ka hanagulwa po; otali ka ningwa oparadisa. Mboka taya ningi ookuume kaKalunga otaya ka kala nomwenyo sigo aluhe mOparadisa kombanda yevi.—Epsalmi 37:29, OB-1986.