Ontopolwa 46

Mbela uuyuni mbuka nawo otawu ka hanagulwa po neyelu ngaashi wopethimbo lyaNoowa?

MBELA owu uva nale gumwe ta popi kombinga yehulilo lyuuyuni?— Eeno, kunena aantu oyendji ohaya popi kombinga yalyo. Aantu yamwe ohaya dhiladhila kutya uuyuni otawu ka hula po miita mbyoka aantu taya ka longitha oomboma dhopalute. Mbela oto dhiladhila kutya Kalunga ota ka hanagula po evi lyetu ewanawa nosho wo egulu lyetu li na oonyothi tadhi adhima?—

Ngaashi twe shi ilonga, Ombiimbeli oya popya kombinga yehulilo lyuuyuni ya ti: ‘Uuyuni otawu hulu po.’ (1 Johannes 2:17) Mbela oto dhiladhila kutya sho taku tiwa kutya uuyuni otawu hulu po, evi lyo lyene olyo tali ka hula po?— Aawe, Ombiimbeli otayi ti kutya Kalunga okwa shiti evi ‘li kalwe’ kaantu noya nyanyukilwe okukala kulyo. (Jesaja 45:18) Episalomi 37:29 otali ti: “Aayuuki otaa ka thigulula evi e taa kala mo sigo aluhe.” Molwetompelo ndika, Ombiimbeli oya ti wo kutya evi otali kala sigo aluhe.—Episalomi 104:5; Omuuvithi 1:4.

Ano ngele ehulilo lyuuyuni itashi ti kutya ehulilo lyevi, oshike ano tashi ka hula po?— Otatu ka mona kutya oshike ngele otwa konakona nuukeka kombinga yaashoka sha li sha ningwa po pethimbo lyaNoowa. Ombiimbeli otayi yelitha tayi ti: ‘Uuyuni wopethimbo ndyoka owa hanagulwa po komeya geyelu.’—2 Petrus 3:6.

Mbela opu na mboka ya li ya hupu pethimbo lyEyelu enene ndyoka lya li ko pethimbo lyaNoowa?— Ombiimbeli oya ti kutya Kalunga okwa li a ‘hupitha Noowa, omuuvithi gwuuyuuki pamwe nooyakwawo yaheyali.’—2 Petrus 2:5.

Ano uuyuni mboka wa li wa hulu po oshike? Mbela evi olyo lya li lya hulu po nenge aakolokoshi?— Ombiimbeli otayi ti kutya ‘uuyuni waakeenakonasha naKalunga.’ Ndhindhilika kutya Noowa okwa li hi ithanwa “omuuvithi.” Mbela oto dhiladhila kutya okwa li hu uvitha kombinga yashike?— Okwa li ha londodha aantu kombinga yehulilo ‘lyuuyuni wopethimbo ndyoka.’

Sho Jesus a popi kombinga yEyelu enene, okwa li a lombwele aalongwa ye kombinga yaashoka aantu ya li ya kala nokulonga omanga ehulilo inaali ya. Okwa li e ya lombwele a ti: ‘Aantu yopethimbo ndiyaka lya tetekele eyelu, oya kala taa li notaa nu, taa hokana notaa hokanitha, sigo esiku ndyoka Noowa a yi monguluwato, yo inaye shi tseya, sigo eyelu lye ya nolye ya hanagula po ayehe.’ Opo nduno Jesus okwa popi kutya aantu otaya ka kala nokuninga ngaaka manga uuyuni mbuka inaawu hanagulwa po.—Mateus 24:37-39.

Oohapu dhaJesus otadhi tu ulukile kutya otatu vulu okwiilonga iinima ya simana mwaashoka aantu ya li haya ningi manga Eyelu inaali ya. Sho wa lesha mOntopolwa 10 yembo ndika, mbela oto dhimbulukwa shoka aantu mboka ya li haya ningi?— Aantu yamwe oya li haya longitha oonkondo nokulonga omiyonena. Ihe Jesus okwa ti kutya yalwe oyendji kaya li haya pulakene kuNoowa ngoka a li a tumwa kuKalunga opo e yu uvithile.

Esiku limwe Jehova okwa li a lombwele Noowa kutya ota ka hanagula po aantu aakolokoshi neyelu. Omeya oga li taga ka siikila evi alihe nokuli noondundu. Jehova okwa li a lombwele Noowa a tunge onguluwato onene. Onguluwato ndjoka oya li ya fa oshiketha oshile noshinene, ngaashi wu yi wete ngele owa tala pethano li li pepandja 238.

Kalunga okwa lombwele Noowa a tunge onguluwato onene moka ta ka kala pamwe nuukwanegumbo we niinamwenyo oyindji ye li megameno. Noowa nuukwanegumbo we oya li ya longo nuudhiginini. Oya li ya tete omiti ominene noye dhi longitha mokutunga onguluwato. Shika osha li she ya pula oomvula odhindji molwaashoka onguluwato oya li onenenene.

Mbela oto dhimbulukwa kutya Noowa okwa li wo ha ningi shike pethimbo lyoomvula adhihe ndhoka sho a li ta tungu onguluwato?— Okwa li hu uvitha nokulondodha aantu kombinga yokuya kwEyelu. Mbela aantu oya li ngaa ya pulakene kuye? Kapwa li gumwe a li a pulakene, kakele kuukwanegumbo waNoowa. Aantu yalwe oya li owala yi ipyakidhila niinima yilwe. Mbela oto dhimbulukwa kutya Jesus okwa ti kutya oya li yi ipyakidhila nashike?— Oya li yi ipyakidhila owala nokulya nokunwa nosho wo okuhokana. Kaya li taya dhiladhila kutya yo aawinayi nokaya li ye na ethimbo lyokupulakena kuNoowa. Natu tale kutya oshike sha li she ya ningilwa.

Sho Noowa nuukwanegumbo we ya yi meni lyonguluwato, Jehova okwe edhile omweelo. Aantu mboka ya li pondje yonguluwato kaya li ye shi itaala kutya Eyelu otali ya. Ihe ombaadhilila, omvula oya li ya tameke okuloka, nokaya li tayi loko ngaashi hayi loko kunena. Oya li omvula yepoola nokonima owala yokathimbo okafupi omeya oga li gi indjipala ga fa omulonga omunene noga li taga popoma muule. Omeya oga li ga gwitha po omiti ominene, noga galangatitha po omamanya omanene ngoka ga li taga monika owala ga fa omawe omashona. Mbela oshike sha ningilwa aantu mboka ya li pondje yonguluwato?— Jesus okwa ti: ‘Eyelu olye ya nolye ya hanagula po ayehe.’ Aantu ayehe mboka ya li pondje yonguluwato oya si. Omolwashike?— Ngaashi Jesus e shi popi, omolwaashoka oya li ‘inaaye shi tseya.’ Kaya li ya pulakene.—Mateus 24:39; Genesis 6:5-7.

Ngashingeyi dhimbulukwa kutya Jesus okwa li a popi kutya shoka sha ningilwa aantu mboka oshi li elondodho kutse kunena. Oshiilongomwa shini tatu vulu okwiilonga mwaashika?— Aantu pethimbo mpoka kaya li owala ya hanagulwa po molwaashoka ya li aakolokoshi, ihe omolwaashoka oyendji yomuyo oya li owala yi ipyakidhila unene nokaya li ye na ethimbo lyokwiilonga kombinga yaKalunga nosho wo shoka a li ta ka ninga. Otwa pumbwa okukala twa kotoka opo kaatu kale twe ya fa, hasho mbela?—

Mbela oto dhiladhila kutya Kalunga ota ka hanagula po ishewe uuyuni neyelu?— Aawe, Jehova Kalunga oku uvaneka kutya ita ka hanagula po we uuyuni neyelu. Okwa ti: “Otandi tula uutamvula miikogo, notau ningi endhindhiliko lyehangano lyandje nevi.” Jehova okwa ti kutya uutamvula otawu ka kala endhindhiliko “kutya eyelu itali ka hanagula po we iinamwenyo ayihe.”—Genesis 9:11-17.

Onkee ano, otatu vulu okukala tu na uushili kutya Kalunga ita ka hanagula po we uuyuni neyelu. Natango, ngaashi twe shi mona, Ombiimbeli oya popya kombinga yehulilo lyuuyuni. Sho Kalunga ta ka hanagula po uuyuni mbuka, mbela oolye ta ka hupitha?— Mbela aantu mboka yi itula owala miinima yilwe nokaya li ya hala nando okwiilonga kombinga yaKalunga? Mbela aantu mboka ya li owala yi ipyakidhila aluhe nokukonakona Ombiimbeli? Mbela ngoye oto dhiladhila shike?—

Otwa hala okukala mokati kaamboka Kalunga ta ka kaleka nomwenyo, hasho mbela?— Mbela itashi ka kala shi li nawa noonkondo ngele uukwanegumbo wetu owa kala wa fa wa Noowa opo Kalunga e ke tu hupithe atuhe?— Ihe opo tu vule okuhupa pehulilo lyuuyuni, otu na okuuva ko kutya ongiini Kalunga ta ka hanagula po uuyuni nokudhika po uuyuni we uupe wombili. Natu tale kutya ote ke shi ninga ngiini.

Ombiimbeli otayi tu pe eyamukulo muDaniel ontopolwa 2, ovelise 44. Enyolo ndika otali popi kombinga yethimbo lyetu tali ti: “Pomasiku gaakwaniilwa mbeyaka Kalunga nguka komegulu ota ka dhika uukwaniilwa [nenge epangelo] itaawu ka teka po sigo aluhe nepangelo lyawo itali ka gandjwa koshigwana shilwe. Ihe owo otawu ka nyanyagula notawu ka teyagula omaukwaniilwa agehe noku ga hulitha po, ihe wo wene otawu ka kala sigo aluhe.”

Mbela Enyolo ndika owe li uva ko?— Ombiimbeli otayi ti kutya epangelo lyaKalunga otali ka hanagula po omapangelo agehe gopantu. Omolwashike?— Omolwaashoka omapangelo gopantu ihaga vulika kwaangoka a tulwa po kuKalunga e li Omukwaniilwa. Ngoka a tulwa po olye?—Eeno, oJesus Kristus.

Jehova Kalunga oku na uuthemba wokutokola kutya epangelo lini li na okupangela, nokwa hogolola Omwana, Jesus, a kale Omukwaniilwa. Masiku Omupangeli ngoka Kalunga a hogolola, Jesus Kristus, ota ka kwatela komeho mokuhanagula po omapangelo agehe gomuuyuni mbuka. Ombiimbeli oye mu hokolola kutya osho ta ka ninga ngawo mEhololo ontopolwa 19, ovelise 11 sigo 16, ngaashi tashi ulikwa nokuli methano muka. MOmbiimbeli, iita yaKalunga mbyoka tayi ka hanagula po omapangelo agehe muuyuni ohayi ithanwa Armagedon.

Kalunga okwa ti kutya uukwaniilwa we otawu ka hanagula po omapangelo gopantu. Ihe mbela okwe tu lombwela tu hanagule po omapangelo?— Aawe, ine tu lombwela, mOmbiimbeli, Armagedon ohashi ithanwa “iita mesiku enene lyaKalunga Omunankondoadhihe.” (Ehololo 16:14, 16) Eeno, Armagedon iita yaKalunga, na Kalunga ota ka longitha Jesus Kristus a kwatele komeho omatangakwiita gomegulu miita moka. Mbela iita yaArmagedon oyi li popepi? Natu tale kutya otatu shi mono ngiini.

Natu leshe pamwe kutya uunake Kalunga ta ka hanagula po aakolokoshi nokuhupitha mboka haye mu longele mOmayeletumbulo 2:21, 22; Jesaja 26:20, 21; Jeremia 25:31-33 nosho wo Mateus 24:21, 22.

[Ethano pepandja 238]

Uuyuni mboka wa li wa hanagulwa po pethimbo lyaNoowa oshike?

[Ethano pepandja 241]

Mbela omolwashike kaatu na owala okukala twa pwila momainyanyudho?

[Ethano pepandja 243]

Omukwaniilwa ngoka a hogololwa kuKalunga, Jesus Kristus ota ka hanagula po uuyuni mbuka puArmagedon