Oshileshwa 11
Ekelahi elongelokalunga lyiifundja!
Satana noompwidhuli dhe inaya hala u longele Kalunga. Yo oya hala okupilamenitha kehe gumwe Kalunga ngaashi taya vulu. Mbela ohaya kambadhala ngiini oku shi ninga? Omukalo gumwe ogwo okupitila melongelokalunga lyiifundja. (2 Aakorinto 11:13-15) Elongelokalunga olyiifundja ngele itali longo oshili okuza mOmbimbeli. Elongelokalunga lyiifundja olya fa iimaliwa yiifundja—otali vulu okumonika lya fa oshinima shoshili, ihe kali na ongushu. Otali vulu oku ku etela uupyakadhi oundji.
Iifundja yopalongelokalunga itayi vulu nando okunyanyudha Jehova, Kalunga koshili. Sho Jesus a li kombanda yevi, opwa li ongundu yopalongelokalunga ndjoka ya li ya hala oku mu dhipaga. Oya li ya dhiladhila kutya omukalo gwawo gwokulongela Kalunga ogwo gu li mondjila. Oya ti: “Otu na tate gumwe, oKalunga.” Jesus okwa li e shi zimina mbela? Aawe! Okwe ya lombwele: “One mu na ho yeni, ondiaboli.” (Johannes 8:41, 44) Nena aantu oyendji otaya dhiladhila kutya otaya longele Kalunga, ihe muushili wo wene otaya longele Satana noompwidhuli dhe!—1 Aakorinto 10:20.
Ngaashi naanaa omuti omwiinayi hagu imi iiyimati iiwinayi, osho elongelokalunga lyiifundja hali ningi aantu yamo ya kale taya ningi iinima iiwinayi. Uuyuni owu udha omaupyakadhi molwiinima iiwinayi mbyoka aantu haya ningi. Opu na onyata yiipala, okukondja, okuyaka, ethininiko, edhipago nekwatonkonga. Oyendji mboka haya ningi iinima mbika iiwinayi oye li melongelokalunga, ihe elongelokalunga lyawo ihali yi inyengitha ya longe shoka oshiwanawa. Itaya vulu okukala ookuume kaKalunga ngele itaye etha po okuninga iinima iiwinayi.—Mateus 7:17, 18.
Elongelokalunga lyiifundja ohali longo aantu ya galikane iihongwathano. Kalunga ota ti inatu galikana iihongwathano. Shika oshi li shopandunge. Ou shi hole mbela ngele gumwe iha popi nando nangoye ihe oha popi owala nethano lyoye? Omuntu a tya ngaaka mbela ota vulu okukala kuume koye kashili? Aawe, ita vulu. Jehova okwa hala aantu ya popye naye, hanoshiyelekelathano nenge ethano, ndyoka kaali na omwenyo.—Eksodus 20:4, 5.
Elongelokalunga lyiifundja ohali longo kutya oshi li mondjila okudhipaga yalwe pethimbo lyiita. Jesus okwa ti kutya ookuume kaKalunga otaya ka kala ye holathane. Tse ihatu dhipaga aantu tu ya hole. (Johannes 13:35) Osha puka kutse okudhipaga nokuli nando oyo aantu aawinayi. Sho aatondi yaJesus ye ya oku mu kwata, ine etha aalongwa ye ya kondje oku mu gamena.—Mateus 26:51, 52.
Elongelokalunga lyiifundja ohali longo kutya aakolokoshi otaya ka hepekwa momulilo gwoheli. Ihe Ombimbeli otayi longo kutya uulunde otau fala meso. (Aaroma 6:23) Jehova oye Kalunga kohole. Otashi vulika mbela Kalunga omunahole a hepeke aantu sigo aluhe? Hasho nando! MOparadisa, otamu ka kala owala elongelokalunga limwe alike, limwe alike ndyoka Jehova a hokwa. (Ehololo 15:4) Omalongelokalunga agehe ngoka ga kankamena kiifundja yaSatana otaga ka kala kaage po we.