Onkundana yUukwaniilwa Onomola 37

Etumwalaka Lyuuyuni Auhe

Ehulilo Lyomalongelokalunga Giifundja Oli Li Popepi!

▪ Omalongelokalunga giifundja oshike?

▪ Otaga ka hula po ngiini?

▪ Okuhula po kwago otaku ke ku guma ngiini?

Omalongelokalunga giifundja oshike?

Mbela owa yematekwa komiyonena tadhi ningwa medhina lyomalongelokalunga? Mbela iita, uukulo nuulingilingi mbyoka hayi ningwa kwaamboka taya ti kutya ohaya longele Kalunga ohayi ku uvitha nayi molwaashoka u wete kutya kapu na uuyuuki? Omolwashike omalongelokalunga taga monika ga fa ogo hage etitha omaupyakadhi agehe ngoka? Epuko kali li momalongelokalunga agehe, ihe oli li mwaangoka giifundja. Jesus Kristus, ngoka a simanekwa apuhe, oku ulike kutya omalongelokalunga giifundja ohaga longitha aantu iilonga iiwinayi, ngaashi naanaa ‘omuti omwiinayi hagu imi iiyimati iiwinayi.’ (Mateus 7:15-17) Iiyimati yini omalongelokalunga giifundja hagi imike?

Omalongelokalunga giifundja . . .

◼ OHAGA KUTHA OMBINGA MIITA NOMOOPOLOTIKA: Oshifokundaneki Asiaweek otashi ti: “MuAsia nosho wo momahala galwe aawiliki mboka taya lalakanene okugwedha ko koonkondopangelo dhawo ohaa nwetha mo nomakoto omadhiladhilo gaantu ge na ko nasha nomalongelokalunga omolwuuwanawa wawo yene.” Oshilanduliko, oshifokundaneki shoka otashi londodha tashi ti: “Uuyuni ou li pokupwila mo mevundakano.” Omukwatelikomeho gwelongelokalunga a simanekwa mIilongohangano okwa ti: “Iikulo oyi na okudhipagwa po opo kaayi kale we tayi dhipaga aantu.” Pataloko lye, oshike tashi kandula po uupyakadhi mboka? Okwa ti: “Nayi kombwe po thiluthilu medhina lyOmuwa.” Mekondjithathano naashono, Ombiimbeli otayi ti: “Ngele pe na ngoka ta ti kutya oku hole Kalunga, ihe oku tonde natango mukwawo, oye omufundja.” (1 Johannes 4:20) Jesus okwa ti nokuli: “Holeni aatondi yeni.” (Mateus 5:44) Mbela omalongelokalunga gangapi u shi ngoka iilyo yago ya kutha ombinga miinima yopapolotika nosho wo miita?

◼ OHAGA TAANDELEKE OMALONGO GIIFUNDJA: Omalongelokalunga ogendji ohaga longo aantu kutya omwenyo nenge ombepo oyo oshitopolwa shontumba shomuntu ihaashi monika shoka hashi hupu po ngele olutu lwa si. Okupitila melongo ndika, aakwatelikomeho yomalongelokalunga ogendji ngaka ohaya nyokoma iilyo yawo moku yi pula iimaliwa opo ya galikanene oomwenyo ndhoka dha za po. Ihe Ombiimbeli otayi longo aantu elongo lyi ili. “Omwenyo nguka tagu yono—ogwo gu na okusa.” (Hesekiel 18:4, OB-1954) “Aanamwenyo otaa tseya kutya oye na okusa, ihe aasi itaa tseya sha nando.” (Omuuvithi 9:5) Jesus okwa longo aantu kutya aasi otaa ka yumuka, oshinima shoka inaashi pumbiwa ando aantu oya li ye na omwenyo ihaagu si. (Johannes 11:11-25) Mbela elongelokalunga lyoye ohali longo aantu kutya omwenyo ihagu si?

◼ OHAGI IPWILILIKILE OMILALO DHA NYATA: Miilongo yokUuninginino, oongeleka ohadhi yapula iilyo yadho mbyoka yi li omashenge omalumentu nomakiintu yi ninge aakwatelikomeho yopambepo, tadhi ladhipike omapangelo ga zimine oondjokana dhaantu yuukashike kookantu umwe auke. Nokuli noongeleka ndhoka dha pangula oluhondelo odhi idhidhimikile aakwatelikomeho yadho mboka haa hepeke aanona pamilalo. Ihe Ombiimbeli otayi ti ngiini? Otayi popi sha yela tayi ti: “Inamu ipukitha. Aantu mboka aaholume, aasimaneki yiimenka, aahondeli, omashenge naakali nomashenge [itaa] ka ya mOshilongo shaKalunga.” (1 Aakorinto 6:9, 10) Mbela owa tseya omalongelokalunga ngoka hagi ipwililikile omilalo dha nyata?

Mbela onakuyiwa yomalongelokalunga ngoka hagi imike iiyimati iiwinayi otayi ka kala ngiini? Jesus okwa londodha aantu a ti: “Kehe omuti itaagu imi iiyimati iiwanawa, otagu kewa po e tagu umbilwa momulilo.” (Mateus 7:19) Eeno, omalongelokalunga giifundja otaga ka kewa po e taga hanagulwa po! Ihe ongiini nuunake shoka tashi ka ningwa? Emoniko lyopahunganeko lya nyolwa membo lyOmbiimbeli lyEhololo montopolwa onti-17 nonti-18 otali gandja eyamukulo.

Omalongelokalunga giifundja otaga ka hula po ngiini?

Dhiladhila kwaashika: Ohonda ya londa koshilikama oshitilithi. Oshilikama oshi na omitse heyali nooniga omulongo. (Ehololo 17:1-4) Ohonda otayi thaneke shike? Ombiimbeli otayi tu kwathele tu mone kutya ohonda ndjika oyo ehangano lyopalongelokalunga lyomuuyuni auhe, molwaashoka otayi hokololwa kutya oya nwetha mo “aakwaniilwa yokombanda yevi,” oya zala oonguwo oontiligane, ohayi fike omatsinino noyi li omuyamba elela. Kakele kaashono, okupitila muumpulile wayo, ‘iigwana ayihe oya hongololwa.’ (Ehololo 17:18; 18:12, 13, 23) Onkee ano, itayi thaneke elongelokalunga limwe alike, ihe omalongelokalunga agehe ngoka hagi imike iiyimati iiwinayi.

Oshilikama hoka kwa londa ohonda otashi thaneke aapangeli yuuyuni yopapolotika.a (Ehololo 17:10-13) Omalongelokalunga giifundja oga londa koshilikama shika shopapolotika, taga kambadhala okunwetha mo omatokolo gasho notage shi lombwele hoka shi na okuuka.

Ihe masiku otapu ka ningwa oshiningwanima oshikumithi. “Ooniga omulongo we dhi mono, nosho wo oshilikama, otayi ka tonda ohonda ndjoka. Oyo otaa ke yi hula ashihe shoka yi shi na notaye ke yi thiga yi li olutu lwowala. Oyo otaa ka lya po onyama yayo notaa ke yi lungunitha po nomulilo.” (Ehololo 17:16) Nziya otapu ka ningwa sha oshitilithi, sho omapangelo gopapolotika guuyuni taga ka pilukila omalongelokalunga giifundja noku ga hanagula po thiluthilu. Mbela omolwashike tashi ka ningilwa? Embo lyOmbiimbeli lyEhololo otali yamukula tali ti: ‘Kalunga okwa pendutha moomwenyo dhawo ehalo lye.’ (Ehololo 17:17) Eeno, Kalunga ombedhi ote ke yi pa omalongelokalunga giifundja omolwiilonga iinyanyalithi mbyoka ga longa medhina lye. Ota ka katuka onkatu pauyuuki mokulongitha ookuume kago kopapolotika oku ga hanagula po.

Oshike u na okuninga ngele ino hala okuhanagulwa po pamwe nomalongelokalunga giifundja? Omutumwa gwaKalunga ote tu ladhipike ta ti: “Zii mo mokati kawo, one aantu yandje!” (Ehololo 18:4) Ngashingeyi olyo lela ethimbo okuza momalongelokalunga giifundja. Ihe mbela otashi ti kutya katu na okwiitaala we muKalunga? Aawe, molwaashoka ngoka ini itaala muKalunga ke na onakuyiwa yasha. (2 Aatessalonika 1:6-9) Elongelokalunga lyashili olyo awike ehala lyegameno. Ongiini to vulu okudhimbulula elongelokalunga lyashili?

Nkene elongelokalunga lyashili tali vulu okudhimbululwa

Iiyimati iiwanawa yini elongelokalunga lyashili li na okwiimika?—Mateus 7:17.

Elongelokalunga lyashili . . . 

◼ OLI NA OHOLE: Aalongelikalunga yashili “kaye shi yomuuyuni,” inaa topolwa komihoko nenge komaputuko, ihe oye “holathane.” (Johannes 13:35; 17:16; Iilonga 10:34, 35) Pehala lyokudhipagathana, yo oye na ehalo okusilathana.—1 Johannes 3:16.

◼ OLYI INEKELA OOHAPU DHAKALUNGA: Pehala lyokulonga aantu ‘omithigululwakalo nomalongo giipango yaantu,’ elongelokalunga lyashili olya kankamekela omalongo galyo kOohapu dhaKalunga, Ombiimbeli. (Mateus 15:6-9) Omolwashike? Omolwaashoka “enyolo kehe olya nyolithwa kOmbepo yaKalunga noli na oshilonga shokulonga oshili, okukumagidha, okupukulula nokuulikila omuntu ondjila yu uka.”—2 Timoteus 3:16.

◼ OHALI KOLEKE OMAUKWANEGUMBO NOHALI DHIGININE OMITHIKAMPANGO DHOPAMIKALO DHA DHENGA MBANDA: Elongelokalunga lyashili ohali dheula aasamane ya kale ye ‘hole aakiintu yawo, naanaa ngashika ye hole omalutu gawo yene,’ ohali kwathele aakiintu ya kale haya ‘simaneke aalumentu yawo’ nohali longo aanona ya kale haya ‘vulika kaakuluntu yawo.’ (Aaefeso 5:28, 33; 6:1) Kakele kaashono, mboka yi inekelelwa iinakugwanithwa yokutonatela megongalo, oye na okukala nomikalo dhi shi okuholelwa.—1 Timoteus 3:1-10.

Mbela opu na ngaa elongelokalunga ndyoka hali gwanitha po omithikampango ndhino? Embo Holocaust Politics, lya nyanyangidhwa mo 2001, otali ti: “Ando aantu oyendji oya tulile miilonga shoka Oonzapo dhaJehova hadhi uvitha naashoka hadhi ningi, ando Edhipago Enene lyAanazi olya keelelwa nomuuyuni ando kamu na we omadhipago gopamihoko.”

Oonzapo dhaJehova miilongo 235 ihadhi uvitha owala omithikampango dhOmbiimbeli dhopamikalo, ihe ohadhi kala wo padho. Otatu ku ladhipike u pule Oonzapo dhaJehova dhi ku kwathele wi ilonge shoka Kalunga ta pula kungoye opo u vule oku mu longela pamukalo ngoka e hole. Ngashingeyi olyo ethimbo okukatuka onkatu. Ino kakadhala. Ehulilo lyomalongelokalunga giifundja oli li popepi!—Sefanja 2:2, 3.

Ngele owa hala okumona uuyelele oundji u na ko nasha netumwalaka lya kankamena kOmbiimbeli ndyoka hali uvithwa kOonzapo dhaJehova, nyolela kondjukithi ndjoka yi li pevi.

□ Kwathelii ndje mu etele ndje oshileshomwa Kaleni mwa tonata!

□ Onda hala wo ekonakonombiimbeli lyoshali pegumbo.

[Enyolo lyopevi]

[Oohapu dha simana pepandja 3]

“Zii mo mokati kawo, one aantu yandje!”

[Oohapu dha simana pepandja 3]

Omalongelokalunga giifundja oga nwetha mo “aakwaniilwa yokombanda yevi”