Oshileshwa 13

Uumpulile nuulodhi oyo iinima iiwinayi

Satana okwa hala u longithe uumpulile. Oyendji ohaya yambele oohekulululwa nenge oombepo opo ye ya gamene kiiponga. Ohaye shi ningi molwashoka oya tila oonkondo ndhoka dhi niwe kwaamboka ye li moshilongo shoombepo. Ohaya zala oolinga nenge uugondo wuumpulile. Ohaya nu nenge haya gwaya komalutu gawo “omiti” ndhoka yi itaala kutya odhi na oonkondo dhuumpulile. Aantu yamwe momagumbo gawo nenge momapya gawo, ohaya holeke mo iinima mbyoka yi itaala kutya oyi na oonkondo dhokugamena. Yalwe ohaya longitha “omuti” guumpulile molwashoka oyi itaala kutya otagu ye etele elago mokungeshefa, momakonakono gosikola, nenge mokweendelathana.

Shoka tashi ke ku gamena nawanawa kuSatana osho okukala u na Jehova e li kuume koye. Jehova Kalunga naayengeli ye oye na oonkondo odhindji ye vule Satana noompwidhuli dhe. (Jakob 2:19; Ehololo 12:9) Jehova okwa hala okuhololela ookuume ke oonkondo dhe—mboka ya dhiginina thiluthilu muye.—2 Ondjalulahokololo 16:9.

Oohapu dhaKalunga otadhi ti: “Inamu kala mu na uunganga.” Jehova ota pangula uumpulile nuulodhi molwashoka iilonga mbyoka otayi vulu okutula omuntu mepangelo lyaSatana Ondiaboli.—Levitikus 19:26.