Oshili kombinga yuumpulile nuulodhi

1. Okwiitaala muumpulile nomuulodhi okwa taandele shi thike peni?

“MUAFRIKA, itashi kwatha sha okupula epulo ngele aalodhi oko ye li nenge hasho,” embo African Traditional Religion osho tali ti, notali gwedha ko kutya “kAayafrika yoludhi kehe, uulodhi owo oshinima shoshili lela.” Mwaamboka yi itaala muumpulile nomuulodhi omwa kwatelwa mboka inaaya longwa naamboka ya longwa elongo lyopombanda. Aawiliki yomalongelokalunga gUuislama nogUukwakriste nayo wo oyi itaala uulodhi.

2. Shi ikolelela keitaalo ndyoka li li apuhe, oonkondo dhuumpulile aniwa ohadhi zi peni?

² Shi ikolelela keitaalo ndyoka li li apuhe muAfrika, opu na oonkondo dhopambepo dhuulodhi. Okwi itaalwa kutya Kalunga oye he dhi pangele. Iishitwa yopambepo naakulu yonale otaya vulu oku dhi longitha. Naantu yalwe oye shi wo nkene ye na oku dhi mona noku dhi longitha, kutya nduno oshi na ko nasha nuuwanawa nenge onuuwinayi.

3. Uulodhi oshike, naantu oyi itaala kutya otau vulu okuninga shike?

³ Uulodhi ohau longithwa okuloga aatondi. Mboka haye u longitha okwi itaalwa kutya oye na oonkondo okutuma omalimalima, omahwiyu nosho wo iinamwenyo yilwe okuponokela aantu. Oshi itaalwa apuhe kutya uulodhi owo hau etitha omalugodhi, okwaamona aanona, omikithi nosho wo nokuli eso.

4. Aantu oyendji oyi itaala shike kombinga yaalodhi, nomapopyo geni ga popiwa kwaamboka ya li aalodhi?

⁴ Aalodhi ohaku tiwa kutya ohaya thigi po omalutu gawo uusiku e taya tuka po, kutya nduno oku ka tsakanena naalodhi ooyakwawo nenge oku ka lya po oomwenyo dhaantu. Molwashoka omalutu gaalodhi ohaga thigwa ga kotha moombete dhawo, uunzapo kombinga yoongano dha tya ngeyi otau gandjwa unene tuu kaantu mboka taya hokolola omahokololo ngono konima sho ye etha po uulodhi. Pashiholelwa, oshifo shimwe shaAfrika osha totha moohapu dhaamboka ya li nale aalodhi (unene tuu aakadhona yoomvula omulongo nasha) tadhi ti: “Onda dhipaga aantu 150 moku ya monitha iiponga yoohauto.” “Onda dhipaga aanona yatano mokuthipa mo ombinzi yawo ayihe.” “Onda dhipaga oohonda dhandje ndatu molwashoka dhe etha ndje.”

5. Oonganga dhimwe aniwa odhi li po okuningila shike aantu, nohadhi longitha shike?

⁵ Uumpulile mboka hau longithwa koonganga dhimwe aniwa ohau gamene aantu kuuwinayi. Oonganga dha tya ngaaka ohadhi zala iiketi. Ohadhi nu iihemba yoku dhi gamena nenge dhi yi igwayeke komalutu gadho. Momagumbo gadho, ohadhi holeke mo iinima dhe yi fumvika mevi dhi itaala kutya oyi na oonkondo dhoku dhi gamena. Odhi inekela miiketi ya nyolwa omanyolo ga za mOkoran nenge mOmbimbeli.

Iifundja nomapukitho

6. Satana noompwidhuli dhe oya ningi shike methimbo lya piti, nongiini tu na okutala ko oonkondo dhawo?

⁶ Odhoshili kutya Satana noompwidhuli dhe oyo aatondi ya nika oshiponga yaantu. Oye na oonkondo okunwetha mo omadhiladhilo nosho wo onkalamwenyo yaantu, nomethimbo lya piti oya li ya yi nokuli maantu nomiinamwenyo. (Mateus 12:43-45) Nonando katu na okudhiladhila kutya kaye na oonkondo, katu na wo oku dhi tala ko dhi li oonene sha pitilila.

7. Satana okwa hala tu itaale shike, naashika osha thanekwa ngiini?

⁷ Satana oye omupukithi a shiga ko. Oha pukitha aantu ya dhiladhile kutya oku na oonkondo odhindji dhi vule ndhoka e na shili. Oku shi thaneka: Pethimbo lyolugodhi momathimbo gongashingeyi moshilongo shimwe muAfrika, aakwiita oya li ya longitha iilongitho yomawi okutilitha aatondi yawo. Manga inaaya ponokela, aakwiita oya li ya hiki muule omitopelo dhomakanona nodhoondjembo ndhono dha kwatwa muungalo. Oya li ya hala aatondi yawo ya dhiladhile kutya oya ponokelwa kaakwiita ye na iilwitho oyindji yi na oonkondo. Komukalo gwa faathana, Satana okwa hala aantu yi itaale kutya oku na oonkondo odhindji. Elalakano lye olyo okutilitha aantu ya longe ehalo lye ihe hahalo lyaJehova. Ngashingeyi natu konakoneni iifundja yopatatu mbyoka Satana a hala aantu yi itaale.

8. Iifundja yotango oyini mbyoka Satana ta humitha komeho?

⁸ Iifundja yotango mbyoka Satana ta humitha komeho oyo mbika: Kapu na sha shi na oshiponga hashi ningwa ombadhilila; shaashoka oshiwinayi shoka ihaashi etwa thiluthilu kugumwe, ohashi holoka po okupitila moonkondo dhuumpulile. Pashiholelwa, natu tye kutya okanona oka si komalaria. Yina yako otashi vulika e shi kutya malaria ogwo omukithi hagu taandelithwa koomwe. Ihe otashi vulika i itaala wo kutya gumwe okwa longitha uulodhi okutuma omwe yi lye okanona ke.

9. Ombimbeli otayi ulike ngiini kutya Satana haye he etitha uupyakadhi kehe?

⁹ Nonando Satana oku na oonkondo okweetitha omaupyakadhi gamwe, osha puka okwiitaala kutya oku na oonkondo okweeta uupyakadhi kehe. Ombimbeli otayi ti: “Hantuku yomunandapo, halugodhi lwofule, hashikwiila shonkulungu, hamaliko gamunandunge nohakulengwa kwomunawino ku na sha, aawe, ayehe otaa ka adhikila kethimbo [nombaadhilila, NW].” (Omuuvithi 9:11) Omumatuki gumwe methigathanopo ota vulu okukala ta matuka te endelele e vule yakwawo, ihe otashi vulika kaa sindane. ‘Ombaadhilila’ otayi vulu oku mu ningitha kaa sindane. Otashi vulika a punduke e ti ihata po nenge a kwatwe komukithi nenge komaathipa. Iinima mbika otayi vulu okuningilwa kehe gumwe. Itashi ti kutya oye etwa kuSatana lelalela nenge okupitila muulodhi; ohayi holoka po owala ngeya.

10. Oshike sha popiwa kombinga yaalodhi, notu shi shi ngiini kutya osho iifundja?

¹⁰ Iifundja iitiyali mbyoka Satana ta humitha komeho oyo mbika: Aalodhi ohaya thigi po omalutu gawo nokweendaenda uusiku auhe oku ka tsakanena naalodhi ooyakwawo nenge oku ka thipa mo oomwenyo dhaantu nenge oku dhi lya mo. Ngashingeyi ipula mwene ngeyi: ‘Ngele aalodhi otaya vulu okuninga oshinima sha tya ngaaka, oshike naanaa mbela hashi thigi po olutu?’ Ngaashi twe shi mono, omwenyo ogwo omuntu, kagu shi oshinima shoka hashi vulu okutopoka nomuntu. Kakele kaashono, ombepo oyo oonkondo dhomwenyo ndhoka hadhi nkondopaleke olutu ihe ihadhi vulu okuninga sha dhaa li molutu.

11. Omolwashike tu shi shi kutya aalodhi itaya vulu okuthiga po omalutu gawo, ihe mbela shika owe shi itaala?

¹¹ Omwenyo nenge ombepo ihayi vulu okuthiga po olutu oku ka ninga sha kutya nduno oshiwanawa nenge oshiwinayi. Onkee ano, aalodhi itaya vulu okuthiga po omalutu gawo. Ihaya ningi shili iinima mbyoka taya ti kutya ohaya ningi nenge mbyoka taya dhiladhila kutya oye yi ninga.

12. Satana ohi itaalitha aantu ngiini kutya oya ninga iinima mbyoka inaaya ninga?

¹² Ongiini tatu vulu okuyelitha omapopyo ngoka ga ningwa kwaamboka ya li aalodhi? Satana ota vulu okwiitaalitha aantu kutya oya mona iinima mbyoka inaaya mona. Okupitila momamoniko, Satana ota vulu okuningitha aantu ya dhiladhile kutya oya mona, oyu uva noya ninga iinima mbyoka inaaye yi ninga. Komukalo nguka, Satana okwi inekela okugamuna ko aantu kuJehova noku ya dhiladhilitha kutya Ombimbeli oya puka.

13. (a) Uumpulile mboka aniwa hau gamene aantu kuuwinayi ou li nawa mbela? (b) Omanyolo otaga ti shike kombinga yuumpulile?

¹³ Iifundja iititatu oyo mbika: Uumpulile mboka hau longithwa koonganga dhimwe aniwa okugamena aantu kuuwinayi, ou li nawa. Ombimbeli itayi ningi eyooloko pokati kuumpulile mboka hau longithwa okweetela aantu uuwinayi nenge uuwanawa. Otayi pangula uumpulile kehe. Tala oompango ndhoka Jehova a li a gandja koshigwana shaIsrael dhi na ko nasha nuumpulile nosho wo mboka haye u longitha:

• “Inamu anekela.”—Levitikus 19:26.

• “Ngele ku na omulumentu nenge omukiintu, ku na ombepo [yuumpulile] nenge yuuwanekelo, oyo ye na okudhipagwa po.”—Levitikus 20:27.

• “Mwaa monikile mungoye nando omuntu [ta] anekele, nenge ta hunganeke iihunganeko, nenge ta logo, nenge ta pangitha uunganga ta pula aathithi.”—Deuteronomium 18:10-14.

14. Omolwashike Jehova a tula po oompango tadhi kondjitha uumpulile?

¹⁴ Oompango ndhika odha yelitha kutya Kalunga ina hala oshigwana she shi anekele. Jehova okwa gandja oompango ndhika koshigwana she molwashoka oku shi hole noina hala shi pikwe kuumbanda nokiidhila. Ina hala shi thininikwe koompwidhuli.

15. Ombimbeli otayi ulike ngiini kutya Jehova oku na oonkondo dhi vule dhaSatana?

¹⁵ Nonando Ombimbeli itayi gandja uuyelele auhe shi na ko nasha naashoka oompwidhuli hadhi vulu okuninga naashoka ihaadhi vulu okuninga, otayi ulike kutya Jehova Kalunga oku na oonkondo dhi vule unene dhaSatana noompwidhuli dhe. Jehova okwa tidhitha Satana megulu. (Ehololo 12:9) Ndhindhilika wo kutya Satana okwa pula epitikilo a makele Job nokwa vulika kelombwelo lyaKalunga kaa dhipage Job.—Job 2:4-6.

16. Okulye tu na okukonga egameno?

¹⁶ Omayeletumbulo 18:10 otaga ti: ‘Edhina lyaJehova epopiloshungo lya kola; omuyuuki omo ta ka matukila mo nota popilwa.’ (Yelekanitha NW.) Onkee ano otu na okukonga egameno kuJehova. Aapiya yaKalunga ihaya kongo egameno kiigegeti nenge kiihemba yi igamene kiilonga iiwinayi yaSatana noompwidhuli dhe, niishewe ihaya tila okulogwa kaalodhi. Aapiya yaKalunga oyi itaala shoka Ombimbeli tayi ti: “Omeho gOmuwa haga lengalenga ko evi alihe, opo a holole oonkondo dhe mokupopila oomboka, oomwenyo dhawo inaadhi mu itopoka po.”—2 Ondjalulahokololo 16:9.

17. Jakob 4:7 ote tu shilipaleke kombinga yashike, ihe oshike tu na okuninga?

¹⁷ Nangoye oto vulu okukala neinekelo ndika ngele oto longele Jehova. Jakob 4:7 ota ti: “Vulikeni ano kuKalunga, kondjitheni ondeveli, oyo notayi mú yi ontuku.” Ngele oto longele Kalunga kashili, noto vulika kuye, oto vulu okukala nuushili kutya Jehova ote ke ku gamena.