Ontopolwa 4
Kalunga oku na edhina
OLUNDJI ngele to tsakanene nomuntu oshikando shotango oho mu pula shike?— Eeno, oho mu pula edhina lye. Atuheni otu na omadhina. Kalunga okwa li a luku omuntu gwotango kombanda yevi. Okwa li e mu luku Adam. Edhina lyomukulukadhi gwaAdam oEva.
Ihe aantu hayo ayeke ye na omadhina. Dhiladhila kombinga yiinima yilwe mbyoka nayo yi na omadhina. Ngele gumwe okwe ku pe okapopitha nenge okanamwenyo komegumbo, mbela ito ke ka luka edhina?— Eeno, osha simana noonkondo okukala wu na edhina.
Tala koonyothi odhindjidhindji uusiku. Mbela oto dhiladhila kutya odhi na omadhina?— Eeno, Kalunga okwa luka onyothi kehe yi li kegulu. Ombiimbeli otayi tu lombwele tayi ti: “Otu utha omwaalu gwoonyothi note dhi ithana komadhina.”—Episalomi 147:4.
Mbela oto ti kutya olye omuntu a simanenena meshito alihe?— Eeno, oKalunga. Oto dhiladhila mbela kutya oku na edhina?— Jesus okwa ti kutya oku na. Oshikando shimwe Jesus okwa galikanene kuKalunga a ti: ‘Aalanduli yandje onde ya tseyithile edhina lyoye.’ (Johannes 17:26) Mbela owu shi edhina lyaKalunga?— Kalunga ote tu lombwele kutya oye lye. Ota ti: “Ongame Jehova. Olyo edhina lyandje.” Onkee ano, edhina lyaKalunga oJEHOVA.—Jesaja 42:8, NW.
Mbela oho kala wu uvite ngiini ngele yalwe taya dhimbulukwa edhina lyoye?— Mbela iho kala wa nyanyukwa?— Jehova naye okwa hala aantu ya tseye edhina lye. Onkee ano, ngele tatu popi kombinga yaKalunga, otu na okulongitha edhina lye Jehova. Omulongi Omunene okwa li a longitha edhina lyaKalunga, Jehova, sho a li ta popi naantu. Oshikando shimwe Jesus okwa tile: “Hola Omuwa Kalunga koye komutima gwoye aguhe.”—Markus 12:30.
Jesus okwa tseya kutya “Jehova” olyo edhina lya simanenena. Onkee ano, okwa li a longo aalanduli ye ya longithe edhina lyaKalunga. Okwa li nokuli e ya longo ya popye kombinga yedhina lyaKalunga momagalikano gawo. Jesus okwa li e shi shi kutya Kalunga okwa hala aantu ayehe ya tseye edhina lye, Jehova.
Nalenale Kalunga oku ulukilile omulumentu Moses ngoka a li gumwe gwomAaisraeli kutya edhina lye Jehova olya simana. Aaisraeli mboka oya li haya kala moshilongo hashi ithanwa Egipiti. Aantu yomoshilongo shoka oya li hayi ithanwa Aaegipiti. Oya li ya ningi Aaisraeli aapika noya li ye ya ningi onyanya noonkondo. Sho Moses a koko, okwa li a kambadhala okukwathela gumwe gwomoshigwana shawo. Shika osha li sha geyitha Farao, omukwaniilwa gwaEgipiti. Okwa li a hala okudhipaga Moses. Onkee ano, Moses okwa yi ontuku okuza muEgipiti.
Moses okwa li a tembukile koshilongo shilwe. Osha li oshilongo shAamidian. Hoka Moses okwa li a hokana nokwa tameke okukala e na uukwanegumbo. Okwa li wo a ningi omusita gwoonzi. Esiku limwe manga Moses a li i ipyakidhila nokulitha oonzi dhe popepi nondundu okwa mono oshinima oshikumithi, okwa mono oshihwa sheno sha hwama omulilo, ihe kasha li tashi lunguna po. Moses okwa hedha popepi nasho opo e shi tale nawa.
Mbela owa tseya kutya oshike sha li sha ningwa po?— Moses okwa li u uvu ewi tali mu ithana okuza moshihwa sheno shoka sha hwama. Ewi olya li tali ithana tali ti: “Moses! Mosesee!” Mbela olye a li te mu ithana?— OKalunga a li ta popi naye. Kalunga okwa li e nine Moses iilonga oyindji. Kalunga okwa li e mu lombwele a ti: ‘Ila ndi ku tume komukwaniilwa gwaEgipiti, Farao, opo wu tembudhe mo aantu yandje muEgipiti.’ Kalunga okwa li u uvanekele Moses kutya ote ke mu kwathela oku shi ninga.
Ihe Moses okwa li a lombwele Kalunga a ti: ‘Ngele te yi kAaisraeli e tandi ya lombwele te ti: “Kalunga okwa tumu ndje kune.” Otaya ka pula ndje taya ti: “Edhina lye olye?” Nandi ya lombwele ndi tye ngiini?’ Kalunga okwa li a lombwele Moses a lombwele Aaisraeli ta ti: ‘Jehova okwa tumu ndje kune, nokwa ti kutya Jehova olyo edhina lye sigo aluhe.’ (Eksodus 3:1-15) Shika osha li shu ulike kutya edhina lyaKalunga otali ka kala sigo aluhe. Ka li nando te ke li lundulula. Kalunga okwa li a hala edhina lye, Jehova li kale lya tseyika sigo aluhe.
Sho Moses a shuna kuEgipiti, Aaegipiti oya li ya dhiladhila kutya Jehova oku li owala oshikalunga shaAaisraeli kaashi na oonkondo. Kaya li taya dhiladhila kutya oye Kalunga ngoka a shita uuyuni auhe. Onkee ano, Jehova okwa li a lombwele omukwaniilwa gwaEgipiti a ti: ‘Otandi ka simanekitha edhina lyandje muuyuni auhe.’ (Eksodus 9:16) Jehova osho a ka simanekitha edhina lye ngaashi a li a popya. Mbela owu shi kutya okwe shi ningi ngiini?—
Okwa li a longitha Moses a wilike oshigwana shaIsraeli okutembuka muEgipiti. Sho ye ya pefuta Etiligane, Jehova okwa li a topola omeya gefuta pokati e taye ende mefuta puukukutu. Ihe konima yethimbo sho Farao netangakwiita lye alihe ya li ye ya landulile mo, omeya ngoka ga li ga za kumwe oga shuna kumwe nAaegipiti ayehe oya silemo.
Nziya aantu okuza koombinga adhihe dhuuyuni oya li yu uvu shoka Jehova a ningi pefuta Etiligane. Mbela otu shi shi ngiini kutya oya li ye shi uvu?— Konima yoomvula 40 lwaampono, Aaisraeli oya li ya yi kuKaanana, koshilongo shoka Jehova a li e yu uvanekela. Hoka aalumentu yaali Aaisraeli oya li ya lombwelwa komukiintu omugundjuka Rahab a ti: “Otu uvu nkene OMUWA a pwinike Efuta etiligane komeho geni sho mwa tembuka muEgipiti.”—Josua 2:10.
Kunena aantu oyendji oya fa naanaa Aaegipiti mboka. Inayi itaala kutya Jehova oye Kalunga keshito alihe. Onkee ano, Jehova okwa hala oshigwana she shi lombwele yalwe kombinga ye. Shika osho Jesus a li a ningi. Lwopehulilo lyonkalamwenyo ye kombanda yevi, okwa li a lombwele Jehova megalikano a ti: “Ongame onde ya tseyithile edhina lyoye.”—Johannes 17:26
Mbela owa hala okukala wa fa Jesus? Ano kala ho lombwele aantu kutya edhina lyaKalunga oJehova. Oto ka mona kutya aantu oyendji kaye li shi. Onkee ano, oto vulu oku yu ulukila enyolo ndyoka li li muEksodus 15:3, OB-1954. Ngashingeyi natu kuthe Ombiimbeli e tatu lesha enyolo ndyoka pamwe. Otali ti: “Jehova ofule; edhina lye Jehova.”
Mbela oshike tatu ilongo mwaashika twa lesha?— Eeno, otatu ilongo mo kutya edhina Jehova olya simana noonkondo. Ndyoka olyo edhina lyaKalunga Omunankondo adhihe, He yaJesus noye Ngoka a shita iinima ayihe. Dhimbulukwa kutya Jesus okwa ti kutya otu na okukala tu hole Jehova Kalunga nomutima gwetu aguhe. Mbela ngoye owu hole Jehova?—
Mbela ongiini tatu vulu okuulika kutya otu hole Jehova?— Omukalo gumwe tatu vulu oku shi ulika omoku mu tseya opo a ninge kuume ketu. Omukalo gulwe ogwo mokulombwela yalwe kutya edhina lye olini. Otatu vulu oku yu ulukila mOmbiimbeli mo mwene kutya edhina lye oJehova. Otatu vulu wo oku ya lombwela kombinga yiinima iikumithi mbyoka Jehova a shita naambyoka a ninga. Shika otashi nyanyudha Jehova noonkondo molwaashoka okwa hala aantu ye mu tseye. Mbela otatu vulu okukutha ombinga moku shi ninga?—
Hakehe gumwe ta ka kala a hala okupulakena uuna tatu popi kombinga yaJehova. Aantu oyendji kaya li nokuli ya pulakene sho Jesus, Omulongi Omunene, a li ta popi kombinga yaJehova. Ihe shoka inashi imba Jesus okupopya kombinga yaJehova.
Onkee ano, natu kaleni ngaashi Jesus. Natu tsikileni okukala hatu popi kombinga yaJehova. Ngele tatu shi ningi, Jehova Kalunga ota ka kala e tu nyanyukilwa molwaashoka otatu ulike kutya otu hole edhina lye.
Ngashingeyi natu lesheni pamwe omanyolo gontumba mOmbiimbeli ngoka tagu ulike kutya edhina lyaKalunga olya simana: Jesaja 12:4,5; Mateus 6:9; Johannes 17:6 nosho wo Aaroma 10:13.
[Ethano pepandja 27]
Mbela owu shi kutya oonyothi adhihe odhi na omadhina?
[Ethano pepandja 28]
Oshinima shini sha simana Moses a li i ilongo sho a li poshihwa sha hwama omulilo?
[Ethano pepandja 29]
Kalunga okwa li a tseyitha ngiini edhina lye pEfuta Etiligane?
[Omathano pepandja 30]
Jesus okwa li a tseyitha edhina lyaKalunga. Mbela nangoye oto vulu oku li ulukila yalwe mOmbiimbeli?