Ontopolwa 18

Mbela oho dhimbulukwa ngaa okupandula yalwe?

MBELA owa lya ngaa nena?— Mbela owu shi ngaa kutya olye a teleka?— Otashi vulika meme gwoye nenge gumwe i ili oye a teleka, ihe omolwashike mbela tu na okupandula Kalunga omolwiikulya mbyoka?— Omolwaashoka Kalunga oye e shi ningi tashi wapa opo tu mone iikulya. Ihe nando ongaaka, otu na wo okupandula ngoka e yi teleka nenge ngoka te yi tupe.

Omathimbo gamwe ohatu dhimbwa okupandula yalwe uuna ye tu ningila sha oshiwanawa, hasho mbela? Sho Omulongi Omunene a li kombanda yevi, opwa li pu na aanashilundu yamwe mboka ya li ya dhimbwa okupandula.

Mbela owu shi kutya omunashilundu omuntu a tya ngiini?— Omunashilundu omuntu ngoka e na uuvu hawu ithanwa oshilundu. Omukithi nguka ohagu vulu nokuli okugwitha ko oontumba dhimwe kolutu lwomuntu. Sho Jesus a li kombanda yevi, aanashilundu oya li hayi ikalekelwa. Ngele omunashilundu a mono omuntu gulwe te ya u uka kuye, okwa li hi igidha ta londodha omuntu ngono a kale kokule naye. Shika okwa li he shi ningi opo aantu yalwe kaaya hedhe popepi ya kwatwe koshilundu.

Jesus okwa li e na ohenda naanashilundu. Esiku limwe sho a li ta yi kuJerusalem, okwa li e ende mokamukunda kamwe. Sho a thiki popepi nokamukunda hoka, okwa li a tsakanekwa kaanashilundu omulongo. Oya li yu uva kutya Jesus oku na oonkondo e dhi pewa kuKalunga dhokwaaludha omikithi dhomaludhi agehe.

Aanashilundu kaya li ye ya popepi naJesus. Oya li ya thikama kokule naye. Ihe oya li yi itaala kutya Jesus ota vulu oku ya aludha. Onkee ano, sho aanashilundu ya mono Omulongi Omunene, oya li ye mu igidha taya ti: ‘Muhongi, Jesus, tu kwathela!’

Mbela ngoye oho kala wu uvitile ohenda aantu mboka taye ehama?— Jesus okwa li ha kala e yu uvitile ohenda. Okwa li e shi nkene shiyemateka okukala nuuvu woshilundu. Onkee ano, okwa li e ya yamukula ta ti: “Indeni, mu ki iyulike komuyambi.”—Lukas 17:11-14.

Mbela omolwashike Jesus e ya lombwele ya ninge ngawo? Omolwompango ndjoka Jehova a li a pa oshigwana she yi na ko nasha naanashilundu. Ompango ndjika oya li tayi ti kutya omusaaseri gwaKalunga oku na okutala kolutu lwomunashilundu. Omusaaseri oye a li ha lombwele omunashilundu kutya okwa aluka thiluthilu. Ngele a aluka, okwa li ha vulu okukala ishewe pamwe naantu mboka ye li nawa.—Levitikus 13:16,17.

Ihe aanashilundu mbaka kaya li ya aluka natango. Mbela oya li ngaa ya yi komusaaseri ngaashi Jesus a li e ya lombwele?— Eeno, oya yi pethimbo opo tuu mpoka. Aalumentu mbaka oya li yi itaala kutya Jesus ote ke ya aludha kuuvu wawo woshilundu. Mbela oshike sha li sha ningwapo?

Manga ya li mondjila okuya komusaaseri, oya li ya aluka. Oya li ya aluka molwaashoka oya li yi itaala moonkondo dhaJesus dhokwaaludha. Aalumentu mbaka kaya li tuu ya nyanyukwa! Ihe mbela oya li ye na okuninga po shike, opo yu ulike kutya oya pandula? Ando ongoye, ando owa ningi po shike?—

Gumwe gwomaalumentu mboka ya li ya aludhwa okwa li a galukile kuJesus. Okwa tameke okuhambelela Jehova nokupopya iinima iiwanawa kombinga ye. Shika osha li oshinima shu uka okuninga molwaashoka oonkondo ndhoka dhe mu aludha odha li dha zi kuKalunga. Omulumentu okwa li wo a tsu oongolo poompadhi dhOmulongi Omunene e te mu pandula. Okwa li a pandula noonkondo shoka Jesus a li e mu ningila.

Ihe ongiini kombinga yaalumentu yalwe omugoyi? Jesus okwa pula a ti: ‘Aanashilundu mboka ya aludhwa kaya li omulongo? Omugoyi oye li peni? Omolwashike omunashilundu gumwe oye owala a galuka a hambelele Kalunga?’

Eeno, gumwe owala gwomuyo a li a galuka a hambelele Kalunga nokupandule Jesus. Omunashilundu nguka okwa li nokuli Omusamaria, a za koshilongo shilwe. Aanashilundu yalwe omugoyi kaya li ya pandula Kalunga naJesus.—Lukas 17:15-19.

Mbela owa fa guni gwomaalumentu mboka? Mbela owa hala okukala wa fa Omusamaria nenge oombeyaka omugoyi?— Ano ngele gumwe e tu ningile sha oshiwanawa, mbela otu na okudhimbulukwa okuninga shike?— Otu na oku mu pandula. Olundji aantu ohaya dhimbwa okupandula yalwe. Ihe nando ongaaka, oshi li nawa okupandula gumwe. Ngele tatu ningi ngeyi, Jehova Kalunga nosho wo Omwana, Jesus otaya kala ya nyanyukwa.

Ngele to kala to dhiladhila kwaashika, oto ka dhimbulukwa kutya aantu oye ku ningila iinima oyindji iiwanawa. Pashiholelwa, mbela owe ehamene nale?— Otashi vulika inoo ehama ngaashi aanashilundu mbeyaka omulongo, ihe otashi vulika wa li wu niwe keshikisha nenge to ehama mela. Mbela opu na yamwe ya li ye ku sile oshimpwiyu?— Otashi vulika ya li ye ku pe omiti dhontumba noye ku ningile iinima yilwe. Mbela owa li wa nyanyukwa molwaashoka ye ku kwathele u tye po hwepo?—

Omulumentu Omusamaria okwa li a pandula Jesus sho e mu aludha naashika osha li sha nyanyudha Jesus. Mbela oto dhiladhila kutya meme gwoye nenge tate gwoye ota ka kala a nyanyukwa ngele we mu pandula uuna e ku ningila oshinima shontumba?— Eeno, ota ka kala e shi nyanyukilwa.

Aantu yamwe otashi vulika haye ku ningile iinima esiku kehe nenge oshiwike kehe. Otashi vulika oyo iilonga yawo. Otashi vulika nokuli haya kala ya nyanyukwa oku yi longa. Ihe otashi vulika wu dhimbwe oku ya pandula. Omulongisikola gwoye otashi vulika a longe nuudhiginini oku ku kwathela wi ilonge. Mbyoka oyo iilonga ye. Ihe ota ka kala a nyanyukwa ngele owe mu pandula sho e ku kwathele wi ilonge.

Omathimbo gamwe otashi vulika aantu ye ku ningile owala iinima iishona. Mbela owe egululilwa nale omweelo kugumwe wu pite po? Nenge mbela opu na gumwe ngoka he ku topolele iikulya pethimbo lyokulya? Oshi li nawa okupandula nokuli nando iinima mbika iishona.

Ngele ohatu dhimbulukwa okupandula aantu ooyakwetu, otatu ka dhimbulukwa wo okupandula Tate yetu gwomegulu. Opu na iinima oyindji noonkondo mbyoka tatu vulu okupandulila Jehova. Okwe tu pa omwenyo niinima ayihe mbyoka hayi ningitha onkalamwenyo yi kale ombwanawa. Onkee ano, otu na omatompelo ogendji okusimaneka Kalunga mokupopya oohapu oombwanawa kombinga ye esiku kehe.

Kombinga yokuulika olupandu, lesha Episalomi 92:1; Aaefeso 5:20; Aakolossa 3:17 nosho wo 1 Aatessalonika 5:18.

[Ethano pepandja 98]

Jesus ota lombwele aanashilundu mbaka ya ninge shike?

[Ethano pepandja 99]

Omunashilundu nguka okwa dhimbulukwa okuninga shike?

[Ethano pepandja 100]

Mbela ongiini to vulu okuholela omunashilundu ngoka a li a galukile kuJesus?

[Omathano pepandja 101]

Omolwashike sha simana tu kale hatu dhimbulukwa okupandula yalwe?