Ontopolwa 44

Ookuume ketu oye na okukala ye hole Kalunga

OOKUUME aantu mboka tu hole okupopya nayo nokukala nayo. Ihe osha simana okukala tu na ookuume aawanawa. Mbela sho to dhiladhila, olye ta vulu okukala kuume ketu a dhenga mbanda?— Eeno, oJehova Kalunga.

Mbela otatu vulu ngaa okukala lela ookuume kaKalunga?— Ombiimbeli otayi ti kutya Abraham, omulumentu ngoka a li ko nale, okwa li “kuume kaKalunga.” (Jakob 2:23) Mbela owu shi kutya omolwashike a li kuume kaKalunga?— Ombiimbeli otayi yamukula kutya Abraham okwa li ha vulika kuKalunga. Okwa li a vulika nokuli naasho a li a pulwa a ninge shoka oshidhigu kuye. Onkee ano, opo tu kale ookuume kaJehova, otu na okukala hatu ningi shoka tashi mu nyanyudha, ngaashi naanaa Abraham nosho wo Omulongi Omunene ya li ya ningi.—Genesis 22:1-14; Johannes 8:28, 29; Aahebeli 11:8, 17-19.

Jesus okwa li a lombwele aayapostoli ye a ti: ‘One ookuume kandje, ngele tamu ningi shoka tandi mú lombwele.’ (Johannes 15:14) Molwaashoka ashihe shoka Jesus a li a lombwele aantu osha za kuJehova, Jesus okwa li a hala okutya ookuume ke oyo aantu mboka haya ningi shoka Kalunga e ya lombwele ya ninge. Eeno, ookuume ke ayehe oya li ye hole Kalunga.

Yamwe yomookuume kopothingo kOmulongi Omunene oya li aayapostoli ye, mboka ye li methano pepandja 75 lyembo ndika. Oya li haye ende pamwe naye noku mu kwathela miilonga yokuuvitha. Jesus okwa li ha kala ethimbo olindji naalumentu mbaka. Oya li haya li pamwe. Oya li haya popi kombinga yaKalunga. Oya li wo haya ningi iinima yilwe pamwe. Ihe Jesus okwa li e na ookuume yalwe oyendji. Jesus okwa li wo ha kala nayo nokunyanyukilwa pamwe nayo.

Jesus okwa li e hole uukwanegumbo wumwe mboka wa li wa kala mokandoolopa okashona kedhina Betania, pondje yoshilando oshinene Jerusalem. Mbela oto dhimbulukwa kutya muukwanegumbo moka omwa li oolye?— Omwa li Maria, Marta nomumwayina Lasarus. Jesus okwa li i ithana Lasarus kuume ke. (Johannes 11:1, 5, 11) Jesus okwa li e hole uukwanegumbo mbuka nokwa li ha nyanyukilwa okukala nawo, molwaashoka owa li wu hole Jehova nowa li hawu Mu longele.

Shika itashi ti kutya Jesus ka li e na olukeno naantu mboka ya li ihaaya longele Kalunga. Jesus okwa li wo e na olukeno nayo. Okwa li nokuli ha yi komagumbo gaantu mboka nokulya pamwe nayo. Shoka osha li sha ningitha aantu yamwe ya popye kutya Jesus okwa li “kuume kaafendelithi nokaalunde.” (Mateus 11:19) Ihe Jesus ka li hayi komagumbo gaantu mboka molwaashoka a li a hokwa okukalamwenyo kwawo. Pehala lyaashono, Jesus okwa li he ya talele po opo a popye nayo kombinga yaJehova. Okwa li a kambadhala oku ya kwathela opo ya lundulule omikalo dhawo omiwinayi yo ya longele Kalunga.

Shika osha li sha ningwa esiku limwe moshilando Jeriko. Jesus okwa li owala ta piti moshilando moka u uka kuJerusalem. Opwa li pu na ongundu yaantu, nomongundu moka omwa li mu na omulumentu gwedhina Sakeus. Okwa li a hala okumona Jesus. Ihe Sakeus okwa li omufupi, okwa nyengwa okumona Jesus molwaashoka opwa li pu na aantu oyendji. Onkee ano, okwa matukile komeho nokwa londo komuti opo a vule okumona Jesus sho ta pitipo.

Sho Jesus e ya pomuti mpoka, okwa tala pombanda nokwa ti: “Londoloka mbala, oshoka ondi na oku ka talela po nena maandjeni.” Ihe Sakeus okwa li omulumentu omuyamba ngoka a li a ningi iinima oyindji iiwinayi. Omolwashike mbela Jesus a li a hala okuya kegumbo lyomulumentu a tya ngaaka?—

Jesus ka li a yi kegumbo lyaSakeus molwaashoka a hokwa onkalamwenyo ye. Okwa yi ko opo a ka popye naye kombinga yaKalunga. Okwa li a mono nkene omulumentu nguka a ningi oonkambadhala opo e mu mone. Onkee ano, okwa li e shi kutya otashi vulika Sakeus a pulakene shoka te ke mu lombwela. Ndjika oya li ompito ombwanawa okupopya naye kombinga yankene Kalunga a hala aantu ya kale.

Mbela oshike sha li sha ningwa po konima sho Jesus a popi naSakeus?— Sakeus okwa li a hokwa omalongo gaJesus. Okwa li i iyele ombedhi sho a kala nokukengelela aantu, nokwa li u uvaneke okushunitha iimaliwa yaantu mbyoka a li e ya nyokoma. Opo nduno okwa ningi omulanduli gwaJesus. Okonima owala yaashika Jesus naSakeus ya ningi ookuume.—Lukas 19:1-10.

Ngele tatu landula oshiholelwa shOmulongi Omunene, mbela otatu ka kala ngaa hatu talele po aantu mboka kaaye shi ookuume ketu?— Eeno. Ihe itatu ka ya komagumbo gawo molwaashoka twa hokwa onkalamwenyo yawo. Itatu ka longa wo iilonga iiwinayi pamwe nayo. Otatu ke ya talela po opo tu popye nayo kombinga yaKalunga.

Ihe ookuume ketu kopothingo oomboka tu hole unene okukala nayo. Opo ya kale ookuume ye li nawa, oye na okukala ya hokiwa kuKalunga. Aantu yamwe otashi vulika nokuli kaaye shi kutya Jehova oye lye. Ihe ngele oya hala okwiilonga kombinga ye, otatu vulu oku ya kwathela. Nongele konima yethimbo oye ku ulika kutya oye hole Jehova ngaashi tse, opo nduno otatu vulu okuninga uukuume wopothingo nayo.

Opu na omukalo gulwe moka to vulu okumona kutya omuntu gwontumba ota ka ninga kuume omwaanawa nenge hasho. Tala kutya oha ningi iinima yini. Mbela oha ningile yalwe uuwinayi e ta kala te ya yolo? Omuntu a tya ngaaka ke shi kuume omwaanawa, hasho mbela?— Mbela omuntu ngoka aluhe oha yi muupyakadhi? Inatu hala okuya muupyakadhi pamwe naye, hasho mbela?— Nenge mbela omuntu ngoka oha longo iilonga iiwinayi owina e ta dhiladhila kutya oku na oondunge sho pwaahe na ngoka e mu mona? Nokuli nonando omuntu ngoka kapu na ngoka e mu mona, Kalunga okwe mu mona, hasho mbela?— Mbela oto dhiladhila kutya aantu mboka haya ningi iinima ya tya ngaaka otaya ka kala ookuume ketu aawanawa?—

Kutha Ombiimbeli yoye tu tale kutya otayi popi shike kombinga yankene ookuume haya nwetha mo onkalamwenyo yetu. Natu tale Aakorinto yotango ontopolwa 15, ovelise 33, owa mona po?— Ovelise ndjoka otayi ti: “Inamu pukithwa. ‘We ende nombudhi, nangoye oto ningi ombudhi.’” Enyolo ndyoka otali ti kutya ngele otwa kala tu na ookuume aawinayi, natse otatu ka kala twe ya fa. Mepingathano naashono, ookuume aawanawa otaye ke tu kwathela tu kale tu na omikalo omiwanawa.

Inatu dhimbwa nando kutya Omuntu ngoka a simanenena monkalamwenyo yetu oJehova. Inatu hala okuyona po uukuume wetu naye, hasho mbela?— Onkee ano, otu na okukala twa kotoka opo tu pange owala uukuume naantu mboka ye hole Kalunga.

Omanyolo ngaka taga landula mpaka otagu ulike kutya osha simana okukala tu na ookuume aawanawa: Episalomi 119:115; Omayeletumbulo 13:20; 2 Timoteus 2:22 nosho wo 1 Johannes 2:15.

[Ethano pepandja 227]

Omolwashike Abraham a li “kuume kaKalunga”?

[Ethano pepandja 228]

Omolwashike Jesus olundji a li ha kala nuukwanegumbo mbuka ngele ta talele po muJerusalem? Mbela owu shi omadhina gaantu yomuukwanegumbo mbuka?

[Ethano pepandja 229]

Mbela omolwashike Sakeus a londa komuti nguka?

[Ethano pepandja 230]

Omolwashike Jesus a talele po Sakeus, naSakeus oku uvaneke okuninga shike?