ONTOPOLWA 3
Iinima iyali mbyoka ya pumbiwa opo ondjokana yi kalelele
1, 2. (a) Ondjokana oya totwa yi kale ethimbo li thike peni? (b) Ongiini shika tashi vulika?
SHO Kalunga a hokanitha omulumentu nomukiintu gwotango, kapwa li pu na shoka tashi ulike kutya oye na owala okukala ya hangana pakathimbo. Adam naEva oya li ye na okukala pamwe onkalamwenyo yawo ayihe. (Genesis 2:24) Opo ondjokana yi simanekithe Kalunga oyi na okukala pokati komulumentu gumwe nomukiintu gumwe. Pamanyolo, aaihokani otaya vulu owala okuhengathana nokuhokanununa, ngele gumwe nenge ayehe yaali ya yi moluhondelo.—Mateus 5:32.
2 Mbela oshi li tashi wapa opo aantu yaali ya kale pamwe ye na ombili onkalamwenyo yawo ayihe? Eeno, nOmbiimbeli otayi gandja iinima iyali ya simanenena tayi kwathele moshinima shika. Ngele omusamane nomukulukadhi oye yi tula miilonga, otaya ka kala ye na ombili notaya ka lalekwa nuuyamba. Iinima mbika oyini?
OSHINIMA SHOTANGO
3. Aaihokani oye na okukokeka omaludhi gatatu gohole geni?
3 Oshinima shotango osho ohole. Shihokitha osho kutya Ombiimbeli otayi popi omaludhi gi ili nogi ili gohole. Oludhi lumwe olwo ohole ndjoka hayi kala pokati kookuume kopothingo ndjoka yi li okuhola omuntu pauhandimwe nohole ya hwama. (Johannes 11:3) Oludhi olukwawo olwo ohole ndjoka hayi kala pokati kaakwanezimo. (Aaroma 12:10) Oludhi olutitatu olwo ohole ndjoka to vulu okukala wu nine omuntu gwuukashike ko okantu wa yooloka ko kuwoye. (Omayeletumbulo 5:15-20) Odhoshili kutya omusamane nomukulukadhi oye na okukokeka omaludhi agehe ngoka gohole. Ihe opu na oludhi olutine lwohole ndoka lwa simanenena shi vulithe galwe.
4. Ohole yoludhi olutine oyini?
4 Melaka lyopetameko moka Omanyolo gopaKriste gOshigreka ga nyolwa tango, oshitya shoka tashi ulike koludhi olutine lwohole osho agape. Oshitya shoka osha longithwa muJohannes gwotango 4:8 moka tatu lombwelwa taku ti: “Kalunga oye ohole.” Dhoshili, ‘tse otu na ohole, oshoka Kalunga okwa kala e tu hole tango.’ (1 Johannes 4:19) Omukriste tango oha kokeke ohole ya tya ngaaka yokuhola Jehova Kalunga nokonima oondjoka yokuhola aantu ooyakwawo. (Markus 12:29-31) Oshitya agape osha longithwa wo mAaefeso 5:2 mboka taya ti: “Okukalamwenyo kweni naku kale taku pangelwa kohole, ngashika Kristus a li e tu hole e ta gandja omwenyo gwe omolwetu.” Jesus okwa ti kutya ohole ndjika otayi ka dhimbululitha aalanduli ye yashili sho a ti: “Ngele omu holathane, nena aantu ayehe otaa ka dhimbulula kutya one aalongwa yandje.” (Johannes 13:35) Ndhindhilika wo nkene oshitya agape tashi longithwa mAakorinto yotango 13:13 sho taya ti: “Otaku kala mbika itatu: eitaalo, etegameno nohole, ihe oshinima oshinene kwaayihe mbika osho ohole [agape].”
5, 6. (a) Omolwashike ohole onene yi vule eitaalo netegameno? (b) Gandja omatompelo gamwe kutya omolwashike ohole tayi vulu okukwathela ondjokana yi kalelele.
5 Omolwashike ohole ndjika agape onene yi vule eitaalo netegameno? Omolwaashoka ohayi wilikwa komakotampango gu uka ngoka taga adhika mOohapu dhaKalunga. (Episalomi 119:105) Ohole ndjika oyo okukala wu na ko nasha nayalwe nopwaahe na okwiihola mwene ho ya ningile shoka shi li mondjila pataloko lyaKalunga, kutya nduno omuntu ngoka okwe shi ilongela nenge hasho. Ohole ya tya ngaaka ohayi ningitha aaihokani ya landule omayele gOmbiimbeli ngoka taga ti: “Kwathathaneni, dhiminathanii po oondjo ethimbo kehe, uuna pe na ngoka a ningathana namukwawo. Dhiminathanii po oondjo naanaa, ngashika Omuwa e mú dhimine po.” (Aakolossa 3:13) Aaihokani oye na okukala ye ‘holathane’ [agape] nomwenyo aguhe, oshoka ohole ohayi siikile omayono ogendji.’ (1 Petrus 4:8) Ndhindhilika kutya ohole ohayi siikile omayono. Ihayi ga dhimi po thiluthilu, molwaashoka aantu inaaya gwanenena ohaya ningi aluhe omapuko.—Episalomi 130:3, 4; Jakob 3:2.
6 Uuna aaihokani ye hole Kalunga noye holathane, ondjokana yawo otayi ka kalelela notaya ka kala ye na ombili, molwaashoka “ohole itayi hulu po.” (1 Aakorinto 13:8) Ohole “oyo epaya tali vulu okumangela iinima ayihe kumwe.” (Aakolossa 3:14) Ngele owa hokana, ongiini ngoye nakuume koye tamu vulu okukokeka ohole ndjika? Lesheni Oohapu dhaKalunga pamwe nokupopya kombinga yadho. Konakoneni oshiholelwa shaJesus shohole nokukambadhala oku mu holela, okudhiladhila nokukatuka ngaashi ye. Niishewe, kaleni hamu holoka pokugongala kwopaKriste mpoka hapu longwa Oohapu dhaKalunga. Puleni Kalunga megalikano e mu kwathele mu humithe komeho ohole ndjoka yi li oshiyimati shombepo yaKalunga.—Omayeletumbulo 3:5, 6; Johannes 17:3; Aagalati 5:22; Aahebeli 10:24, 25.
OSHINIMA OSHITIYALI
7. Esimaneko oshike, nolye e na oku li ulika mondjokana?
7 Ngele aaihokani oye holathane shili, ohaya ka kala wo nokusimanekathana, nesimaneko oli li oshinima oshitiyali shoka hashi eta ombili mondjokana. Oshitya esimaneko otashi ti “okuyaalela yalwe nokukala we ya lenga.” Oohapu dhaKalunga otadhi ladhipike Aakriste ayehe mwa kwatelwa aasamane naakulukadhi tadhi ti: “Kaleni mu na ohole yaamwayinathana, ne mu lalakanene okusimanekathana.” (Aaroma 12:10) Omuyapostoli Petrus okwa nyola a ti: “Ne wo aalumentu, mokukalathana kweni naakiintu omu na okutseya kutya oyo oya fa iiyuma yeloya, onkee omu na oku ya simaneka.” (1 Petrus 3:7) Aakulukadhi otaya lombwelwa ya ‘simaneke aalumentu yawo.’ (Aaefeso 5:33) Ngele owa hala okusimaneka gumwe, owu na okukala nombili naye, okusimaneka omataloko ge nokukala to gwanitha po shoka te ku pula ngele otashi vulika.
8-10. Omomikalo dhini esimaneko tali kwathele aaihokani ye na ombili mondjokana yawo noyi kale ya kola?
8 Mboka ya hala okunyanyukilwa ondjokana yawo ohaya simanekathana ‘mokulalakanena uuwanawa wayakwawo wo, haamboka ashike wawo yene.’ (Aafilippi 2:4) Ihaya tala owala kuuwanawa wawo yene shoka tashi ulike okwiihola mwene. Pehala lyaashono, ohaya tala wo shoka tashi opalele ookuume kawo noku shi pititha komeho.
9 Esimaneko ohali kwathele aaihokani ya zimine kutya omataloko gamwe gookuume kawo oga yooloka ko kugawo. Ino tegelela aantu yaali ya kale ye na etaloko lya faathana. Shoka sha simana komusamane otashi vulika shi kale inaashi simana komukulukadhi, naashoka omukulukadhi e hole otashi vulika omusamane kee shi hole. Ihe kehe gumwe oku na okusimaneka omataloko gamukwawo nomahogololo ge shampa owala itaaga kondjithathana nomakotampango gaJehova. (1 Petrus 2:16; yelekanitha Filemon 14.) Natango, kehe gumwe oku na okusimaneka mukwawo mokukala itee mu ula oohapu oombwinayi nokuninga omashendjo ngoka tage mu sitha ohoni kutya nduno omokati kaantu nenge ngele ye li oyo ayeke.
10 Eeno, ohole yokuhola Kalunga noyokuholathana nosho wo esimanekathano oyo iinima iyali mbyoka ya simanenena opo ondjokana yi pondole. Ongiini aaihokani taya vulu okutula miilonga uukwatya mboka moombinga dhimwe dha simanenena mondjokana yawo?
UUKWAMUTSE WA FA WAKRISTUS
11. Pamanyolo, olye omutse mondjokana?
11 Ombiimbeli otayi tu lombwele kutya omulumentu okwa shitwa nomaukwatya ngoka tage mu ningitha a kale omutse gwuukwanegumbo te shi enditha nawa. Onkee ano, omulumentu oku na oshinakugwanithwa shoka a pewa kuJehova okusila oshimpwiyu pambepo nopalutu omukulukadhi gwe naanona ye. Oku na okuninga omatokolo ge li pandjele ngoka tagu ulike kutya ota longo pahalo lyaJehova nokukala e li oshiholelwa oshiwanawa shetilokalunga. “Aakiintu, vulikeni kaalumentu yeni ongokOmuwa, oshoka omulumentu oye omutse gwomukiintu, ongashika Kristus oye omutse gwegongalo.” (Aaefeso 5:22, 23, OB-1954) Ihe Ombiimbeli otayi ti wo kutya omulumentu naye oku na omutse Ngoka hagu mu pangele. Omuyapostoli Paulus okwa nyola a ti: “Onda hala, mu kale mwa tseya kutya Kristus oye omutse gwomulumentu kehe, omulumentu oye omutse gwomukadhi, naKalunga oye omutse gwaKristus.” (1 Aakorinto 11:3) Omulumentu omunandunge ohi ilongo nkene e na okulongitha uukwamutse we mokuholela omutse gwe, Kristus Jesus.
12. Jesus okwa tula po oshiholelwa oshiwanawa shini shokuvulika nosho wo okukala e li omutse?
12 Jesus naye oku na omutse, Jehova, noha vulika lela kuYe. Jesus okwa ti: “Itandi landula ehalo lyandje mwene, ihe olyaanguka a tuma ndje.” (Johannes 5:30) Kashi shi tuu oshiholelwa oshiwanawa! Jesus “oye omutango gwiishitwa ayihe.” (Aakolossa 1:15) Okwa ningi Mesiasa. Okwa ningi omutse gwegongalo lyAakriste aagwayekwa nomukwaniilwa omuhogololwa gwUukwaniilwa waKalunga, a yelwa e vule aayengeli ayehe. (Aafilippi 2:9-11; Aahebeli 1:4) Nonando okwa li e na ondondo yopombanda, Jesus ka li e na onyanya, ihaa yawala nenge ha thindile yamwe kongudhi. Ye ka li kayamukulwa ha thiminike aalongwa ye ya vulike kuye. Jesus okwa li omunahole nomunahenda, unene tuu naamboka ya dhinika. Okwa ti: “Ileni kungame amuhe mwa vulwa nomwa humbatekwa uudhigu, ongame notandi mú pe [evululuko]. Itsikeni ondjoko yandje, ne mu tseye ndje, oshoka ongame omunambili nomomutima ondi ishonopeka; notamu imonene evululuko. Oshoka ondjoko yandje ombwanawa nomutenge gwandje omupu.” (Mateus 11:28-30) Aantu oya li haya kala ya pepelelwa ngele ye li puJesus.
13, 14. Ongiini omusamane omunahole ta vulu okuholela uukwamutse waJesus?
13 Omusamane ngoka a hala uukwanegumbo we wu kale wu na ombili oku na okuholela omaukwatya omawanawa gaJesus. Omusamane omwaanawa ke na okukala omukwanyanya nenge kayamukulwa, ha longitha nayi uukwamutse we mokuningilila mo omukulukadhi gwe. Pehala lyaashono, oku na okukala e mu hole noku mu simaneka. Ngele Jesus okwa li ‘omunambili momutima,’ omusamane oku na unene etompelo lyokwiifupipika, molwaashoka ye oha ningi omapuko omolwokwaahagwanenena. Uuna a ningi epuko, oha kala a hala omukulukadhi gwe e mu dhimine po. Onkee ano, omusamane omwiifupipiki oha zimine omapuko ge, nonando oshi li oshidhigu okutya: “Ombili, owa li wu li mondjila.” Oshi li oshipu komukulukadhi okusimaneka uukwamutse womusamane omunambili nomwiifupipiki pehala lyaangoka e na uuntsa noku na omanganga. Omukulukadhi e na esimaneko oha gandja wo ombili uuna a ningi epuko.
14 Kalunga okwa shita omukiintu nomaukwatya omawanawa ngoka taga vulu okweeta ombili mondjokana. Omusamane omunandunge ote ke ga dhimbulula noite ke mu thindila kongudhi omolwago. Aakiintu oyendji oye na ohenda nondjaalela, omaukwatya ngoka ga pumbiwa mokusila oshimpwiyu uukwanegumbo nokuhumitha komeho ekwatathano naantu. Olundji aakiintu oye na owino yokuninga egumbo li kale tali monika nawa. “Omukulukadhi omwaanawa” ngoka a popiwa mOmayeletumbulo 31 oku na omaukwatya niipewa ya dhenga mbanda oyindji mbyoka tayi etele uukwanegumbo we uuwanawa oundji. Omolwashike mbela? Omolwaashoka omutima gwomusamane gwe “ohagu mu inekele.”—Omayeletumbulo 31:10, 11.
15. Ongiini omusamane te ku ulika kutya oku hole omukulukadhi gwe nokwe mu simaneka ngaashi Kristus?
15 Momaputuko gamwe, aasamane oye li ookayamukulwa, nongele nokuli aakulukadhi yawo taye ya pula sha, ohaya talika ko kaaye na esimaneko. Ohaya ungaunga naakulukadhi yawo ya fa aapika. Okulongitha uukwamutse papuko momukalo ngoka itashi nkundipaleke owala ekwatathano pokati kawo naakulukadhi yawo, ihe onaKalunga wo. (Yelekanitha 1 Johannes 4:20, 21.) Kombinga onkwawo, aasamane yamwe kaye na ko nasha noshinakugwanithwa shawo nohaye etha aakulukadhi yawo ya wilike megumbo. Omusamane ngoka ha vulika lela kuKristus iha ningi nayi nenge a kale a dhina omukulukadhi gwe. Pehala lyaashono, oha holele ombepo yeiyambo mwene yaJesus noha ningi ngaashi Paulus a kumagidha a ti: “Aalumentu, holeni aakiintu yeni, naanaa ngashika Kristus e hole egongalo lye nokwi igandja meso omolwalyo.” (Aaefeso 5:25) Kristus Jesus okwa li e hole unene aalongwa ye nokwa li e ya sile. Omusamane omunambili oha kambadhala okuholela iikala mbyoka yokwaaihola mwene nokulalakanena uuwanawa womukulukadhi gwe, pehala lyokutegelela oshindji unene kuye. Uuna omusamane ta vulika kuKristus nokuulika ohole nesimaneko ngaashi ye, otashi ki inyengitha omukulukadhi gwe a vulike kuye.—Aaefeso 5:28, 29, 33.
AAKULUKADHI, VULIKENI KAASAMANE YENI
16. Omukulukadhi oku na okukala ngiini nomusamane gwe?
16 Konima yethimbo efupi sho Adam a li a shitwa, “Omuwa Kalunga okwa popi e ta ti: ‘Inashi opala, omuntu i ikalele oye awike. Otandi mu shitile omukwathi e mu opalela.’” (Genesis 2:18) Kalunga okwa shiti Eva e li “omukwathi” gwaAdam, ihe hakuninga ethigathano naye. Omusamane okwa li e na okulongitha uukwamutse we nohole, nomukulukadhi okwa li e na okukala e hole omusamane gwe, oku mu simaneka nokuvulika kuye.
17, 18. Omomikalo dhini omukulukadhi ta vulu okukala lela omukwathi gwomusamane gwe?
17 Ihe okukala omukulukadhi omwaanawa inashi kwatela mo owala okukala ha vulika. Oha kambadhala a kale lela omukwathi mokuyambidhidha omusamane gwe momatokolo ngono ta ningi. Shika otashi ka kala lela oshipu kuye uuna ta tsu kumwe nomatokolo ge. Ihe nonando ita tsu kumwe netokolo lye, otashi ke enda nawa ngele ote mu yambidhidha moku li gwanitha.
18 Omukulukadhi ota vulu okukwathela omusamane gwe a kale omutse omwaanawa miinima yilwe. Ota vulu okuulika olupandu lwe koonkambadhala dhomusamane gwe dhokukwatela komeho, pehala lyoku mu pa uusama nenge oku mu ningitha a kale u uvite kutya ite shi enditha nawa nando. Mokuungaunga nomusamane gwe nombili, oku na okudhimbulukwa kutya ‘ombepo yi na ombili noya ngungumana oyi na oshilonga oshinene koshipala shaKalunga,’ ihe hakomusamane gwe owala. (1 Petrus 3:3, 4; Aakolossa 3:12) Ongiini ngele omusamane ke shi omwiitaali? Kutya nduno omwiitaali nenge hasho, Omanyolo otaga kumagidha aakulukadhi “ya kale ye hole aalumentu yawo noyana, ya kale haa ikwata nawa, aayogoki, ya ninge oomeme ye shi kukala nawa nomagumbo, haa vulika kaalumentu yawo, opo kwaa kale nando omuntu ta sheke elaka lya za kuKalunga.” (Titus 2:4, 5) Uuna tapu holoka oshinima shoka eiyuvo lyomukulukadhi itaali pitike e shi ninge, ngele ota popi ‘nombili nonesimaneko,’ otashi vulika omusamane gwe ngoka kee shi omwiitaali ta ka simaneka etokolo lye. Aasamane yamwe mboka kaaye shi ooitaali oya ‘falwa meitaalo komikalo dhaakulukadhi yawo, ihe hakoohapu, oshoka oya mona nkene omikalo dhawo dha yogoka nonkene haya simaneke Kalunga.’—1 Petrus 3:1, 2, 15; 1 Aakorinto 7:13-16.
19. Ongiini ngele omusamane a pula omukulukadhi gwe a ninge shoka shi indikwa kuKalunga?
19 Ongiini ngele omusamane okwa pula omukulukadhi gwe a ninge shoka shi indikwa kuKalunga? Ngele shoka osha ningwa, omukulukadhi oku na okudhimbulukwa kutya Kalunga oye Omupangeli gwe a shiga ko. Oku na okuholela aayapostoli sho ya li ya pulwa kaapangeli ya yone oshipango shaKalunga. Iilonga 5:29 otayi hokolola tayi ti: “Petrus naayapostoli ooyakwawo oye ya yamukula ya ti: ‘Otse otu na okuvulika kuKalunga, hakaantu.’”
OKUPOPYA MWA MANGULUKILATHANA
20. Omoshinima shini ohole nesimaneko ya pumbiwa unene?
20 Ohole nesimaneko oya pumbiwa opo aaihokani ya vule okupopya ya mangulukilathana. Omusamane omunahole ota ka kala e na ko nasha nomaipyakidhilo gomukulukadhi gwe, omaupyakadhi ge nosho wo omataloko ge miinima yontumba noyongandi mokukundathana naye. Shoka osho omukulukadhi a pumbwa. Omusamane ngoka ha longitha ethimbo okupopya nomukulukadhi gwe nokupulakena shili shoka ta popi ohu ulike kutya oku mu hole nokwe mu simaneka. (Jakob 1:19) Aakulukadhi yamwe ohaya nyenyeta kutya aasamane yawo ohaya kundathana nayo ethimbo eshona owala. Shoka oshiyemateka shili. Odhoshili kutya kunena aalumentu yamwe otashi vulika haya longo oowili odhindji kokule nomagumbo gawo naakulukadhi yamwe otashi vulika ye na wo iilonga yokwiikongela omboloto omolwuuhupilo. Ihe aaihokani oya pumbwa ethimbo lyokukala pamwe. Kaye na okukala kehe gumwe ta ningi iinima ye paumwene. Otashi ke etitha omaupyakadhi ga kwata miiti ngele oye wete ya pumbwa kuume ngoka kee shi gwopandjokana a pulakene komaupyakadhi gawo.
21. Ongiini okupopya ku li nawa taku ka kwathela opo mondjokana mu kale ombili?
21 Omukalo moka aasamane naakulukadhi haya kundathana ogwa simana. ‘Oohapu oontalala otadhi opalele omwenyo nodhi li endjangeko lyomasipa.’ (Omayeletumbulo 16:24) Kutya nduno kuume kopandjokana omwiitaali nenge hasho, omayele gOmbiimbeli taga longo otaga ti: “Oohapu dheni nadhi kale aluhe oombwanawa notadhi hokitha omuntu oku mú pulakena.” (Aakolossa 4:6) Ngele gumwe inashi mu endela nawa esiku ndyoka, oohapu dhohenda dhamukwawo otadhi vulu oku mu etela epepelelo. “Oohapu tadhi popiwa pethimbo lyo opala, odho iiyapula yoshingoli moshiyaha shoshisiliveli.” (Omayeletumbulo 25:11) Osha simana okulongitha omutono gwewi omwaanawa nosho wo oohapu dha hogololwa nawa. Pashiholelwa, gumwe otashi vulika a popye namukwawo momukalo omwiinayi ta ti: “Edhila omweelo!” Ihe mbela itashi ka kala shi li nawa okulongitha ‘oohapu oombwanawa’ ta popi newi lyohenda ta ti: “Kwathela ndje wu edhile omweelo”?
22. Aaihokani oye na okukala niikala ya tya ngiini opo ya kale haya popi ya mangulukilathana?
22 Aaihokani otaya ka popya ya mangulukilathana uuna taya popi nengungumano, neyaalelo nonohenda ye na iipala yi na ombili. Ngele omusamane nomukulukadhi taya kambadhala nuudhiginini okukala haya popi momukalo omwaanawa, otaya ka kala ya manguluka okupopya oompumbwe dhawo, notaya vulu okuhekelekathana nokukwathelathana momathimbo omadhigu. Oohapu dhaKalunga otadhi tu ladhipike tadhi ti: “Hekelekeni oomwenyo dha polimana.” (1 Aatessalonika 5:14, NW) Otapu ka kala omathimbo uuna omusamane a polimana nomathimbo uuna omukulukadhi oye a polimana. Pompito ya tya ngaaka, otaya vulu ‘okuhekelekathana’ nokutungathana.—Aaroma 15:2.
23, 24. Ongiini ohole nesimaneko tayi vulu okukwatha uuna pu na okwaahauvathana? Gandja oshiholelwa.
23 Aaihokani mboka ye holathane noya simanekathana itaya ka tala ko okwaahauvathana kehe ku li uupyakadhi. Otaya ka longa nuudhiginini opo kaaya kale taya ningathana “onyanya.” (Aakolossa 3:19) Ayehe oye na okudhimbulukwa kutya “eyamukulo etalala otali loteke ondjahi.” (Omayeletumbulo 15:1) Kala wa kotoka waaha dhine kuume koye kopandjokana nenge wu mu pe uusama ngele te ku mbumbulile omaiyuvo ge. Pehala lyaashono, ngele te shi ningi shi tala ko owala shi li ompito okuuva ko nkene mukweni ta dhiladhila. Kambadhaleni okukandula po okwaahauvathana kweni nokuthika pehulithodhiladhilo limwe.
24 Dhimbulukwa sho Sara a li a lombwele omusamane gwe Abraham a kandule po uupyakadhi wontumba momukalo ngoka Abraham a li inaa hokwa. Ihe nando ongaaka, Kalunga okwa li a lombwele Abraham a ti: “Gwanitha shoka Sara te ku lombwele.” (Genesis 21:9-12) Abraham okwa li e shi ningi nokwa li a lalekwa nuuyamba. Sha faathana, ngele omukulukadhi ota ningi eetopo ndyoka omusamane gwe itaa tsu kumwe nalyo, omusamane na pulakene kuye nokutala ngele oli shi okulandulwa. Nonando ongaaka, omukulukadhi ke na okupopya nopwaahe na ezimbuko, ihe oku na okupulakena shoka omusamane gwe ta ti. (Omayeletumbulo 25:24) Otashi ka kala kaashi li pahole nokwaahe na esimaneko ngele omusamane nenge omukulukadhi ota komangele opo iinima yi ningwe aluhe ngaashi ye a hala.
25. Ongiini aaihokani taya vulu okukala ya nyanyukwa ngele taya popi ya mangulukilathana shi na ko nasha niinima yopamilalo?
25 Osha simana wo opo aaihokani ya popye ya mangulukilathana shi na ko nasha niinima yopamilalo. Okwiihola mwene nosho wo okwaaheneipangelo otaku vulu okuyonagula po ekwatathano ndyoka lya simana mondjokana. Onkee ano, osha simanenena opo aaihokani ya kale ye na eidhidhimiko nokupopya ya mangulukilathana kombinga yoshinima shika. Itapu ka kala uupyakadhi shi na ko nasha nomilalo ngele kehe gumwe ki ihole owala mwene, ihe ota lalakanene uuwanawa wamukwawo. Moshinima shika nomiinima yilwe, “inaku kala nando omuntu ta longo owala shoka she mu opalela, ihe na tale wo shoka tashi opalele mukwawo.”—1 Aakorinto 7:3-5; 10:24.
26. Nonando mondjokana kehe otamu ka kala siku nawa siku nayi, ongiini okupulakena kOohapu dhaKalunga taku ka kwathela aaihokani ya kale nombili?
26 Oohapu dhaKalunga itadhi gandja tuu omayele omawanawa! Odhoshili kutya mondjokana kehe otamu ka kala siku nawa siku nayi. Ihe ngele aaihokani ohaya vulika kwaashoka Jehova ta ti, ngaashi sha popiwa mOmbiimbeli, nokukankamekela ekwatathano lyawo kohole nokesimanekathano, otaya vulu okukala nuushili kutya ondjokana yawo otayi ka kalelela notayi ka kala yi na ombili. Kungeyi itaya ka kala nokusimanekathana owala, ihe otaya ka simaneka wo Omutotipo gwondjokana, Jehova Kalunga.
ONGIINI OMAKOTAMPANGO GOMBIIMBELI NGAKA TAGA VULU OKUKWATHELA AAIHOKANI YA NYANYUKILWE ONDJOKANA TAYI KALELELE?
Aakriste yashili oye holathane.—Johannes 13:35.
Aakriste ohaya dhiminathana po.—Aakolossa 3:13.
Kalunga okwa tula po ekotampango lyuukwamutse.—1 Aakorinto 11:3.
Osha simana okupopya shoka shi li mondjila pamukalo gu uka.—Omayeletumbulo 25:11.
[Ethano pepandja 28]
Ngele aaihokani oye holathane noya simanekathana, ondjokana yawo otayi ka pondola