ONTOPOLWA 15
Longela Kalunga momukalo ngoka a hokwa
1. Olye ta vulu oku tu longa nkene tu na okulongela Kalunga?
OMALONGELOKALUNGA ogendji ohaga ti kutya ohaga longo aantu oshili kombinga yaKalunga. Shoka kashi shi shoshili, molwaashoka ohaga longo aantu iinima ya yoolokathana kombinga yaKalunga nankene tu na oku mu longela. Ongiini tatu vulu okulongela Kalunga momukalo ngoka a hokwa? Jehova oye awike ta vulu oku tu longa nkene tu na oku mu longela.
2. Openi to vulu okwiilonga nkene wu na okulongela Kalunga?
2 Jehova okwe tu pa Ombiimbeli, opo twi ilonge nkene tu na oku mu longela. Onkee ano, otu na oku yi konakona. Jehova ote tu kwathele tu mone mo uuwanawa mwaashoka tayi tu longo, oshoka oku na ko nasha natse shili. — Jesaja 48:17.
3. Kalunga okwa hala tu ilonge shike?
3 Aantu yamwe ohaya ti kutya Kalunga okwa hokwa omalongelokalunga agehe, ihe Jesus okwe tu longa ta ti: “Hakehe ngoka ti ithana ndje ‘Omuwa, Omuwa’, ta yi mOshilongo shegulu, aawe, oye tuu ngoka ta gwanitha ehalo lyaTate yomegulu.” Shika osha kwata miiti, molwaashoka Jesus okwa yelekanitha aantu mboka ihaaya vulika kuKalunga ‘naakolokoshi.’ Onkee ano, otwa pumbwa okwiilonga ehalo lyaKalunga noku li gwanitha po. — Mateus 7:21-23.
4. Jesus okwa ti shike kombinga yokulonga ehalo lyaKalunga?
4 Jesus okwe tu londodha kutya uuna tatu longo ehalo lyaKalunga, otu na okwaadhika komaupyakadhi. Okwa ti: “Indeni mo, mu pitile mosheelo shoka sha patekidha, oshoka osheelo shoka oshinene nondjila ndjoka ya mbwalangandja otayi fala mekano, noku na oyendji mboka taye yi lamba. Ihe osheelo shoka oshishona nondjila ndjoka ya thinana otayi fala komwenyo, naashona yowala mboka taye yi mono.” (Mateus 7:13, 14) Ondjila ndjoka ya thinana tayi fala komwenyo gwaaluhe, otayi thaneke omukalo ngoka Kalunga a hala okulongelwa. Ondjila ndjoka ya mbwalangandja tayi fala meso, otayi thaneke omukalo ngoka Kalunga inaa hokwa. Jehova ina hala nando aantu ya landule ondjila ndjoka tayi fala meso. Okwa pa kehe gumwe ompito i ilonge kombinga ye. — 2 Petrus 3:9.
LONGELA KALUNGA MOMUKALO NGOKA A HOKWA
5. Ongiini to vulu okudhimbulula mo mboka haya longele Kalunga momukalo ngoka a hokwa?
5 Jesus okwa ti kutya otatu vulu okudhimbulula mboka haya longele Kalunga momukalo ngoka a hokwa. Otatu ya dhimbulula mo uuna tatu konakona shoka yi itaala naashoka haya longo. Okwa ti: “Otamu ya dhimbulula kiiyimati yawo.” Okwa gwedha ko ta ti: “Okehe tuu omuti omwaanawa otagu imi iiyimati iiwanawa.” (Mateus 7:16, 17) Shika itashi ti kutya mboka haya longele Kalunga ihaya ningi omapuko. Ohaya kambadhala aluhe okulonga shoka shi li mondjila. Natu kundathaneni shoka tashi tu kwathele tu dhimbulule mo mboka haya longele Kalunga momukalo ngoka a hokwa.
6, 7. Omolwashike elongo lyaamboka haya longele Kalunga shili, lya kankamena kOmbiimbeli? Jesus okwe tu tulila po oshiholelwa oshiwanawa shini?
6 Elongo lyawo olya kankamena kOmbiimbeli. Ombiimbeli otayi ti: “Enyolo kehe olya nyolithwa kOmbepo yaKalunga noli na oshilonga shokulonga oshili, okukumagidha, okupukulula nokuulukila omuntu ondjila yu uka, opo kehe ngoka ta longele Kalunga, a kale a gwana a pwa nokwoopalela oshilonga kehe oshiwanawa.” (2 Timoteus 3:16, 17) Omuyapostoli Paulus okwa li a nyolele Aakriste yokuTessalonika a ti: “Sho twe mu etele oohapu dhaKalunga, omwe dhi uvu e tamu dhi taamba, hangaashi oohapu dhomuntu, ihe odhaKalunga, dho odho tuu shili.” (1 Aatessalonika 2:13) Mboka haya longele Kalunga moshili, elongo lyawo olya kankamena kOmbiimbeli. Inali ikolelela komadhiladhilo gaantu, komithigululwakalo nenge kushilwe.
7 Kehe shimwe shoka Jesus a longo aantu, osha li shi ikolelela kOohapu dhaKalunga. (Lesha Johannes 17:17.) Olundji okwa li ha popi ta longitha omanyolo. (Mateus 4:4, 7, 10) Mboka haya longele Kalunga moshili ohaya landula oshiholelwa shaJesus. Kehe shimwe taya longo aantu, oshi ikolelela kOmbiimbeli.
8. Jesus okwe tu longa shike kombinga yankene tu na okulongela Kalunga?
8 Ohaya longele Jehova oye awike. Eksodus 15:3 otayi ti: “Jehova Ofule; edhina lye Jehova.” (OB-1954) Jesus okwa li a hala aantu ya tseye kutya Kalunga kashili olye. Okwa li wo e ya longo edhina lye. (Lesha Johannes 17:6.) Jesus okwa ti: “Omuwa Kalunga koye oye awike u na oku mu galikana noye awike u na oku mu longela.” (Mateus 4:10) Tu li aapiya yaKalunga otu na okulandula oshiholelwa shaJesus. Otu na okulongela Jehova oye awike nokulongitha edhina lye. Otu na oku li tseyithila yalwe noku ya lombwela shoka te ke tu ningila.
9, 10. Ohatu ulike ngiini kutya otu holathane?
9 Oye holathane shili. Jesus okwa longa aalanduli ye ya kale ye holathane. (Lesha Johannes 13:35.) Kashi na nduno mbudhi kutya otwa za peni, otwa za meputuko lini, aayamba nenge oohepele, otu holathane. Ohole ohayi tu hanganitha tu kale ongaamwayinathana. (Aakolossa 3:14) Ihatu yi kiita tu ka dhipage aantu. Ombiimbeli otayi ti: “Eyooloko pokati kaana yaKalunga naana yomuhindadhi opo li li mpa: Shaa ngoka itaa longo shoka shu uka nenge kee hole mukwawo, oye ke shi omuna gwaKalunga.” Oya gwedha ko tayi ti: “Otse otu na okuholathana. Inatu kaleni twa fa Kain, ngoka a li ta longithwa komuhindadhi nokwa dhipaga po omumwayina.” — 1 Johannes 3:10-12; 4:20, 21.
10 Ohatu longitha ethimbo lyetu, oonkondo dhetu niiniwe yetu tu kwathele yalwe notu tsaathane omukumo. (Aahebeli 10:24, 25) Ohatu “ningileni kehe gumwe uuwanawa.” — Aagalati 6:10.
11. Omolwashike twi itaala kutya otatu hupithwa owala okupitila muJesus Kristus?
11 Oyi itaala kutya otatu ka hupithwa owala okupitila muJesus Kristus. Ombiimbeli otayi ti: “Omuye awike tamu tu zile ehupitho; oshoka muuyuni auhe kamu na nando ogumwe gwedhina Kalunga e li hololela aantu, tatu vulu okuhupithilwa muye.” (Iilonga 4:12) MOntopolwa 5 yembo ndika, otwi ilonga mo kutya Jehova okwa tumu Omwana, Jesus, kombanda yevi. Okwe mu tumu a gandje omwenyo gwe gu ninge iikulila yaantu. (Mateus 20:28) Okwe mu hogolola a ka pangele e li Omukwaniilwa kombanda yevi. Ombiimbeli otayi tu lombwele kutya otu na okuvulika kuJesus ngele otwa hala oku ka kala nomwenyo sigo aluhe. — Lesha Johannes 3:36.
12. Omolwashike ihaatu kutha ombinga mopolotika?
12 Ihaya kutha ombinga mopolotika. Jesus ka li ha kutha ombinga mopolotika. Sho Jesus a li mompangu koshipala shomupangeli Omuroma, Pilatus, okwa tile: “Uukwaniilwa wandje kau shi womuuyuni mbuka.” (Lesha Johannes 18:36.) Ngaashi Jesus, natse aadhiginini kUukwaniilwa waKalunga womegulu. Kutya nduno otu li peni, ihatu kutha ombinga mopolotika. Ombiimbeli otayi tu lombwele tu “vulike kaapangeli” mboka taya pangele. (Aaroma 13:1) Ohatu vulika koompango dhiilongo moka tu li. Uuna ompango yi li ompinge noompango dhaKalunga, ohatu holele aayapostoli mboka ya tile: “Otse otu na okuvulika kuKalunga, hakaantu.” — Iilonga 5:29; Markus 12:17.
13. Ohatu uvitha shike kombinga yUukwaniilwa waKalunga?
13 Oyi itaala kutya Uukwaniilwa waKalunga owo ekandulopo lyomukundu. Jesus okwa ti: “Elaka ndika etoye lyOshilongo” nenge lyUukwaniilwa otali ku uvithilwa uuyuni awuhe. (Lesha Mateus 24:14.) Kapu na nando epangelo lyopantu tali vulu okuninga shoka Uukwaniilwa waKalunga tawu ke tu ningila. (Episalomi 146:3) Jesus okwe tu longa tu galikane Uukwaniilwa waKalunga wu ye, sho a ti: ‘Oshilongo shoye nashi ye, ehalo lyoye nali gwanithwe kombanda yevi wo ngaashi megulu.’ (Mateus 6:10) Ombiimbeli otayi tu lombwele kutya Uukwaniilwa waKalunga otawu ka hanagula po omapangelo agehe ‘nowo wene otawu kala sigo aluhe.’ — Daniel 2:44.
14. Oolye haya longele Kalunga momukalo ngoka a hokwa?
14 Konima ngele mwa kundathana iitsa mbyoka, ipula ngeyi: ‘Oolye haya longo aantu shi ikolelela kOmbiimbeli? Oolye haya longo aantu edhina lyaKalunga? Oolye haya ulukilathana ohole noyi itaala kutya Kalunga okwa tumu Jesus e tu hupithe? Oolye ihaaya kutha ombinga mopolotika? Oolye haya uvitha kutya Uukwaniilwa waKalunga owo tawu ka kandula po omaupyakadhi getu?’ Oonzapo dhaJehova owala. — Jesaja 43:10-12.
OTO KA NINGA PO SHIKE?
15. Otu na okuninga shike, opo Kalunga a hokwe iilonga yetu?
15 Inashi gwana owala okwiitaala kutya Kalunga oko e li. Oompwidhuli nadho odhi itaala kutya oko e li, ihe ihadhi vulika kuye. (Jakob 2:19) Ngele otwa hala Kalunga a hokwe iilonga yetu, katu na owala okwiitaala kutya oko e li, ihe otu na wo okulonga shoka te tu lombwele.
16. Omolwashike tu na okweetha po elongelokalunga lyiifundja?
16 Ngele otwa hala Kalunga a hokwe iilonga yetu, otu na okweetha po elongelokalunga lyiifundja. Omupolofeti Jesaja okwa nyola a ti: “Shi thigeni po! Inamu guma tuu shoka sha nyata!” (Jesaja 52:11; 2 Aakorinto 6:17) Otu na ano okweekelahi kehe shoka shi na ekwatathano nelongelokalunga lyiifundja.
17, 18. “Babilon oshinene” oshike, nomolwashike aantu ye na okuza mo nziya musho?
17 Elongelokalunga lyiifundja oshike? Olyo elongelokalunga kehe ndyoka hali longo aantu ya longele Kalunga momukalo ngoka itaagu tsu kumwe nOohapu dhe. Ombiimbeli ohayi ithana omalongelokalunga agehe giifundja “Babilon oshinene.” (Ehololo 17:5) Omolwashike mbela? Konima yeyelu pethimbo lyaNoa, omalongo ogendji giifundja oga li ga tameke moshilando shaBabilonia. Omalongo ngoka oga taandele nevi alihe. Pashiholelwa, aantu mboka ya kala muBabilonia oya li yi itaala mUukwatatu. Nonena omalongelokalunga ogendji ohaga longo aantu kutya Kalunga omukwatatu. Ombiimbeli otayi longo aantu kutya oku na owala Kalunga kashili gumwe, Jehova. Omanga Jesus Omwana. (Johannes 17:3) Aantu mboka ya kala muBabilonia oya li wo yi itaala kutya oshitopolwa shimwe shomuntu ohashi tsikile okukala nomwenyo konima ngele a si. Aniwa oshitopolwa shoka ohashi kala tashi mono iihuna moheli. Shoka kashi shi shoshili. — Tala eyelitho eti-14, eti-17 neti-18.
18 Kalunga okwa popi kutya masiku omalongelokalunga giifundja otaga ka hanagulwa po. (Ehololo 18:8) Mbela owu uvite ko kutya omolwashike wa pumbwa okuza mo nziya momalongelokalunga giifundja? Jehova Kalunga okwa hala wu shi ninge manga kuyele. — Ehololo 18:4.
Ngele to longele Jehova pamwe noshigwana she, oto ka kala oshilyo shuumwayinathana womuuyuni awuhe
19. Uuwanawa wuni to ka mona, ngele owa tokola wu longele Jehova?
19 Ngele owa tokola wu ze mo melongelokalunga lyiifundja wu ka longele Jehova, yamwe yomookuume koye naakwanezimo itaye ke shi uva ko. Otashi vulika nokuli ya dhigupaleke onkalo yoye. Dhimbulukwa aluhe kutya Jehova ite ku thigi po. Oto ka ninga oshilyo shuumwayinathana waantu omamiliyona muuyuni awuhe mboka ye holathane lela. Oto ka kala wu na etegameno lyokukala nomwenyo sigo aluhe muuyuni uupe waKalunga. (Markus 10:28-30) Otashi vulika konima yethimbo yamwe yomwaamboka ya li inaaya hokwa etokolo lyoye lyokulongela Jehova ya ka konakone Ombiimbeli.
20. Omolwashike sha simana okulongela Kalunga momukalo ngoka a hokwa?
20 Masiku Kalunga ota ka hanagula po aakolokoshi ayehe. Uukwaniilwa we otawu ka pangela ombanda yevi. (2 Petrus 3:9, 13) Itashi ka kala tuu ethimbo ewanawa! Osha simana ano wu ninge po sha ngashingeyi, opo wu longele Kalunga momukalo ngoka a hokwa.