Jesus ta longo aalongwa ye okugalikana

Aafarisayi oya li haya ningi kehe shimwe netompelo lyokwiimonikitha kaantu. Ngele oya longo sha oshiwanawa, yalwe oye na oku shi tseya. Oya li haya galikana momapandaanda, opo kehe gumwe e ya mone. Aafarisayi oya li yi ilonga omagalikano omaleeleka momutse, noye hole oku ge endulula moosinagoga nopoompagiila dhoondjila, opo yu uvike kaantu. Onkee ano, aantu oya li ya kumwa, sho Jesus e ya lombwele ta ti: ‘Inamu galikana ngaashi Aafarisayi. Ohaya dhiladhila kutya Kalunga ota fuulwa kokupopyagana kwawo, ihe hasho. Egalikano oshinima shi li pokati komuntu naJehova. Inamu popya iinima ya faathana lwiikando. Jehova okwa hala wu mu lombwele shoka shi li momutima gwoye.’

Jesus okwa ti: ‘One omu na okugalikana ngeyi: “Tate yetu, ngu u li megulu: Edhina lyoye nali yapulwe, Oshilongo shoye nashi ye, Ehalo lyoye nali gwanithwe kombanda yevi wo ngaashi megulu.”’ Okwe ya lombwele wo ya galikane kombinga yiikulya yawo yesiku kehe, yiinima yawo yopaumwene noya dhiminwe po omayono gawo.

Jesus okwa ti: ‘Kaleni nokugalikana aluhe. Kaleni nokwiindila Tate yetu, Jehova, e mu pe iinima iiwanawa. Omuvali kehe oha kala a hala okupa omwana iinima iiwanawa. Ngele omumwoye ote ku indile oshikwiila, mbela oto ke mu pa emanya? Ngele okwe ku indile ohi, mbela oto ke mu pa eyoka?’

Jesus okwa yelitha oshitsa shoka a ti: ‘Ano ngele ne omu shi okupa oyana yeni omagano omawanawa, Ho gwomegulu naye ote ke ku pa ombepo ondjapuki. Shoka wa pumbwa okuninga oku yi mu indila.’ Mbela oho landula ngaa omayele gaJesus? Oho galikana kombinga yiinima yini?