Euvitho lyokOndundu

Konima sho Jesus a hogolola aayapostoli 12, okwa zi ko kondundu. Okwe ya mpoka pwa li ongundu onene yaantu, mboka ya li ya za kuGalilea, kuJudea, kuTiro, kuSidon, kuSiria nokiilongo yi li handiyaka yaJordan. Oya li ye eta aavu mboka taya hepekwa komikithi dhi ili nodhi ili nokoompwidhuli. Jesus okwe ya aludha ayehe. Okwa kuutumba popepi nondundu, e ta tameke oku ya longa. Okwa yelitha shoka tu na okuninga, ngele otwa hala okukala ookuume kaKalunga. Otu na okukala tu shi kutya otwa pumbwa Jehova nokwiilonga okukala tu mu hole. Mbela otatu vulu ngaa okukala tu hole Kalunga, ngele katu hole aantu ooyakwetu? Aawe. Otu na okukala nombili naantu ayehe noku ya ningila uuwanawa kutya nduno oye tu tonde.

Jesus okwa ti: ‘Inamu kala mu hole owala ookuume keni. Omwa pumbwa wo okukala mu hole aatondi yeni nokudhimina po aantu tashi zi komutima. Ngele opu na ngoka mwa ningathana naye, inda kuye e to mu pe ombili. Shoka wa hala aantu ye ku ningile, osho ya ningila wo.’

Jesus okwa pe wo aantu omayele omawanawa kombinga yiinima yopamaliko. Okwa ti: ‘Osha simana unene okukala kuume kaJehova, pehala lyokukala niimaliwa oyindji. Omufuthi ota vulu okuyaka po iimaliwa yoye, ihe kapu na ngoka ta vulu okuyaka po uukuume woye naJehova. Inamu kala tamu ipula unene kutya otamu li shike, otamu nu shike nenge otamu zala shike. Taleni kuudhila. Kalunga oha sile oshimpwiyu uudhila wu kale wu na iikulya ya gwana. Okukala to ipula unene itaku vulu nando okugwedha ko kuule womasiku gokukalamwenyo kwoye. Kala wu shi kutya Jehova oku shi shoka wa pumbwa.’

Ongundu yaantu kaya li yu uva nale omuntu ta popi ngaashi Jesus. Aawiliki yomalongelokalunga yawo kaya li ye ya longa iinima mbyoka. Omolwashike Jesus a li e shi okulonga aantu nawa? Omolwaashono kehe shimwe a li a longo aantu osha za kuJehova.