Omolwashike Hashi Kwata Olule Okuhulitha Po Ompaga?

KONYALA oomvula 6 000 dha piti po uunamapangeloagehe waKalunga kawa li wu ninwe ompata yasha. Sho ye a mana iilonga ye iikumithi yeshito, “Kalunga okwa tala ayihe kwe yi longo, ya longekeka.” (Genesis 1:31) Opo nduno okwa kutha ethimbo ele ‘lyokuvululukwa’; dhoshili, hamolwashoka ye a li a vulwa panyama. Pehala lyaashono, ye okwa vululukwa mondunge kutya ye okwa hulitha po iilonga ye yeshito kombanda yevi, nokwa li e na uushili kutya ompangela ye ombwanawa oya li tayi ka kala yi na ompolo thiluthilu kwaashino.—Genesis 2:1-3; Jesaja 55:11.

Ompangela ndjono mbela oya li yashike? Jehova okwa tula aantu yaali yotango mehala hali ithanwa oshikunino shaEden. Oshinakugwanithwa shawo shotango osha li okutonatela ehala lyawo olyo oparadisa niinamwenyo yamo oyindji yomaludhi gi ili nogi ili. Yo oya li wo ye na okumona aanona noku ya tekula. Konima yethimbo, sho uukwanegumbo wawo wa koko, yo oya li ye na okutamununa mo Oparadisa sigo okooha nooha dhevi mokuvulika kelombwelo lyaKalunga ‘okupangela evi.’ Ano lwahugunina evi olya li tali ka kala ehala ewanawa lyokukala, lyu udhithwa nuukwanegumbo u na elago nowa hangana mboka tau longele He gwawo gwomegulu. Osho sha li ompangela yaKalunga yopetameko.—Genesis 1:27, 28; 2:8, 15, 20-22.

Mbela Adam naEva oya li taa ka kala ye na ombinga megwanitho lyompangela ndjika onenenene sigo opehulilo? Osha li shi ikwatelela kwaashono kutya yo oya li taa ka katuka taa tsu kumwe nayo mokuvulika kOmushiti gwawo. Evuliko lyawo kalya li tali ka kala lyopauposi nopwaahe na okudhiladhila kwasha. Yo oya li ya pewa ehalo lya manguluka, molwashoka Kalunga okwa li a hala ye mu longele nolupandu talu zi komutima. Shi li edhimbulukitho li wetike lyuuthemba wuunamapangeloagehe we, ye okwa ningi po emakelo epu. Yo oya li taa vulu okulongitha ayihe mbyoka ya pewa moshikunino, kakele kashimwe. Omwa li omuti gwiiyimati ngoka Kalunga a ti kombinga yagwo: “Shimpa to gu li, u na okusa.”—Genesis 2:16, 17.

Oohapu ndhika otadhi tu lombwele kutya Adam naEva kaya li ya shitwa ya kale taa kulupa nokusa. Yo oya li owala taa ka sa ngele yo taa kala inaaya vulika kelombwelo ndika lya nathangwa. Andola Adam naEva oya kalele nokuvulika kuKalunga, ando yo oko ye li sigo onena ye na omwenyo kombanda yevi ye li aakuluntu yuukwanegumbo wokombanda yevi alihe woluvalo lwu udhithwa.—Tala ekotampango mEpsalmi 37:29, OB-1986.

Ihe gumwe gwomaayengeli yaKalunga, ngoka ngashingeyi ti ithanwa Satana, okwa tameke okugandja uusama komukalo gwaKalunga gwokupangela. Ye okwa lombwele Eva a lye oshiyimati shi indikwa, nokwa popi nekoto kutya ngele ye okwa kala a manguluka ko kepangelo lyaKalunga, ye ota ka kala e li nawa. Ihe einyengotompelo lyaSatana lyoshili olya li ehalo okukala kalunga koluvalo lwaantu yomonakuyiwa.—Genesis 3:1-5; Mateus 4:8, 9; Johannes 8:44.

Molwashoka Jehova okwa pele aantu yotango ayihe mbyoka yo ya li ya pumbwa, Eva okwa li e na okugamena epangelo lye nokwe ekelahi omadhiladhilo giifundja gaSatana. Ihe shi yemateka, ye okwa teya ompango yaKalunga. Konima Adam okwa hogolola okugama kombinga yomukiintu gwe mondjila ye ya nika uugoya. Mokuninga ngawo, aaihokani mbano ye na ondudhi nosho wo Satana, oya ningile Kalunga oshipotha, nongaaka ompata kombinga yuunamapangeloagehe wopakalunga oya holoka po.—Genesis 3:6.

Okukandula Po Ompata Ya Simana nOonkondo Opwa Pumbiwa Ethimbo

Jehova okwa li ta vulu okuhanagula po aanashipotha yatatu naanaa pethimbo opo tuu mpono. Ihe kasha li ando sha yamukula thiluthilu omapulo ngoka ge ya po omolwoshipotha shawo. Mbela omuntu okwa li ta vulu okwiipangela nawa ye mwene nokaapu na Kalunga? Mbela osha li uuyuki kuKalunga okupula okuvulika kuunamapangeloagehe we? Mokutala kwaashono sha longwa kaaihokani yotango, opwa thikama wo epulo: Mbela kehe gumwe okwa li ta vulu okuhogolola okulongela Kalunga nehalo ewanawa nopwaahe na okwiihola mwene—nokuli sho Satana e ya makele? (Job 1:7-11; 2:4) Osha li tashi ka kutha ethimbo okuyamukula omapulo ngaka. Osha li wo tashi ka kutha ethimbo okuhanagula po iizemo mbyoka ye etwa koshipotha shopetameko nokugwanitha ompangela yaKalunga okuninga evi oparadisa ndjoka tayi kalwa kaantu kaaye na oondjo. Tse otwa tegelela natango opo oompata ndhika dhi kandulwe po thiluthilu.

Metsokumwe nompango ye, Kalunga okwa li a kutha Adam naEva uuthembahenda wokukala nomwenyo sigo aluhe. Yo kaya li we ya gwana okukala ye na ombinga megwanitho lyompangela ye onenenene. Ihe manga yo inaaya sa, yo oya li ya pitikilwa okumona aanona noku ya tekula. Dhoshili, Adam naEva oya li itaaya vulu okupa oluvalo lwawo omwenyo kaagu na oondjo. (Aaroma 5:12) Ihe nonando oluvalo lwawo ndoka lwa landula ko olwa li inaalu udhithwa nolwa valelwa muulunde, aantu oyendji oya li ye na ompito okuulika mpoka yo ya thikama shi na ko nasha nompata onene kombinga yuunamapangeloagehe.

Ompata Tayi Kandulwa Po

Ongiini mbela Kalunga ta ka kandula po ompata ndjika ya guma uunamapangeloagehe we? Omapulo ngoka ga holoka po muEden oga yamukulwa nale pamukalo gumwe. Oomvula omayuvi dhondjokonona yomuntu odhe shi ulike naanaa sha yela mo kutya epopyo lyaSatana kutya Eva okwa li ta ka kala nawa ngele a manguluka ko kuKalunga olya li lyiifundja. Elelo lyomuntu ndyoka kaali na ko nasha naKalunga, olya kala aluhe inaali pondola sha. Ngaashi Ombimbeli tayi ti: “Omuntu ta pangele omukwawo noku mu pangelela oshiponga.”—Omuuvithi 8:9.

Mepingathano naashino, opu na iinima oyindji iiwanawa mbyoka ya ningwa pethimbo lyoomvula odhindji okuza sho Adam naEva ya yono. Aantu oyendji oyu ulike okwaahateya uudhiginini kuunamapangeloagehe waJehova, “nOmuna gwOmuntu,” Jesus Kristus, oye oshiholelwa oshiwanawa mwaashika. (Mateus 20:18; Aaheberi 11:1–12:3) Mboka taa gwanitha oompango dhaKalunga notaa zimine ko uunamapangeloagehe we, oya mono kutya osho lelalela ondjila ombwanawa. Yo oya mono kutya eyele olyoshili ndyoka tali ti: “Eyambeko lyaJehova—olyo tali yambapaleke, noita gwedha ko nando uudhigu washa.” (Omayeletumbulo 10:22, NW) Kakele kaashono, omolwesiloshimpwiyu sheyumuko yo otaa ka kala ye na ombinga megwanitho lyompangela onenenene yaKalunga.—Johannes 5:28, 29.

Jehova ina dhimbwa ompangela ye yopetameko. Mboka taye ekelehi uunamapangeloagehe we, itaa ka pitikwa okupangela aluhe kombanda yevi, nOmbimbeli otayi londodha kutya Kalunga ote ke ya katukila mbalambala onkatu. Otatu lesha: “Oshoka ondjahi yaKalunga tayi holoka megulu, yi adhe [“uukaanakonashanakalunga auhe,” NW].” (Aaroma 1:18) Sho Kalunga te ku ulika ondjahi ye monakuyiwa—ndjoka Ombimbeli tayi yi luku Harmagedon—pwaahe na epataneko lyasha, otashi ku ulika kutya ye oko e li lela. Oomboka owala taya zimine ko uunamapangeloagehe we, taa ka hupa moshiningwanima shoka. “Aayuki ohaa ka kala moshilongo, naakaanambudhi ohaa kalele mo; ihe aakaanakonashanakalunga taa tudhwa moshilongo, naaniifundja oyo taa fulwa mo.”—Omayeletumbulo 2:21, 22.

Ompata Onene naNgoye

Okutala kuushili mbuka, kehe gumwe gwomutse—ngaashi Adam naEva—oku na okuninga ehogololo. Mbela tse otatu ka kambadhala okukala twa manguluka ko kuKalunga? Nenge otatu ka vulika kuunamapangeloagehe we? Dhimbulukwa, ndjika oyo ompata ya simana ndjoka ye ku taalela nena. Oompata dhilwe, nando onadhi kale dha simana shi thike peni, dho odhi na ko nasha nomwenyo gwoye gwongashingeyi. Ompata ndjika oyi na sha nomwenyo gwaaluhe. Etokolo ndyoka to ningi otali ka guma onakuyiwa yoye yaaluhe.

Ongiini nee mbela ngoye to vulu okuulika kutya owa taamba ko uunamapangeloagehe waKalunga? Omokukonakona Oohapu dhe, Ombimbeli, nokulalakanena okuvulika kehalo lye pamwe nAakriste yalwe yashili. (Sefanja 2:2, 3) Ngele to shi ningi, oto ka kala u na etegameno lyenyanyu okumona egwanitho lyompangela yaKalunga onenenene. Ngoye oto ka mona nkene euvaneko ndika ekumithi tali gwanithwa: “Oku na okathimbo kowala, omukeenakonashanakalunga nokee po we . . . Aaneifupipiko otaa ka thigulula oshilongo [“evi,” OB-1986] e taa kala nokunyanyukilwa ombili oyindji.” (Epsalmi 37:10, 11) Elaleko nuuyamba ekumithi oli thike peni kwaayehe mboka tayi igandja kuunamapangeloagehe waKalunga! Etompelo lya kola oli thike peni okuninga etokolo lyoondunge moshinima shika sha simana noonkondo!

Andola Adam naEva oya vulikile kuKalunga, ando oko ye li kevi sigo onena.

Oyendji otaa ka futwa nomwenyo gwaaluhe moparadisa yokevi ngele yo tayi igandja kuunamapangeloagehe waJehova.