Esiku lyaKalunga lyOnkone

NGAASHI twe shi mono nale moshileshomwa sha tetekele, opu na omatompelo gi ili nogi ili molwashike okukwatela onkone kwa puka kutse. Okwa puka molwashoka ihaku kandula po sha shili. Okwa puka molwashoka ohaku indjipaleke uutondwe pehala lyokutunga po uukuume. Nokwa puka molwashoka oku li oshiponga komuntu ngoka e na omadhiladhilo gokukwatela onkone.

Ihe etompelo lya simana molwashike okukwatela onkone ku li kwa puka kaantu, otali monika moohapu dhaMoses kuIsrael: “Omuwa, Kalunga koye, Kalunga omunamutimahenda.” (Deuteronomium 4:31) Molwashoka Kalunga oku na ohenda, tse otu na okukala tu na ohenda ngaashi ye. Jesus okwa ti kaalanduli ye: “Kaleni mu na ohenda, ngashika Ho yeni e na ohenda.”—Lukas 6:36.

Nando ongaaka, Ombimbeli otayi hokolola wo Jehova oye ‘Kalunga komageyelo.’ (Epsalmi 94:1) Omuprofeti Jesaja okwa popi kombinga ‘yomumvo gwesilohenda lyOmuwa,’ nokombinga ‘yesiku lyonkone yaKalunga ketu.’ (Jesaja 61:2, KB) Ongiini mbela Kalunga ta vulu okukala e na ohenda nosho wo ha kwatele onkone? Nongele otu na okulandula ohenda yaKalunga, omolwashike mbela itaatu vulu okukwatela wo onkone ngaashi ye?

Okuyamukula epulo lyotango: Kalunga oku na ohenda molwashoka ye oku hole aantu, noha dhimine po olundji ethimbo ele ngaashi ye ta vulu mokupa aantu ompito ya lundulule onkalamwenyo yawo. Aantu oyendji, ngaashi omuyapostoli Paulus, oya taamba ko ohenda ndjika. Ihe Kalunga oha kwatele wo onkone—mondunge kutya ye okwa hala uuyuki u gwanithwe—oshoka ohenda ya tya ngaaka oya ngambekwa wo. Ngele yamwe ohayu ulike kutya yo itaa ka lundulula nando onkalamwenyo yawo, Kalunga ote ke ya pangula pethimbo ndyoka lyi ithanwa esiku lye lyonkone.

Eyamukulo kepulo etiyali: Aawe, tse katu shi aayuki nokukala tatu kwatele onkone molwashoka Kalunga he shi ningi. Jehova omuyuki u udhithwa. Aantu inayu udhithwa. Kalunga oha tala oombinga adhihe dhoshinima noha ningi aluhe etokolo lyopauyuki. Itaku vulu kwi inekelwe kutya natse otatu ka longa sha faathana. Osho molwashoka Paulus a londodha: “Aaholike, one yene inamu galulila omuntu uuwinayi, aawe, peni ondjahi yaKalunga eha, oshoka okwa nyolwa: Egeelo olyandje, ongame tandi futu, kwa ti Omuwa.” (Aaroma 12:19) Molwuuwanawa wetu yene, okushunitha uuwinayi otu na oku ku ethela miikaha yaJehova.

Omolwashike Esiku lyOnkone?

Nando ongaaka, Ombimbeli otayi zimine pomahala ogendji kutya aayoni mboka inaayi ipa uusama oye na okugeelwa. Pashiholelwa, omuyapostoli Paulus okwa hunganeke kutya Kalunga, mokupitila muJesus, ota ka ‘geela mboka inaa tseya Kalunga noitaa vulika kevaangeli lyOmuwa gwetu Jesus.’ (2 Aatessalonika 1:8) Tse otu na omatompelo omawanawa okutaamba ko oohapu ndhoka twa mana mo. Omolwashike mbela?

Shotango, aantu oyendji nena kaye na ko nasha noompango oondjuki dhOmushiti, omolwashoka taa tsikile nokudhina uunamapangelo we auhe. Kutya nee otaa ti oyi itaala Kalunga nenge aawe, omikalo dhawo otadhi ulike sha yela kutya yo oyu uvite kutya yo kaye na oshinakugwanithwa shasha komeho gaKalunga. Oohapu dhomupsalmi otadhi opalele kaantu ayehe ya tya ngaaka: “Omukolokoshi ota vulu ngiini okudhina Kalunga, a tye: ‘Kalunga ita geele ndje’ ”? (Epsalmi 10:13, OB-1986) Dhoshili, Jehova ita ka pitika a shekwe komukalo nguka sigo aluhe. Nonando oye Kalunga kohole, ye oye wo Kalunga kuuyuki. Ota ka pulakena komagalikano gaamboka ye na ko nasha shili nuuyuki: “OMUWA, geela aakolokoshi mbo! Dhimbulukwa mboka taa hepekwa!”—Epsalmi 10:12, OB-1986.

Natango, aantu aakaanompango oyo haa yonagula evi hoka tse tu li. Yo ohaa nyateke ombepo, evi nomeya; oyu udhitha evi nokwaahenuuyuki nononyanya. Nohaa gongele iilwitho oyindji yopachemi, yopakerna nayilwe iidhipagi okuyonagula okukala po kwaantu. Okukatuka onkatu kwaKalunga okwa pumbiwa okushilipalekela aantu mboka haa vulika onakuyiwa ya gamenwa. (Ehololo 11:18) Okukatuka onkatu huka oko nkoka Jesaja ti ithana esiku lyonkone.

Esiku lyaKalunga lyOnkone Otali Ke Eta Shike?

PaVine’s Expository Dictionary of Old and New Testament Words oshitya onkone mOmanyolo gOshigreka, ngele tashi longithwa mekwatathano naKalunga, otashi ti lelalela “ ‘shoka tashi zi muuyuki,’ hangaashi okukwatela onkone kwaantu olundji ku li, molwashoka owala yu uvite ya ningwa nayi owina nenge ya geyithwa owina.” Ano okukwatela onkone kwaKalunga aatondi ye itaku ka kala ethimbo lyetiko lyombinzi itaali vulu okupangelwa, ngaashi oontamanana pokati kaantu. Ombimbeli otayi tu lombwele: “Jehova oku shi okuhupitha aayuki momamakelo, ihe oha pungulile aalunde esiku lyepangulo ya ka yonwe po.”—2 Petrus 2:9, NW.

Aapiya yaKalunga oya tegelela esiku lyaKalunga lyonkone olyo ethimbo uuna omikalo omiwanawa tadhi ka yukipalithwa naayuki taa ka hupithwa methininiko lyaakolokoshi. Itashi ti kutya yo otaa kala ye na omadhiladhilo okukwatela onkone. Ombimbeli otayi londodha: “Ngoka ta nyanyukilwa oshiponga shamukwawo, ita ka kala inaa geelwa.” (Omayeletumbulo 17:5, OB-1986) Mepingathano naashino, yo otaa kala ye na ohenda nolukeno, nohaye ethele etokolo kehe li na ko nasha nokushunitha uuwinayi miikaha yaKalunga.

Dhoshili, kashi shi oshipu komuntu ngoka a geya okukatuka ngaaka. Ihe otashi vulika, noyendji oye shi ninga nale. Pashiholelwa, sho Pedro a li omunona, okwa li ihu uvu ko nolundji okwa li ha dhengwa komumwayina omukuluntu gwomumati. Ano ye okwa putuka e na ekuni, nolundji okwa li ha mono iihuna kopolisi, nondjahi ndjono a kala e nine mumwayina okwe yi pitithile mo omukiintu gwe naanona ye. Lwahugunina okwa pulakene kugumwe gwomOonzapo dhaJehova nokonima okwa tameke okukonakona Ombimbeli. “Kekwatho lyaJehova,” ye ta ti, “onda lunduluka, nongashingeyi, pehala lyokukondja naantu, otandi ya kwathele ndi li Omukriste omukuluntugongalo.” Kekwatho lyOmbimbeli nombepo ondjapuki yalwe wo oyendji oya lunduluka shi na ko nasha nuutondwe nenge okukwatela onkone noya ninga aantu mboka hayu ulike ohole neidhidhimiko kuyalwe.

Ngoye Oto Ka Ninga Ngiini?

Ngele tatu kala tu shi kutya esiku lyaKalunga lyonkone oli li popepi, otashi ke tu kwathela okumona uuwanawa mokwiidhidhimika kwaJehova. Ihe ompito yoku shi ninga itayi kalelele. Esiku ndyoka oli li pokuya. Omuyapostoli Petrus oku ulike molwashike inaali ya nale: “Omuwa ina sa uunye okugwanitha euvaneko lye, ngaashi yamwe haa dhiladhila, okwa sa uunye aniwa, aawe, okwe mú tala onteni, oshoka ina hala, ku kane nando gumwe, aawe, ayehe yi itedhulule.”—2 Petrus 3:9.

Ano osha simana unene opo tu ilongekidhile ngashingeyi esiku lyaKalunga lyokugeela mokukonakona Omanyolo nokulongitha omapukululo gamo. Otashi tu kwathele okupulakena koohapu dhomupsalmi: “Politha ondjahi, ngu e ethe ongeyo, ino handuka! Otaku ku yonitha. Oshoka aadhudhu otaa ka vudhwa mo sheke, ihe oomboka yi inekela Omuwa, otaa ka lala [evi, KB].”—Epsalmi 37:8, 9.

[Ethano pepandja 7]

Konima yesiku lyaKalunga lyonkone, ‘mboka haa inekele Omuwa otaa ka lala evi’