Okukwatela Onkone Okwa Puka Mbela?
Mondjila onene yiihauto mIilongohangano, oshihauto shimwe inashi endelela okuya kooha dhondjila opo shilwe shi vule okupita po. Omuhingi gwoshihauto oshitiyali okwa kwatele shiyaka onkone mokuumba osheenditho shoka sha li mondjila ye, e ta dhipaga nakweenda mo ngoka kee na ondjo yasha.
Omukadhona omugundjuka okwe ethithwa okukala nombinga kwe muudhano wosikola komukadhona gulwe. Okwe mu kwatele onkone mokuhokololela kuume omumati gwomukadhona ngoka kutya omukadhona oku na ekwatathano nomumati gwokosikola yilwe. Ano okwa nyateke ekwatathano pokati komukadhona ngwiyaka nakuume ke omumati.
AANTU oyendji ohaa dhiladhila kutya oye na uuthemba wokukwatela onkone ngele yu uvite kutya oya ningilwa nayi owina. Momukalo gumwe nenge gulwe, yo ohaa landula epopyo: “Ino geya, pehala lyaashono mu ninga owala ngaashi e ku ningile.” Nena, ohole yokuhola ooyakwetu oya shonopala nombepo yokushunithila uuwinayi oyi indjipala.—Mateus 24:12.
Ihe oho tala ko ngiini okukwatela onkone? Ngele owi itaala Ombimbeli, ngiika ou wete kutya okukwatela onkone okwa puka shili. Ihe molwashoka otu li muuyuni uuwinayi, ngiika ou wete kutya edhiminopo, ndyoka tali kondjithathana nokukwatela onkone, olundji ihali kwatha sha. Oto ki inyenga ngiini mbela ngele to fundjwa nenge to yugwa? Oho kwatele onkone mbela ngele gumwe kee na ko nasha nangoye nenge te ku popi paantu yalwe noku ku shundula? Ngoye oho kwatele onkone nenge oho dhimine po?
Iikala yOkukwatela Onkone Ohayi Ehameke
Dhoshili, omayonagulo agehe inaga kwata miiti shi thike pamwe. Ihe aantu oyendji mboka ye hole okukwatela yamwe onkone, inaya yugwa nenge ya ponokelwa. “Omayono” ngoka ga tumbulwa petameko lyoshileshomwa shika omashona noonkondo, nonando oga li omanene momadhiladhilo gaamboka ya tokola okukwatela onkone.
Ombimbeli otayi ti kutya katu na okukala tu na iikala yokukwatela onkone. Omayeletumbulo 24:29, OB-1986, otaga londodha: “Ino tya: ‘Ngaashi a ningile ndje, osho tandi ke mu ningila.’ ” Omolwashike mbela? Okutumbula owala oshinima shimwe, iikala ya tya ngaaka ohayi ehameke pamaiyuvo nopalutu. Omadhiladhilo gokukwatela onkone otage ku kutha ombili nohaga piyaganeke omadhiladhilo omawanawa. Dhiladhila konkundana ndjika: “Aanahambo yaali oyi iyahele okusa manga ya li kehe gumwe moshihauto she shombaki molugumbo lwokuthikama iihauto, nosho ngeyi oya hulitha po oontamanana ndhoka dha kala pokati kawo uule woomvula 40 nodha li dha tameke manga ya li aanona.” Dhiladhila owala kwaashino: omadhiladhilo gaalumentu mbaka yaali kaga li tuu ge na uuzigo wombepo ombwinayi noyokwiikwatela onkone uule wonkalamwenyo yawo ayihe!—Omayeletumbulo 14:29, 30.
Etompelo lilwe natango molwashike omuntu kee na okukala e na ombepo yokukwatela onkone, olyo kutya aantu mboka haa ningi omapuko—nokuli mboka haa ningi omapuko ga kwata miiti—ohaa vulu okulunduluka. Pashiholelwa, omuyapostoli Paulus nale okwa li a “panda okudhipagwa” kwomulongwa Stefanus ‘nokwa li u udha uutondwe okutonda aalongwa yOmuwa nokwa hala oku ya dhipaga.’ Ihe okwa lunduluka. Oomvula dha piti konima yaashino omuyapostoli Petrus—ngoka onkalamwenyo ye ya li ya tulwa moshiponga kuPaulus pethimbo ndika lya piti—okwe mu ithana “Paulus, omumwameme omuholike.” (Iilonga 8:1; 9:1, OB-1986; 2 Petrus 3:15) Aakriste oya li taa vulu okukwatela Paulus onkone, unenetuu sho a li a tegelela, kee wete ko muDamasko. (Iilonga 9:3-15) Ando inashi kala tuu epuko li yemateka noonkondo!
Omolwashono ano Paulus a li ta vulu okulondodha mAaroma 12:20: “Ihe omutondi gwoye ngele a si ondjala, mu pakela po, ngele a si enota, mu pa a nwe.” Omolwashike mbela? Omolwashoka ngele otatu kwatele omutondi gwetu onkone, otatu kolondeke iikala ye notatu kukutike uutondwe pokati ketu naye. Ihe ngele otatu ningi nawa ngoka e tu hindi nenge e tu uvitha nayi, otatu vulu okunengeneka iikala ye nokuninga ookuume kaangoka a li nale omutondi gwetu.
Ngele tse ohatu zimine omapuko getu, otashi tu kwatha wo okusinda uutondwe mboka tau fala sigo omokukwatela onkone. Omupsalmi okwa pulile: “Omuwa, ongoye ngele to kala nokudhimbulukwa oondjo, Omuwa, olye ta vulu okukala po?” (Epsalmi 130:3) Tse atuhe otu uvitha nale yamwe nayi nenge twe ya hinda. Katwa li mbela twa nyanyukwa sho inaaya kambadhala oku tu ninga ngaashi twe ya ningile? Katu na mbela okukala wo twi ikelela koshinima sha tya ngaaka? Jesus okwa londodha: “Shaa shoka mwa hala, aantu ye mu ningile, osho ya ningileni wo.”—Mateus 7:12.
Dhoshili, Ombimbeli otayi ti: “Tondeni uuwinayi.” (Epsalmi 97:10; Amos 5:15) Ihe itayi ti tu tonde mboka haa longo uuwinayi. Dhoshili, Jesus okwe tu lombwele: “Holeni aatondi yeni, galikaneneni aahepeki yeni.” (Mateus 5:44) Ngele otatu shunitha uuwinayi muuwinayi, otatu landula iikala yanakulonga uuwinayi. Eyeletumbulo lyonale otali ti: “Ino tya: Uuwinayi otandi u geyele; tegelela Omuwa, oye note ku kwatha.” (Omayeletumbulo 20:22) Iikala yoondunge oyi thike peni! Kashi shi tuu oshiwanawa noonkondo okuulika kutya tse aasindani mokukondjitha emakelo lyokulandula oshiholelwa shoonakuyona.—Johannes 16:33; Aaroma 12:17, 21.
Okugeelwa—Okulye?
Dhoshili, omayono gamwe oga kwata miiti noonkondo shi vulithe okutuka omuntu nenge oku mu yemateka. Ongiini mbela ngele tse oonakulongelwa omuyonena? Dhoshili, molwuuyuki, otu uvite kutya opu na okuningwa sha. Ihe oshike nduno? Momihoko dhimwe olundji aantu ohaya katukile iinima onkatu kuyo yene noku yi kwatela onkone. Ihe aantu ya tya ngaaka olundji oshe ya fala mokutopagulwa kuutondwe. Nena, oompango dhaKalunga nosho wo odhindji dhomoompango dhaantu ihadhi pitika aantu ya kwatele onkone iilonga yomuyonena kuyo yene, nopu na etompelo ewanawa. Elongitho lyoonkondo lyopaumwene lya tya ngaaka ohali fala owala melongitho lyoonkondo enene.
Mbela nakulongelwa omuyonena ne ethe owala oshinima shi kale ngawo noitaa ningile sha nando okuningwa nayi owina hoka? Aawe, oto vulu okuninga po sha. Ngele twa ningwa nayi nenge omaliko getu ga yonagulwa, opu na aanamapangelo hoka tatu vulu okuuka. Oto vulu okwiithana opolisi. Kiilonga oto vulu okuya komutonateli gwiilonga. Kosikola oto vulu okupopya nomukuluntusikola. Osho oshinima shimwe shoka ye lile po—okusila oshimpwiyu uuyuki u gwanithwe. Ombimbeli otayi tu lombwele kutya aanamapangelo yomapangelo oyo “omuyakuli gwaKalunga okugeela ngoka ta yono.” (Aaroma 13:4) Okugwanitha uuyuki, epangelo oli na okulongitha oonkondo dhalyo, noli na okuhulitha po omayono nokugeela oonakuyona.
Dhoshili, oolumwe ohashi kutha ethimbo ele opo uuyuki u gwanithwe. Omunyoli gumwe ngono a vulwa onkalamwenyo okwa ti: “Uuyuki owa fa eshina lyokolutenda ndyoka hali kala aluhe lya tokelwa.” Dhoshili, oolumwe eshina ihali thiki ko nandonando hoka li na okuthika. Aantu mboka ihaaya longo uuyuki otashi vulika ye na oonkondo odhindji nopo nduno epangelo itali vulu oku ya pangela. Nonando ongaaka, omukalo gwopandunge ogo eipangelomwene. Ombimbeli otayi ti: “Egoya oha piitha mo ondjahi ye ayihe, ihe omunandunge ohe yi gundjilike aluhe.”—Omayeletumbulo 29:11, NW.
Okukwatelwa Onkone—Okulye?
Ngele tatu ikelele kokukwatela onkone otashi ke tu etela uuwanawa, notatu vulu okutegelela twa gundjila, tu shi kutya ngele gumwe oku na okugeelwa, Kalunga ote ke shi ninga pethimbo lye lyo opala. Jehova oku shi shi kutya omayono ngoka haga kala inaaga geelwa ohage eta uuwinayi uunene. (Omuuvithi 8:11) Ite ke etha nando mboka ya pwidhuka muukolokoshi ya thininike aantu sigo aluhe. Osho molwashoka omuyapostoli Paulus e tu londodhele: “Aaholike, one yene inamu galulila omuntu uuwinayi, aawe, peni ondjahi yaKalunga eha, oshoka kwa nyolwa: Egeelo olyandje, ongame tandi futu, kwa ti Omuwa.” (Aaroma 12:19) Dhoshili, Ombimbeli otayi popi kombinga yesiku lyOmushiti lyonkone. Esiku ndika lyonkone otali ka kala ngiini? Oolye taa ka kwatelwa onkone kuKalunga? Otatu ke shi kundathana moshileshomwa tashi landula.
[Oshimpungu pepandja 4]
Okupangela omaiyuvo gokukwatela onkone, dhimbulukwa kutya
□ Kalunga oku na ko nasha nuuyuki
□ okukala niikala yokukwatela onkone ohashi ehameke
□ uuna tu na ombili nayalwe olundji ohashi shonopeke omaupyakadhi
□ ogendji gomomayono getu oga dhimwa po
□ aayoni ohaa vulu okulunduluka
□ tse otatu sindi uuyuni mokukondjitha omikalo dhawo