Aantu Oya Pumbwa Shili Messias?
“UUYUNI OWA PUMBWA MESSIAS, OMUKWANEPANGELO OSHO TA TI”
Oshipalanyole shoka osha holokele moThe Financial Post yaToronto, Kanada, mo 1980. Omukwanepangelo ngoka e shi popi oye Aurelio Peccei, omupresidende nomutoti gwosentrumu ya tseyika nawa yokudhiladhila yedhina Club of Rome. PaPost, Peccei okwi itaala kutya “omuwiliki ngoka e na oonkondo dhopombanda—gwopaunongononi, gwopapolotika nenge gwopalongelokalunga—oye owala ta vulu okuhupitha uuyuni komalunduluko agehe gopausosiale nogopamahupilo ngoka ga hala okuhanagula po eputuko.” Ngoye oto dhiladhila ngiini? Uuyuni mbuka ou li shili monkalo ombwinayi noonkondo opo aantu ya kale ya pumbwa Messias? Natu tale owala kuwumwe womomaupyakadhi ngoka ga taalela uuyuni—ondjala.
OMEHO gaali omanene omandjimbi mefano ndjoka li li moshifokundaneki oge ku tala othikikila. Ogo omeho gokanona, olukadhona ndoka kaalu na natango oomvula ntano. Ihe omeho ngaka itage ku imemehitha. Kage na nando eadhimo lyopakanona, kage na nando eiyuvo lyonkumwe yi na elago, kage na nando einekelo kaali na omalimbililo. Pehala lyaashono ogu udha omalimbililo, uuwehame, okwaahenetegameno nondjala. Okanona oke li pokusa kondjala. Uuwehame nondjala oyo owala ke shi okuza kevalo lyako.
Ngiika ngaashi yalwe oyendji, ngoye ito shi hokwa okutala omafano ga tya ngaaka nomolwashono to siikile mbala epandja ndyono. Hamolwashoka waahe na ko nasha, ihe ou uvite eyeme molwashoka ou wete kutya kapu na we ethimbo okuningila sha olukadhona nduka. Uumbati wako wa nanga nokala kako ka fula oyo endhindhiliko kutya olutu lwako olwa tameka nale okwiilya po lwo lwene. Ethimbo ndyoka to tala efano, otashi vulika ko oka sa nale. Shoka tashi shi nayipaleke noonkondo, osho okutseya kutya hako akeke ka ningilwa ngaaka.
Uupyakadhi otau ihana shi thike peni? Oto vulu mbela okudhiladhila aanona omamiliyona 14? Oyendji yomutse itatu vulu; omuyalu omunene noonkondo oku gu mona nomeho getu gopandunge. Dhiladhila nduno okapale hoka ke na omahala gokukuutumbwa kaantu 40 000. Dhiladhila ngashingeyi kutya oku udha komupee aanona—omikweyo dha landulathana, iipala oyindji noonkondo. Naashino oshi li oshidhigu oku shi mona. Ihe uupale 350 wu udha aanona otau ka pumbiwa opo wu adhe pomamiliyona 14. PaUNICEF (Oshiketha shIimaliwa yAanona shokIigwanahangano), aanona oyendji ye thike mpono mboka ye li kohi yoomvula ntano ohaa si omvula kehe miilongo mbyoka ya putuka molwompumbwe yiikulya nokokukwatwa komikithi ndhoka hadhi vulu okukelelwa nuupu. Otashi ti ihe nduno kutya mesiku kehe ohapu si aanona yu udha okapale kamwe! Gwedha ko kwaambaka omwaalu gwaakuluntu mboka ye niwe kondjala, noto mono aantu ayehe kumwe muuyuni auhe emiliyada limwe konyala mboka ye niwe kondjala omolwompumbwe yiikulya.
Omolwashike Ondjala Yi Li Apuhe Ngawo?
Opulanete ndjika ohayi eta ngashingeyi iikulya oyindji yi vulithe mbyoka hayi longithwa kaantu, notayi vulu okweeta oyindji natango. Ihe nonando ongaaka, aanona 26 otaa si momunute kehe omolwompumbwe yiikulya nokomikithi. Momunute ogo tuu ngoka uuyuni otau longitha R5 500 000 mokwiilongekidhila iita. Oto vulu mbela okudhiladhila shoka iimaliwa ayihe mbyono—nenge okatopolwa owala okashuushuu kayo—tayi vulu okuningila aanona mbono 26?
Osha yela kutya ondjala yuuyuni hamolwompumbwe owala yiikulya nenge yiimaliwa. Uupyakadhi owa kwatela mo oshindji noonkondo. Jorge E. Hardoy, omuprofesa gwaArgentinia, okwe shi popi ngeyi: “Uuyuni auhe ou na uupyakadhi waaluhe wokwaahavula okutopolelathana ehekeleko, uuyamba, oonkondo, ethimbo, omakwatho nontseyo naamboka ya pumbwa unene iinima mbika.” Eeno, uupyakadhi kau li kiiniwe yaantu, ihe okaantu yo yene. Otashi monika sha fa olwiho nokwiihola oyo oonkondo ndhoka tadhi pangele mehangano lyaantu. Oshititano shaakalimo yokevi mboka aayamba ohashi mono iiniwe nomakwatho ogendji konyala iikando 60 shi vulithe oshititano shaakalimo mboka aathigona.
Dhoshili, aantu yamwe otaa kambadhala shili okufala iikulya kwaamboka ye niwe kondjala, ihe odhindji dhomoonkambadhala dhawo otadhi imbwa kiinima mbyoka itaaya vulu okukelela. Olundji ondjala otayi hepeke iilongo mbyoka ya hepekwa kiita yopashigwana nenge kekuyunguto, nolwindji omatanga giita ngoka taga kondjithathana otaga keelele opo iipumbiwa mbyoka ya pumbiwa meendelelo yaa thike kwaamboka ye yi pumbwa. Koombinga adhihe mbali oku niwe uumbanda kutya ngele oya pitika iikulya yi thike kaakwashigwana mboka ye niwe kondjala moshitopolwa shomutondi, yo otaa ka palutha aatondi yawo. Nokuli omapangelo otaga ka longitha ondjala oyo oshikondjitho shopapolotika.
Kapu Na Mbela Ekandulopo?
Mupya munene, uupyakadhi womamiliyona ngoka taga si ondjala hawo auke nokuli uudhigu mboka tau hepeke aantu nena. Eindjipalo lyokuhanagula nokugandja uuzigo mevi, ehepeko lyiita yaaluhe mbyoka tayi hanagula po oomwenyo omamiliyona, iilonga yomuyonena mbyoka tayi longwa nelongitho lyoonkondo, uumbanda nokwaahenetegameno shaa mpono, nombepo yokwaahenomikalo ndjoka tayi tsikile nokunayipala naandjoka sha yela kutya oyo tayi eta ogendji gomomaupyakadhi ngoka—uudhigu wuuyuni auhe mbuno otau tsu kumwe notau koleke oshili oyo tuu ndjoka yi igalala kutya aantu itaa vulu okwiipangela nompolo.
Osha yela kutya osho molwashono aantu oyendji ya teka omukumo gwokumona ekandulopo lyomaupyakadhi guuyuni. Yalwe otaa dhiladhila ngaashi Aurelio Peccei, omulongwantu Omuitalia ngoka twa tumbula petameko. Otaa tompathana kutya ngele otapu ka kala ekandulopo, oli na okuza monzo inaayi monika nale—nokuli monzo kaayi shi yopantu. Omolwashono ondungedhiladhilo yamessias ya halika noonkondo. Ihe oshopandunge ngaa okwiinekela mumessias? Nenge etegameno lya tya ngawo olyo owala omaifundjaleko?
[Picture credit line on page 3]
WHO photo ku P. Almasy
[Picture credit lines on page 4]
WHO photo ku P. Almasy
U.S. Navy photo