Ekwatho okuza ‘kuKalunga keidhidhimiko noketalaleko’

OOMVULA 2 000 dha piti, omunyoli gwOmbiimbeli Paulus okwa hokolola Jehova e li “Kalunga keidhidhimiko noketalaleko.” (Aaroma 15:5, OB-1954) Molwaashoka Ombiimbeli otayi tu shilipaleke kutya Jehova iha lunduluka pamwe nethimbo, otatu vulu okwiinekela kutya Kalunga oha gandja natango ehekeleko kwaamboka taye mu longele. (Jakob 1:17) Odhoshili kutya Ombiimbeli otayi holola kutya Jehova oha gandja ehekeleko momikalo dhi ili nodhi ili kwaamboka ye li pumbwa. Dhimwe dhomomikalo ndhika odhini? Kalunga oha gandja oonkondo kwaamboka taye ya kuye megalikano, oku mu pula ekwatho. Ohi inyengitha wo Aakriste yashili ya gandje ekwatho kooitaali ooyakwawo. Jehova Kalunga oha gandja wo omahokololo taga nyanyudha omutima mOohapu dhe, Ombiimbeli, ngoka taga nkondopaleke uunene tuu mboka ya nika oluhodhi omolweso lyokanona kawo. Natu taleni omaludhi ngaka gatatu gehekeleko koolimwe noolimwe.

‘Omuwa okwe mu uvu’

Omukwaniilwa David okwa nyola kombinga yOmushiti gwetu, Jehova a ti: “Aantu ne, inekeleni aluhe Kalunga. Anekeni omaudhigu geni koshipala she, oshoka oye omupopili gwetu.” (Episalomi 62:8) Omolwashike David a li e na einekelo lya tya ngaaka muJehova? David okwa nyola ta popi kombinga ye mwene ta ti: “Onakuhepekwa ngu okwa kugu, Omuwa nokwe mu uvu nokwe mu hupitha momathininiko ge agehe.” (Episalomi 34:7, OB-1954) David okwa li a galikana aluhe kuKalunga e mu kwathe moonkalo dhe adhihe ndhoka a kala mothina, Jehova nokwa kala aluhe noku mu kwathela. David okwa li a tseya kutya Kalunga ote ke mu yambidhidha note mu kwathela i idhidhimike.

Aavali mboka ya nika oluhodhi oya pumbwa okutseya kutya Jehova ote ke ya yambidhidha moluhodhi lwawo olunene, ngaashi naanaa a li e shi ningile David. Otaya vulu okuhedha ‘komuuvi omunene gwomagalikano,’ ye na einekelo kutya ote ke ya kwathela. (Episalomi 65:2, KB) William ngoka a popiwa moshitopolwa sha tetekele, okwa ti: “Iikando oyindji, onda li handi kala ndi uvite kutya itandi vulu okwiidhidhimikila nando onkalamwenyo kaandi na okanona kandje kokamati nonda li nda pula Jehova opo a kwathele ndje. Okwa li a nkondopaleke ndje aluhe nokwa tsu ndje omukumo ndi vule okutsikila nonkalamwenyo.” Sha faathana, ngele to galikana Jehova Kalunga komegulu omunene u na eitaalo, ote ke ku yambidhidha. Dhoshili, Jehova Kalunga otu uvanekele mboka taya kambadhala oku mu longela, ta ti: “Ongame OMUWA Kalunga koye; [nda kwatelela oshikaha shoye shokolulyo, ongame tandi ku lombwele, OB-1954] te ti: ‘Ino tila; otandi ku kwatha.’”—Jesaja 41:13.

Eyambidhidho ndyoka hali gandjwa kookuume kashili

Mboka ya silwa okanona kawo olundji oya pumbwa ethimbo lyokulila ye li oyo ayeke opo ya kale ishewe ya ngungumana. Ihe kashi li pandunge ya kale kokule nayalwe ethimbo ele. Omayeletumbulo 18:1 (OB-1954) otaga ti kutya ‘onakwiiyoolola mo’ olundji oha mono iihuna. Onkee ano, mboka ya nika oluhodhi oye na okukala ya kotoka kaaya ye momwigo gwokwiiyoolola ko.

Ookuume aatilikalunga otaya vulu okugandja ekwatho lya simana kwaamboka ya polimana. Omayeletumbulo 17:17 otaga ti: “Kuume oku na ohole aluhe, nomumwayina okwa valwa, opo a kwathe moluhepo.” Lucy ngoka a tumbulwa wo moshitopolwa sha tetekele, okwa li a hekelekwa kookuume ke yashili sho a li a silwa okamwanamati. Okwa li a popi kombinga yookuume ke mboka yomegongalo a ti: “Oku tu talela po kwawo okwe tu kwathele noonkondo nonando omathimbo gamwe inaya popya sha oshindji. Kuume kandje gumwe okwa li a talele ndje po momasiku ngoka nda li ndi li ongame awike. Okwa li a tseya kutya pegumbo otandi ka kala po tandi lili, nolundji okwa li he ya kungame e tatu lili pamwe. Kuume gumwe okwa li ha dhengele ndje ongodhi esiku kehe okuladhipika ndje. Niishewe yalwe oya li ye tu hiya tu ka lye komagumbo gawo nohaye shi ningi natango.”

Nonando uuwehame uunene mboka aavali haya kala ye uvite ngele ya silwa okanona kawo ihau zi po nuupu, okugalikana kuKalunga nosho wo okweendathana nookuume kawo Aakriste yashili otaku hekeleke shili mboka ya nika oluhodhi. Aavali oyendji Aakriste mboka ya silwa aanona yawo oya mona kutya Jehova oku li pamwe nayo. Eeno, Jehova “ota aludha mboka ye ehamekwa koomwenyo, nota manga iilalo yawo.”—Episalomi 147:3.

Omahokololo gOmbiimbeli ngoka taga gandja ehekeleko

Kakele kegalikano neendathano tali tungu, Oohapu dhaKalunga dha nyolwa odhi li onzo yehekeleko kwaamboka ya nika oluhodhi. Omahokololo gOmbiimbeli otagu ulike kutya Jesus oku na ehalo enene nosho wo oonkondo okukutha po uuwehame waavali mboka ya silwa mokuyumudha nakusa gwawo. Omahokololo ngoka otaga gandja ehekeleko lyashili kwaamboka ya nika oluhodhi. Natu taleni gaali gomahokololo ngoka.

Lukas ontopolwa onti-7 otayi hokolola shoka sha li sha ningwa po sho Jesus a li a tsakaneke aantu taya yi kefumviko moshilando Nain. Aantu oya li taya yi ya ka fumvike omumati a valwa oye awike kuyina omuselekadhi. Ovelise 13 otayi ti: “Omuwa sho a mono omuselekadhi ngoka, okwe mu uvitile olukeno e ta ti kuye: ‘Ino lila we.’”

Olundji aantu ihaya vulu okulombwela omuvali ngoka a silwa omwana kutya ina lila we. Omolwashike Jesus e shi popile? Molwaashoka okwa li a tseya kutya oluhodhi lwayina yomumati ngoka olwa li lu li pokuhula po. Ehokololo otali tsikile tali ti: “Jesus okwa hedha popepi nokwa gumu ontala hoka kwi indwa omudhimba, aaindi noya thikama. Nena Jesus okwa ti: ‘Mugundjuka, otandi ku lombwele, penduka po!’ Omumati ngoka a li a sa, okwa penduka nokwa tameke okupopya. Jesus nokwa ti: ‘Omumwoye oye ngu.’” (Lukas 7:14, 15) Opo tuu mpoka, otashi vulika yina a li ta lili ishewe, ihe oshikando shika okwa li ta lili omolwenyanyu.

Pompito yimwe, omulumentu gwedhina Jairus okwa li e ya kuJesus, nokwa li e mu pula a kwathele okamwanakadhona koomvula 12 hoka ka li taka alukililwa. Nziya konima yokathimbo, opwe ya etumwalaka kutya okakadhona oka sa. Onkundana ndjoka oya li ya yemateke Jairus noonkondo, ihe Jesus okwa li e mu lombwele a ti: “Ino tila, itaala owala.” Jesus sho e ya megumbo lyaandjawo yokakadhona hoka ka sa, okwa yi mondunda moka ka li ka lala. Okwe ka kwata koshikaha nokwa ti: “Mukadhona, otandi ku lombwele, penduka po!” Oshike sha li sha ningwa po? “Mbalambala okakadhona oka penduka po noka tameke okweenda.” Mbela aavali yako oya li yi inyenge ngiini? “Oya kwatwa kehaluko enene” omolwenyanyu. Sho Jairus nomukulukadhi gwe ya li ya papatela okamwanakadhona kawo, oya li ya nyanyukwa noonkondo. Oya li ya fa taya yaguma.—Markus 5:22-24, 35-43.

Omahokololo ngoka gokondandalunde gOmbiimbeli ge na ko nasha neyumuko lyaanona otagu ulikile aavali mboka ya nika oluhodhi nena kutya otaya vulu okukala ye na etegameno lyashike. Jesus okwa ti: “Ethimbo otali ya, uuna oonakusa ayehe mboka ye li moombila, taa ka uva ewi lye. Oyo notaa ka za mo.” (Johannes 5:28, 29) Jehova oku na elalakano kutya Omwana ota ka yumudha mboka ya sa. Aanona omamiliyona ogendjigendji mboka ya sa otaa ka “uva ewi lye” sho ta popi nayo ta ti: “Otandi ku lombwele, penduka po!” Aanona mboka otaye ke enda ishewe notaya ka popya. Nongaashi Jairus nomukulukadhi gwe, aavali yaanona mboka otaya ka “kwatwa kehaluko enene” omolwenyanyu.

Ngele owa silwa omumwoye omumati nenge omukadhona, kala u shi shi kutya Jehova oluhodhi lwoye ota vulu oku lu ninga enyanyu okupitila meyumuko. Opo u mone uuwanawa metegameno ndika ekumithi, vulika kekumagidho lyomupisalomi ngoka ta ti: “Kongeni ekwatho kOMUWA, ne mu mu simaneke aluheluhe. . . . Dhimbulukweni iikumitha mbyoka Kalunga e yi longo.” (Episalomi 105:4, 5) Onkee ano, longela Kalunga kashili Jehova, noku mu longela pamukalo ngoka a hokwa.

Oto ka mona oshizemo shini nziyanziya ngele to ‘kongo ekwatho kOmuwa’? Oto ka mona oonkondo okupitila megalikano kuKalunga, oto ka hekelekwa kesiloshimpwiyu lyopahole lyAakriste ooyakweni yashili noto ka nkondopalekwa kokukonakona Oohapu dhaKalunga. Kakele kaashono, monakuyiwa yi li popepi oto ka mona “iikumitha” mbyoka Jehova ta ka longa omolwuuwanawa woye tau kalelele nowokanona koye hoka ka sa.

[Oshimpungu pepandja 5]

“Eta omukiintu ngoka a silwa aanona ye yaali”

Kehinde naBintu, aaihokani Aanigeria ye li Oonzapo dhaJehova, oya li ya silwa aanona yawo yaali moshiponga shohauto. Okuza ethimbo ndyono, oya kala ye uvite oluhodhi olunene omolwokusilwa huka kunyanyalithi. Nokuli nando ongaaka, okwiinekela kwawo muJehova ohaku ya nkondopaleke opo ya tsikile okulombwela aantu ooyakwawo etumwalaka lyetegameno lyOmbiimbeli.

Aantu yalwe oya li ya mona kutya Kehinde naBintu oya li ya gundjila noye na oonkondo. Esiku limwe omukiintu gwedhina meme Ukoli okwa li a lombwele gumwe gwomookuume kaBintu a ti: “Eta omukiintu ngoka a silwa aanona ye yaali poshikando noku li tu uvitha natango etumwalaka lyOmbiimbeli. Onda hala okutseya kutya oshike she mu nkondopaleke opo i idhidhimike.” Sho Bintu a li a thiki kegumbo lyomukiintu ngoka, meme Ukoli okwa li e mu lombwele a ti: “Onda hala okutseya kutya omolwashike to uvitha natango kombinga yaKalunga ngoka a dhipaga aanona yoye. Kalunga okwa kutha po okamwandjekadhona ka valwa oko akeke. Okuza ethimbo ndyono, inandi kala we ndi na sha naKalunga.” Bintu okwa li a longitha Ombiimbeli okuyelitha kutya omolwashike aantu haya si nomolwashike tatu vulu okukala tu na etegameno kutya oonakusa yetu aaholike otaya ka yumuka.—Iilonga 24:15; Aaroma 5:12.

Konima yaashono, meme Ukoli okwa ti: “Onda li tandi dhiladhila kutya Kalunga oye he etitha eso. Ngashingeyi ondi shi oshili.” Okwa tokola okukonakona Ombiimbeli nOonzapo dhaJehova opo i ilonge oshindji kombinga yomauvaneko gaKalunga.

[Oshimpungu pepandja 6]

‘Onda hala okukwathela, ihe kandi shi kutya nandi ninge ngiini’

Nonando aavali naamwayina yokanona hoka ka sa ohaya kala ya nika oluhodhi olunene, ookuume kawo otashi vulika haya kala ye na omaipulo. Oya hala okuyambidhidha uukwanegumbo mboka ihe oya tila kutya okupopya nenge okuninga iinima ya puka otaku ka nayipika uunene onkalo ndjoka yiehameka. Mpaka opu na omaetopo gamwe gaamboka taya dhiladhila taya ti: ‘Onda hala okukwathela, ihe kandi shi kutya nandi ninge ngiini.’

❖ Ino kala ho yanda mboka ya silwa molwashoka kuu na uushili kutya ou na okupopya shike nenge okuninga shike. Okukala po kwoye otaku ya nkondopaleke nokuli. Mbela oshi li oshidhigu kungoye okudhiladhila shoka to ka popya? Oku ya papatela noku ya lombwela tashi zi komutima kutya naya hekelekwe otaku yu ulikile kutya ou na ko nasha nayo. Mbela owa tila kutya ngele owa tameke okulila, oto ke ya lilitha unene? Ombiimbeli otayi ti: “Lileni pamwe naamboka taa lili.” (Aaroma 12:15) Omahodhi goye otagu ulike kutya nangoye owa nika oluhodhi pamwe nayo, naashoka otashi ya hekeleke.

❖ Tala kutya oshike to vulu oku ya ningila. Mbela oto vulu okutelekela uukwanegumbo mboka iikulya? Oto vulu mbela oku ya yogela iiyaha mbyoka ya ndumbalala? Mbela oto vulu okukala to tumwa kuyo? Ino tya: “Tseyithilii ndje ngele mwa pumbwa sha.” Nokuli nando oohapu ndhoka ou dhi popye tashi zi komutima, ohadhi lombwele aavali oyendji mboka ya silwa kutya owi ipyakidhila unene noito vulu oku ya kwathela. Pehala lyaashono, pula to ti: “Oshike tandi vulu okuninga opo ndi mu kwathele ngashingeyi?” nopo nduno ya ningila shoka taye ku pula u ya ningile. Ihe yanda okwiifaalela pomahala gopaumwene megumbo lyawo nenge okwiidhopa miinima yonkalamwenyo yawo.

❖ Yanda okupopya to ti: “Ondi shi nkene mu uvite.” Omuntu kehe ohi inyenge shi ili keso lyomuholike gwe. Nokuli nando nangoye owa li wa silwa okanona koye, ku shi naanaa nkene yo ye uvite.

❖ Otapu ka pita ethimbo ele opo onkalamwenyo yawo yi kale yi li ngaashi ya li nale manga inaaya silwa. Tsikila oku ya kwathela ngaashi to vulu. Olundji petameko ohapu gandjwa eitulomo olindji kuukwanegumbo mboka wa silwa, ihe ohau kala wa pumbwa ekwatho natango konima yethimbo. Tala kutya owa pumbwa shike miiwike tayi landula ko nomoomwedhi dhokomeho.a

[Enyolo lyopevi]

[Omathano pepandja 7]

Omahokololo gOmbiimbeli otagu ulike kutya Jesus oku na oonkondo nehalo okuyumudha aanona