Uuwehame wa kwata miiti notau kalelele

OMASIKU opo ga piti omukonakoni gumwe okwa li a hala okutseya nkene mboka ya nika oluhodhi omolwokusilwa oonakusa yawo aaholike haya kala ye uvite konima yethimbo. Okwa li a tumine aavali yamwe mboka ya silwa aanona yawo oomvula dhontumba dha piti oombapila dhomapulapulo. Haavali ayehe ya li ye ga yamukula. Omusamane gumwe omuvali gwedhina Vladimir ngoka a li a silwa omwanamati oomvula ntano dha piti, okwa li a yelitha kutya oha mono natango oshidhigu noonkondo okupopya kombinga yomwanamati gwe.a

Aavali mboka ya silwa ohaya kala olundji ye uvite oluhodhi lwa tya ngaaka ndoka halu kala po ethimbo ele. Oomvula omulongo dha piti, okanona kokamati kaWilliam koomvula 18 oka li ka si omeya. William okwa nyola ta ti: “Ondi uvite natango uuwehame omolwokusilwa notandi ka kala ndi u uvite natango uule wonkalamwenyo yandje ayihe.” Konima yoomvula ntano sho Lucy a li a silwa okanona ke kokamati omolwuuvu wombadhilila, okwa nyola a ti: “Onda kala tandi dhiladhila uule womasiku ogendji kutya ‘shika kashi shi shoshili.’ Onda li ndi uvite nda fa tandi yaguma ondjodhi ombwinayi nonda li tandi ka penduka nziya. Konima yethimbo lyontumba onda tameke okumona kutya oshoshili, sho ka li itaaka galukile kegumbo. Okamwandjemati oka sa pwa pita oomvula ntano, ihe omathimbo gamwe ngele ndi li ongame awike, ohandi kala natango tandi ka lili.”

Omolwashike aavali mboka ya silwa ngaashi Vladimir, William naLucy haya kala ye uvite uuwehame uunene notau kalelele? Natu tale omatompelo gamwe.

Omolwashike oluhodhi halu kala olunene noonkondo?

Uuna muukwanegumbo mwa valwa okahanona, aavali ohaya kala ye na enyanyu enene ndyoka inaali monika nando onale mekwatathano lyopantu. Ohaya kala ye uvite enyanyu enene noya mbilipalelwa ngele yu ukata okanona kawo, ngele taye ka tala sho taka kotha nenge sho taki imemeha okana kwa pwa ko. Aavali aanahole oye hole unene aanona yawo. Ohaye ya putudha ya kale hayi ihumbata nawa noya kale ye na omikalo. (1 Aatessalonika 2:7, 11, 12) Sho aanona taye ende taya koko notaya longele koonkambadhala dhaavali yawo, aavali ohaya kala ye uvite uuntsa nohaya tameke okukala ye na etegameno enene shi na ko nasha nayo.

Aavali mboka ye na ko nasha naanona yawo ohaya longo nuudhiginini opo ya sile oshimpwiyu omaluvalo gawo. Otashi vulika haya pungula aluhe iimaliwa nenge iinima yopamaliko opo ya kwathele nayo aanona yawo monakuyiwa ngele ya tameke okukala ye na uukwanegumbo wawo. (2 Aakorinto 12:14) Okulongitha huka okunene omaiyuvo, ethimbo, oonkambadhala niimaliwa otaku tu eta pehulithodhiladhilo limwe, kutya aavali ohaya putudha aanona yawo opo ya kale nomwenyo, ihe hakusa. Ngele okanona ka si, iilonga yoku ka putudha nayo ohayi hulu po, netegameno lyaavali li na ko nasha nako, kali po we. Ohole ya hwama nolukeno mbyoka hayi ulikilwa okanona kaavali yako oya hulithwa po noya yiwa moshipala keso ndyoka lya holoka po. Ehala ndyoka okamwanamati kawo nenge okamwanakadhona ka li ke na momitima dhawo oli li owala ngashingeyi. Aavali ohaya kala ye uvite oluhodhi olunene ndoka ihaalu zi po nuupu.

Ombiimbeli otayi shilipaleke kutya aavali ya silwa ohaya kala ye uvite uuwehame uunene. Ombiimbeli otayi hokolola shoka sha li sha ningwa po sho nkungulu Jakob a li u uvu kutya omwanamati gwe Josef okwa dhipagwa tayi ti: “Jakob okwa tuula onguwo dhe moluhodhi. Okwa lili omwana ethimbo ele. Oyana aamati ayehe naakadhona oye na oku mu hupulutha, ihe okwa tindi okutalalekwa e ta ti: ‘Aawe, otii ka kulukila muusi komumwandje tandi mu lili.’” Konima yoomvula, Jakob okwa li natango ta lili omwanamati ngoka a li i itaala kutya okwa sa. (Genesis 37:34, 35; 42:36-38) Oshiholelwa shilwe shomOmbiimbeli osha kwatela mo omukiintu omudhiginini gwedhina Naemi ngoka a li a silwa oyanamati yaali. Noluhodhi olunene, okwa li a hala a lundulule edhina lye Naemi ndyoka tali ti “Nelago” li ninge Mara, ndyoka tali ti “Nelulu.”—Rut 1:3-5, 20, 21, enyolo lyopevi.

Ihe Ombiimbeli itayi ulike owala kutya aavali ohaya kala ya nika oluhodhi. Otayi ulike wo nkene Jehova ha gandja oonkondo kwaamboka ya nika oluhodhi. Moshitopolwa tashi landula, otatu ka tala dhimwe dhomomikalo moka Kalunga ha gandja ehekeleko kwaamboka ya nika oluhodhi.

[Enyolo lyopevi]