Kalunga oha tala ko ngiini iikolitha?
OMUSHITI gwetu, ngoka e tu halela uuwanawa, ine tu indika okunwa iikolitha pandjele. Mepingathano naashoka, okwa pa aantu ‘omaviinu ge ya nyanyudhe, omagadhi ga adhimithe iipala yawo niikulya yi ya pe oonkondo oompe.’ (Episalomi 104:15) Oshikando shimwe Jesus Kristus okwa li a nyanyudha mboka ya li pohango sho a shitukitha omeya “omaviinu omatoye.”—Johannes 2:3-10.
Osha yela kutya Omushiti okwa tseya nawa nkene iikolitha hayi vulu okuguma okulonga kwomalutu nuuluyi wetu. Tate yetu gwomegulu ‘ote tu longo shoka she tu opalela’ okupitila mOmbiimbeli note tu londodha twaaha longithe iikolitha nayi. (Jesaja 48:17) Tala komalondodho taga landula:
“Inamu kolwa komaviinu, oshoka uunkolwi otau mú etele oshiponga.” (Aaefeso 5:18) ‘Oonkolwe itadhi ka ya muukwaniilwa waKalunga.’ (1 Aakorinto 6:9-11, KB) Oohapu dhaKalunga otadhi pangula “uunkolwi nuufukedhi niinima iikwawo ya fa mbika.”—Aagalati 5:19-21.
Ngashingeyi natu ka taleni iiponga yimwe mbyoka hayi etithwa kokunwa sha pitilila.
Iiponga mbyoka hayi etithwa kokunwa iikolitha sha pitilila
Nonando iikolitha oyi na uuwanawa wontumba, muyo omu na iinima yimwe ya longelwa mo mbyoka hayi lundulula omadhiladhilo nokulonga kwolutu lwomuntu. Okulongitha iikolitha sha pitilila otaku vulu okweeta uupyakadhi tawu landula:
Ngele owa nu sha pitilila, ‘omwenyo gwoye otagu fafaeke iinima iingwangwaneki.’ (Omayeletumbulo 23:33) Allen, ngoka a li ha nu sha pitilila ngoka a tumbulwa moshitopolwa sha tetekela okwa ti: “Iikolitha ihayi yono po owala olutu lwomuntu, ihe ohayi yono po wo omadhiladhilo ge niikala ye. Omuntu iha dhiladhila nkene okunwa kwe haku ehameke yalwe.”
Okunwa iikolitha sha pitilila ohaku ningitha omuntu a kale kee na omikalo. Omanyolo otaga londodha taga ti: “Omaviinu omalulu nomatoye otaga kutha aantu yandje oondunge.” (Hosea 4:11) Ngiini mbela? Omuntu ngele a nwa sha pitilila omadhiladhilo nomahalo ge ngoka ha vulu okupangela ngele inaa nwa ohaga tameke okumonika ga fa tago opalele, noha kala a hala okukatuka metsokumwe nago. Iikolitha otayi vulu oku tu imba tu dhiginine uuyogoki wetu wopamikalo, shoka hashi fala miiponga yopambepo.
Pashiholelwa, John okwa li a nyenyeta nomukulukadhi gwe e ta zi po a geya u uka kombaa. Konima owala sho a nu mo kashona opo a ngungumane, omukiintu gumwe okwe ya puye. Konima sho yi ipe mo ishewe, okwa zi po naye e taya ka hondela. Konima yaashoka, John okwi ipe uusama molwoshinima shoka a ningi molwaashoka a kolwa.
Okunwa sha pitilila ohaku vulu okuningitha omuntu kaa pangele elaka lye niilonga ye. Ombiimbeli otayi pula: “Olye ngoka ta ti: ‘Wuwuu!’ Nolye ta takuma? Oontamanana odhalye nomayemato ogalye?” Otayi yamukula tayi ti: “Oyo mboka haa tokelwa pomaviinu, oomboka haa yi mo ya makele ondungila.” (Omayeletumbulo 23:29, 30) Ngele oho nu sha pitilila oto ka kala wu wete “wa fa omuntu a lala mokati kefuta, wa fa omuntu a tsilikwa kondungu yombondje yosikepa.” (Omayeletumbulo 23:34) Omuntu ngoka a nwa sha pitilila ota vulu okupenduka a ‘kopagulwa, ihe ine shi koneka.’—Omayeletumbulo 23:35.
Okunwa sha pitilila otaku vulu okuyona po uukolele wetu. “Pehulilo otaga lumata ga fa eyoka notaga kungu uuzigo ga fa ongolonyoka.” (Omayeletumbulo 23:32) Aanongononi yopaunamiti oya koleka uushili weyeletumbulo ndyoka lyonale. Okunwa sha pitilila okwa fa omuntu ta nu uuzigo mboka tawu vulu oku mu etela ookankela dhi ili nodhi ili, uuvu wehuli, ondambandamba, osuuka yi li pevi kaanuuvu yosuuka, okuvala aanona ye na uunkundi, ombanda nosho wo uuvu womutima okutumbula po owala yimwe. Poompito dhimwe okunwa sha pitilila ohaku vulu okukambukitha omuntu nenge a se. Ihe iilanduliko ya kwata miiti noonkondo yokunwa sha pitilila, ihayi vulu okupangwa nomiti.
Oshiponga oshinene.
Nonando omuntu iha nu ta kolwa, okunwa sha pitilila otashi vulu okweetela uupambepo we oshiponga. Ombiimbeli otayi tu londodha tayi ti: “Yaye mboka haa meneka ongula onene ya tameke okunwa nohaa hungile taa nu iikolitha.” Omolwashike? Jesaja okwa yelitha iiponga yopambepo mbyoka hayi adha oonkolwe a ti: “Ihaa ndhindhilike nando iilonga yOMUWA yo kayu uvite ko shoka ta ningi.”—Jesaja 5:11, 12.
Oohapu dhaKalunga otadhi tu londodha kaatu ‘kale mokati kaanwi yomaviinu.’ (Omayeletumbulo 23:20) Oonekulu aakokele otaya londodhwa yaaha kale “oombwiyi dhiikolitha.” (Titus 2:3) Omolwashike mbela? Omolwaashoka aantu olundji ohaya tameke okunwa unene iikolitha kashona nakashona inaaye shi ndhindhilika. Lwahugunina, aanwi ohaya kala owala taya dhiladhila iikunwa notashi vulika yi ipopile taya ti: ‘Ngele nda kololokwa, otandi ke ga kongulula.’ (Omayeletumbulo 23:35) Oombwiyi ohadhi kala lela moshiponga molwaashoka ohadhi lala inaadhi lya, nesiku lya landula ko ohadhi kala dha hala okunwa dhi ikuthe opapalase.
Ombiimbeli otayi londodha ‘oonkolwi, aafukedhi naanwi kutya oye na oku ki ihokolola koshipala shaKalunga, ngoka ta ka pangula aanamwenyo naasi.’ (1 Petrus 4:3, 5) Jesus okwa londodha kombinga yomathimbo omadhigu ngoka tu li mugo a ti: ‘Ikotokeleni ne yene! Inamu etha, omadhiladhilo geni ga luudhikwe kiituthi nokuunkolwi nokiimpwiyu yopayuni, opo esiku lyaJehova lyaaye mú adhe ombadhilila. Oshoka otali ya ongomwigo.’—Lukas 21:34, 35.
Ngoka ha nu sha pitilila ota vulu okuninga po shike opo i igamene ‘kokuluudhikwa kuunkolwe’?
[Omathano pepandja 4 5]
Okulongitha nayi iikolitha ohaku vulu okweeta uupyakadhi owundji