3 Ongiini tu na okukala hatu galikana?

UUNA tashi ya pegalikano, omikalo dhomalongelokalunga ogendjii ohadhi ukitha eitulomo komukalo moka olutu lwomuntu lu na okukala lu li ngele ta galikana, koohapu nokomisindalandu dhontumba ndhoka e na okulandula. Ihe Ombiimbeli otayi tu kwathele kaatu gandje eitulomo kiinima mbyoka ngele tatu galikana, ihe otu li ukithe kiinima mbyoka ya simana noonkondo yi na ko nasha nepulo: “Ongiini tu na okugalikana?”

Ombiimbeli oya popi aapiya yaKalunga aadhiginini taya galikanene pomahala ga yoolokathana nomalutu gawo ge li moonkalo dhi ili nodhi ili. Oya li ya galikana ya mwena nenge muule shi ikolelela koonkalo. Oya li ya galikana ya tala pombanda nenge ya sizimana. Oya li ya galikana tashi zi komutima niitya yawo yene, ihe inaya longitha iimenka, omagwe nenge omagalikano gomomambo oku ya kwathela megalikano. Mbela oshike sha li sha ningitha omagalikano gawo gu uvike kuKalunga?

Ngaashi sha tumbulwa moshitopolwa sha tetekele, oya li ya galikana owala kuKalunga gumwe awike, Jehova. Opu na natango oshinima shilwe sha simana. Otatu lesha muJohannes gwotango 5:14 taku ti: ‘Otatu vulu okuhedha kuKalunga tu na omukumo, oshoka ngele tatu mu indile shaa shoka she mu opalela, oye ote tu uvu.’ Omagalikano getu oga pumbwa okukala metsokumwe nehalo lyaKalunga. Mbela shika otashi ti ngiini?

Ngele otwa hala okugalikana metsokumwe nehalo lyaKalunga, otwa pumbwa oku li tseya. Okukonakona Ombiimbeli oko oshinima sha simanenena shi na ko nasha nokugalikana. Mbela shika osha hala okutya Kalunga ita ka pulakena komagalikano getu ngele katu shi aalongwantu yOmbiimbeli? Hasho, ihe Kalunga okwa tegelela tu ilonge kutya ehalo lye olini, tu kale tu li uvite ko notu katuke metsokumwe nalyo. (Mateus 7:21-23) Otwa pumbwa okukala hatu galikana metsokumwe naashoka twi ilonga.

Sho tatu ilongo kombinga yaJehova nosho wo yehalo lye, eitaalo lyetu otali kolo, shoka shi li oshinima shilwe sha simanenena shi na ko nasha negalikano. Jesus okwa ti: ‘Ngele mwi itaala, otamu pewa okehe tuu shoka tamu shi indile megalikano.’ (Mateus 21:22) Okukala neitaalo itashi ti kutya omuntu owu na okukala ho itaale nuupu. Ihe otashi ti okwiitaala sha shoka ihaashi monika, ihe opu na okukala pu na uunzapo tawu shi koleke. (Aahebeli 11:1) Ombiimbeli oyi na uunzapo owundji kutya Jehova ngoka itaatu vulu okumona, ogwolela, oku shi okwiinekelwa noku na ehalo okuyamukula omagalikano gaamboka ye mu itaala. Kakele kaashono, otatu vulu aluhe okupula eitaalo lyetu li gwedhelwe, na Jehova oku na ehalo lyoku tu pa shoka twa pumbwa.—Lukas 17:5; Jakob 1:17.

Mpaka opu na natango oshinima shilwe sha simanenena shi na ko nasha nankene tu na okugalikana. Jesus okwa ti: “Kape na ngoka ta vulu okuya kuTate, okuninga ta pitile mungame.” (Johannes 14:6) Onkee ano, opo tu vule okupopya naTate, Jehova, otu na okupitila muJesus. Osho molwaashoka Jesus a li a lombwele aalanduli ye ya galikane medhina lye. (Johannes 14:13; 15:16) Shoka itashi ti otu na okugalikana kuJesus. Ihe otu na okukala hatu galikana medhina lyaJesus, tatu dhimbulukwa kutya oye e shi ninga tashi wapa opo tu vule okukala tatu vulu okupopya naTate yetu a gwanenena nomuyapuki.

Oshikando shimwe aalanduli yaJesus yopothingo oya li ye mu pula ya ti: “Omuwa, tu longa okugalikana.” (Lukas 11:1) Osha yela kutya kaya li taya pula ya longwe iinima mbyoka twa za nokukundathana, ihe oya li ya halelela okutseya kutya oye na okugalikana kombinga yashike.

[Oohapu dha simana pepandja 6]

Opo omagalikano getu ga kale taga ti sha, otu na okugalikana metsokumwe nehalo lyaKalunga, tu na eitaalo kutya ote ga yamukula notatu shi ningi medhina lyaJesus