Oyoongalele—efimbo lokuhafa!
1 Oyoongalele yEendombwedi daJehova oyo eemhito dokuhafa unene. Oule womido di dule efele, oyoongalele oyo oya eta ehapupalo olo tali ningwa mehangano letu. Okudja ketameko linini, otwa mona omanangeko noupuna aJehova moilonga yetu yomounyuni aushe. Poshoongalele shetu shotete momafimbo onena, shomo 1893 sha ningilwa muIllinois shaChicago, ovanhu 70 vomovakalipo 360 ova li va ninginifwa mokuulika eliyandjo lavo kuJehova. Poyoongalele yoshitukulwa ya landulafana yomudo wa pita “Ovawanifi vEendjovo daKalunga” opa li ovakalipo 9 454 055 novaninginifwa 129 367 mounyuni aushe. Kashi fi tuu osheetifi shehafo shikumwifi!
2 Okudja komafimbo Ombibeli, okwoongala kwoshiwana shaKalunga okwa li onghedi ya tongomana yokuyandja ehongo tali di kuJehova. Mefimbo laEsra naNehemia, oshiwana osha pwilikina okuleshelwa Omhango ‘okudja ketendo leluwa fiyo opokati komutenya.’ (Neh. 8:2, 3) Omolwokumona eudeko liwa lOmhango pomhito oyo, oshiwana osha li sha mona “ehafo linene.” (Neh. 8:8, 12, NW) Nafye ohatu hafe eshi oyoongalele ye tu pa omhito iwa tu mone ehongo liwa noikulya yopamhepo ‘pefimbo la wapala’ okudja kuJehova okupitila ‘momupiya omudiinini nomunaendunge.’ (Mat. 24:45, yelekanifa NW.) Molwaashi Jesus okwa ti omunhu oku na okukala nomwenyo ‘kondjovo keshe tai di mokanya kaKalunga,’ oyoongalele oya fimanenena konghalonawa yetu yopamhepo.—Mat. 4:4.
3 Oshi na oshilonga okuninga onghendabala keshe tu kale po: Atushe ohatu ke shi ninga elalakano letu lopaumwene tu kale po poshoongalele ashishe shoshitukulwa “Ovahongi vEendjovo daKalunga” omudo ou. Otu na okuninga omalongekido tu fike pefimbo efiku keshe nokukala po fiyo hatu kufa ombinga okutya “Amen!” peilikano laxuuninwa. Okuhanga eshi, otashi dulika tu na okuninga omalunduluko melandulafano letu. Okumona efimbo lefudo koilonga yetu tu kale poshoongalele otashi dulu okweeta omaudjuu onhumba. Ndelenee otwa pumbwa okukala twa fikama twa pama moshinima eshi, tu ha ongaonge okuninga omalongekido. Ngeenge otwa pumbwa eenhele ile oyeendifo, otu na okuninga omalongekido kuyele. Eenghendabala keshe hatu ningi itadi ka kala tuu di na oshilonga!
4 Oshiwana shaJehova ihashi yeleke omanangeko noupuna okukala poshoongalele mwaasho tashi ka kosha. Didilika oihopaenenwa yavamwe ovo va li va tokola toko okukala poshoongalele shopaiwana Ehalo laKalunga shEendombwedi daJehova mOshilando New York mo 1958. Omumwatate umwe okwa pata ongeshefa yaye yokutunga oule woivike ivali okuliyandja a ka kwafele nehalo liwa nokukala poshoongalele. Omumwatate mOnhunhu yaVirgin okwa landifa po eehekita mbali dedu opo ovakwaneumbo vaye aveshe vahamano va dule okukala poshoongalele. Ovalihomboli ovanyasha ova landifa po ombautu yavo opo va dule okuya koshoongalele pamwe nounona vavo vatatu, vomido okudja peemwedi mbali fiyo omido heyali. Ovamwainafana vatatu va dja kuCalifornia ova li va lombwelwa kutya ngeenge ova faula koilonga yavo, oilonga oyo itai ka kala po vali eshi tava aluka. Ndelenee osho inashi va kelela okuya koshoongalele osho shi he fi okudimbuwa nande.
5 Jehova ota nangeke noupuna eenghendabala detu da mana mo: Jehova oku wete nota nangeke noupuna oshiwana shaye. (Heb. 6:10) Pashihopaenenwa, poshoongalele shEhapupalo lOuteokratika shomo 1950, ovo va li po ova uda oshipopiwa shididilikwedi “Eenghalelo dipe doinima.” Omumwatate Frederick Franz okwa pendula nokwa endelelifa elitulemo laaveshe mokupula ta ti: “Mbela oshoongalele eshi shopaiwana otashi ka kala sha hafa okushiiva kutya apa, konguloshi ei, mokati ketu, omu na omuvalu waavo tava ka kala ve li ovapangeli vomedu lipe?” Opwa pita omido di dulife 50, ashike natango ohatu hafele eyelifo eli leudeko lEpsalme 45:17.
6 Konima yokukala poshoongalele shoshitukulwa omudo wa ya, omutwe woukwaneumbo wa pandula owa shanga eshi tashi shikula: “Ovamwatate, itamu ka shiiva nande kutya oshoongalele eshi osha xupifa eemwenyo detu shi fike peni. Oukwaneumbo wange owa tembukila koshilando omolwomatomheno oilonga, ndele otwa mona ashike eshi oupamhepo wetu wa hauka. . . . Otwa efa po oinakuwanifwa yetu yopaKriste, otwa efa po nokuli okuya kokwoongala nokukufa ombinga moukalele filufilu. . . . Oshoongalele eshi osha li she tu pameka nosho yo natango otwe litulila po omalalakano opamhepo notwa unganeka oinima opo tu a wanife po.”
7 Jehova ote tu pe oikulya yopamhepo oyo twa pumbwa. Ota yale oshililo shiwa poyoongalele yetu. Olupandu letu omolwefiloshisho eli otali tu dulifa tu popye osho Kornelius a popya eshi a li a talelwa po komuyapostoli Petrus: “Nopaife ofyeni atusheni otu li po apa koshipala shaKalunga, fye tu ude ko adishe odo we di lombwelwa kOmwene.” (Oilonga 10:33) Natu shi ninge elalakano letu tu kale “koshipala shaKalunga” pomutumba keshe woshoongalele shoshitukulwa “Ovahongi vEendjovo daKalunga” shomudo ou nokuhafa!