‘Pwilikineni opo mu hapupalife eendunge’
1 Embo lOmayeletumbulo otali popi pafaneko eendunge tadi ifana tadi ti: “Udeni, osheshi ame ohandi ka popya oinima iwelela, ndele handi makula omilungu dange kuashi sha yuka. Ame ndi nepukululo nomayele. . . . Pwilikinei nge hano, osheshi ovanelao ovo hava diinine eendjila dange. Osheshi ou ta mono nge, okwa mona omwenyo ndele te limonene [okuhokiwa] kOmwene.” (Omayel. 8:6, 14, 32, 35) Eendjovo odo otadi ulike naanaa kehongo olo le tu teelela kOshoongalele shoshitukulwa “Ovahongi vEendjovo daKalunga.”
2 Eemhumbwe doumwainafana mounyuni aushe oda konakonwa, nomolwaasho oprograma yoshoongalele ya longekidwa opo i ungaunge neemhumbwe da tya ngaho. Ehongo lopamhepo nosho yo omayele taa kwafa oo taa ka yandjwa, otaa dulu oku tu kwafela tu kale tu udite elao, tu kaleke po ekwatafano liwa naJehova notu kale mondjila oyo tai twala komwenyo waalushe ngeenge ohatu a tula moilonga. Doshili, otu na etomheno liwa ‘okupwilikina opo tu hapupalife eendunge.’—Omayel. 1:5.
3 Manga oprograma inai tameka: Opo tu mone mo ouwa pauyadi mwaasho tashi ka kundafanwa, otu na okukala moipundi yetu nokukaleka omadiladilo etu ponhele omanga oprograma inai tameka. Eshi otashi pula okulilongekida nawa paumwene. Oshinima sha fimana osho okulilongekida manga kuyele. Ka nangeleni kuyele onguloshi keshe oyo tamu pendukile omafiku oshoongalele. Pendukeni kuyele opo keshe umwe womongudu yeni e lilongekide nomu lye sha. Indeni manga kuyele konhele yoshoongalele opo mu dule okulimonena oipundi nokuunganeka oinima aishe oyo ya fimana omanga oprograma inai tameka. Omivelo otadi ka patuluka po 7:00 yongula, oprograma otai ka tameka po 9:00 wongula efiku keshe loshoongalele.
4 Molwaashi elalakano la fimana unene lokwoongala olo okutanga Jehova “moiongalele yeongalo,” omutumba keshe ou na okuhovela monghedi oyo tai fimaneke Kalunga ketu. (Eps. 26:12) Opo shi ningwe, ohatu ladipikwa tu kale omutumba omanga eimbilo lotete inali shiivifwa. Eshi otashi tu kumwe nekumaido lopamishangwa olo tali ti: ‘Aishe nai ningwe meenghedi diwa nomeshikulafano.’ (1 Kor. 14:40) Mbela eshi otashi ti ngahelipi kukeshe umwe womufye? Ngeenge to mono omunashipundi e li omutumba komutune omanga omusika oyo hai tetekele tai imbi, endelela u kale omutumba. Eshi otashi ku kwafele u kufe ombinga nomutima aushe meimbilo olo tali tamekifa omutumba keshe woshoongalele, mokutanga Jehova.—Eps. 149:1.
5 Pefimbo loprograma: Esra okwa “[longekida, NW] omutima waye mokukonakona omhango yOmwene noku i [shikula].” (Esra 7:10) Ongahelipi hatu dulu okulongekida omitima detu opo di tambule ko ehongo olo Jehova te tu pe? Eshi to endulula oipalanyole yoitukulwa i lili noku lili oyo ya shangwa melandulafano loprograma, lipula ove mwene: ‘Mbela oshike osho Jehova ta lombwele nge okupitila moprograma ei? Omauyelele aa ohandi dulu oku a longifa ngahelipi opo ame noukwaneumbo wange tu mone mo ouwa?’ (Jes. 30:21; Ef. 5:17) Twikila okulipula omapulo oo mokweendela ko kwefimbo loshoongalele. Shanga oitwa oyo wa hala okulongifa. Mona efimbo lokukundafana navamwe kombinga yoitwa oyo konima yomutumba wefiku keshe. Eshi otashi ke ku kwafela u koneke nokutula moilonga omauyelele oo.
6 Okukala we litula mo oule weevili dihapu pomutumba umwe otashi dulu okukala eshongo. Mbela oshike tashi dulu oku tu kwafela tu kondjife eamo lokutwalwaatwalwa pamadiladilo? Longifa nawa eenghono deisho. Osho hatu kala twa tala nomesho etu osho hashi kwata ko elitulemo letu unene. (Mat. 6:22) Onghee hano, natu kondjifeni okahalu kokukevauka keshe oko taku di eweelelo ile elinyengo. Kala wa tala komupopi. Eshi omishangwa tadi leshwa kala to landula mOmbibeli yoye noku i kaleka ya pandjwa eshi omushangwa tau kundafanwa.
7 Ohole yopaKriste otai ke tu linyengifa tu henuke okupiyaaneka vamwe pefimbo loprograma. (1 Kor. 13:5) Eli olo “efimbo lokumwena” nokupwilikina. (Omuud. 3:7) Onghee hano, henuka okupopyapopya nokweendaenda inaku pumbiwa lela. Ninga eenghendabala komesho yefimbo opo u ha kale toi luhapu kokandjuwo inashi pumbiwa. Ino lya ile u nwe shi he fi pefimbo olo la nuninwa oku shi ninga, okuninga shapo pe na oinima ya kwata moiti i na sha nouhaku. Ovo hava etelele eengodi dopeke, eepagers, omafano okuninga eevidio nomafano okufaneka, inava longifa oinima oyo monghedi oyo tai piyaaneke vamwe. Ovadali ove na okuninga elongekido opo oukwaneumbo aushe mwa kwatelwe ovanyasha veedula domulongo nasha u kale omutumba pamwe, opo ovadali va dule okupashukila ovana.—Omayel. 29:15.
8 Odula ya dja ko omukulunhuongalo oo a kala ha i koyoongalele oule womido omilongo okwa ti: “Oshoongalele eshi okwa li ndi udite sha tongomana omolwetomheno li lili. Konyala ovapwilikini aveshe okwa li tava shange omalidimbulukifo, mwa kwatelwa yo nounona vanini. Osha li shihafifa oku shi mona. Eembibeli okwa li tadi longifwa nawa eshi ovapopi va li tava yukifa elitulemo koitukulwa yonhumba yomishangwa.” Okupwilikina nelitulemo kwa tya ngaho oku shii okupandulwa shili. Itaku eta ashike ouwa kufye nokuvakwetu ovo ve uya koshoongalele ndelenee komesho yaaishe otaku fimaneke Omuhongi wetu Munenenene, Jehova Kalunga.—Jes. 30:20, NW.