Kala omulaadhi mwaashono oshiwanawa
1 Sho tu uka pethimbo lyEdhimbuluko lyomo 2003, otu na omatompelo ga gwana okukala “aalaadhi mwaashoka oshiwanawa.” (1 Pet. 3:13, NW) Tango mokati kago omu na ekuliloyambo lyaJesus Kristus. (Mat. 20:28; Joh. 3:16) Shi na ko nasha naashika, omuyapostoli Petrus okwa nyola ta ti: “One inamu kulilithwa iinima hayi hulu po, oshisilveri noshingoli, omokukala kweni kwonale . . . , aawe, onombinzi ondhigu nondjapuki yaKristus, ongaandjika yoonzi kayi na oshiponga nokayi na onyata.” (1 Pet. 1:18, 19) Olupandu okupandula euliko ndika lyohole onkumithi otalu tu inyengitha tu kale tu na ombinga mokulonga uuwanawa, tatu dhimbulukwa kutya Jesus okwi “igandja peha lyetu, e tu kulile mo muulunde auhe, ye e tu yoge, tu ninge oshigwana she mwene sha hala shili okulonga uuwanawa.” — Tit. 2:14; 2 Kor. 5:14, 15.
2 Uuna tatu longo shoka shihokitha momeho gaKalunga, otatu nyanyukilwa ekwatathano ewanawa naye notatu kala kohi yetonatelo lye lyopahole. Petrus okwa tsikile ta ti: “Oongoka a hala okunyanyukilwa omwenyo nokumona omasiku omawanawa, . . . na pilamene ko uuwinayi, ye na longe uuwanawa, na konge ombili, ye ne yi landule. Oshoka omeho gOmuwa oga taalela aayuuki nomakutsi ge oge endekela komagalikano gawo.” (1 Pet. 3:10-12) Momasiku ngaka ga nika oshiponga, kashi li tuu eyambeko okutseya kutya Jehova ote tu tala nokwi ilongekidha okukatuka onkatu molwetu ‘oku tu gamena ongondanda yeho lye.’—Deut. 32:10; 2 Ondjal. 16:9.
3 Kakele kokutaalelwa komamakelo, Aakriste yonale mboka Petrus a nyolele oya li ye na uulaadhi wa hwama mboka wa li itaau vulu okumwenekwa, noya li yu uvitha onkundana ombwanawa apuhe ngaashi tashi vulika. (1 Pet. 1:6; 4:12) Osho wo shi li shi na ko nasha noshigwana shaKalunga nena. Nonando otu li ‘momathimbo omadhigu,’ olupandu okupandula uuwanawa waJehova otalu tu inyengitha okulonga ehalo lyaKalunga nuulaadhi. (2 Tim. 3:1; Eps. 145:7) Natu konakoneni yimwe yomiilonga mbika iiwanawa mbyoka tatu ka kala twi ipyakidhila nayo pethimbo lyEdhimbuluko.
4 Hiya yalwe kEdhimbuluko: Omukalo gumwe tatu vulu okuulika olupandu lwetu lwomagano omakumithi giikulila oli na okugandjwa omolwedhimbuluko lyokomumvo lyeso lyaJesus, ndyoka tali ka dhanwa nuumvo mEtitatu, 16 Apilili, konima yetango lya ningina. (Luk. 22:19, 20) Mumvogu, omagongalo 94 600 muuyuni auhe oga lopota, notwa li tu na omwaalu omunene gwaakalipo gu thike 15 597 746! Shika osha li aakalipo ye li 220 000 ye vulithe yomumvogwalili.
5 Yangapi taya ka kala po nuumvo? Oshindji otashi ka kala shi ikolelela koonkambadhala dhetu dhuulaadhi okuladhipika yalwe ya gongale pamwe natse. Tameka okuninga omusholondondo gwaayehe mboka wa hala okuhiya. Yotango momusholondondo oye na okukala mboka ya kala megumbo lyoye. Ngele ou na kuume kopandjokana kee shi omwiitaali, mu lombwela tashi zi komutima kutya owa hala a ka kale po pamwe nangoye. Omusamane gumwe kee shi omwiitaali okwa ti kutya mumvogu okwa li a kala pEdhimbuluko molwashoka okwa li ta vulu okumona nkene okukala po kwe taku ti sha noonkondo komukulukadhi gwe. Taya landula ko momusholondondo otaya vulu okukala aakwanezimo, aashiinda, aaniilonga ooyakweni, nenge aanasikola ooyakweni. Shilipaleka kutya aakonakonimbimbeli yoye owe ya hiya.
6 Konima yokuninga omusholondondo, tula po ethimbo lyokuhiya paumwene kehe gumwe. Longitha uufooloma wa nyanyangidhwa wokuhiyitha Edhimbuluko. Opo u kwathele aantu ya dhimbulukwe kutya uunake nopeni Edhimbuluko tali ka ningilwa, topatopa nenge nyola nawa ethimbo nehala mpoka Edhimbuluko tali ka ningilwa pevi lyokafooloma kokuhiyitha. Sho omasiku 16 Apilili taga hedha popepi, dhimbulukitha mboka ye li momusholondondo gwoye, to yi kuyo paumwene, nenge u ya dhengele ongodhi. Natu kwathele oyendji ngaashi tashi vulika ya kale pompito ndjika ondjapuki.
7 Kwathela mboka taya kala pEdhimbuluko: Ongulohi yEdhimbuluko ohayi kala aluhe ompito yituntula. Otu na ompito okuhambelela oohandimwe mboka ihaaya kala shito pokugongala kwetu. Ninga omalongekidho okuthika kuyele e to kala po okathimbo konima yokugongala, ngele oonkalo dhopune otadhi shi pitika. Katuka onkatu okutseyathana naamboka aape ye li maapulakeni. Kala wa nyanyukwa nokukala ho yakula aayenda. — Rom. 12:13.
8 Mbela yamwe mboka taya vulu okukala pEdhimbuluko otaya vulu okukwathelwa ya ninge ehumokomeho enene lyopambepo okupitila mekonakonombimbeli pegumbo? Kambadhala okumona omadhina noondjukithi dhomutalelipo kehe ngoka inaa talelwa po natango opo u vule okutsikila oku mu kwathela. Nekwatho lyopahole, yamwe yomwaambaka otaya vulu okuhuma komeho sigo oposhitsa shokukala ya gwana okuninga aauvithi inaaya ninginithwa manga Edhimbuluko lyomumvo tagu landula ko inaali thika. Uuna to ningi omaishunoko kwaamboka ya li pEdhimbuluko, ya hiya koshipopiwa shi ikalekelwa shoka tashi gandjwa mo 27 Apilili.
9 Oto vulu mbela okukutha uukwathelikokolindjila nuumvo? Omumvo kehe uulaadhi wetu molwaJehova ohau tu inyengitha tu itule mo thiluthilu muukalele pethimbo lyoomwedhi dhomaipyakidhilo gopauteokratika gi ikalekelwa. MuMaalitsa naApilili 2002, omwaalu gu thike po 14 186 ogwa li gwa kutha ombinga muukwathelikokolindjila moSouth Africa nomiilongo mbyoka yi li kohi yoshitayimbelewa shetu. Omwaalu nguka kagu shi owala oshitsa shopombanda ihe otagu ulike oonkambadhala dha hanganithwa dhomagongalo agehe dhokuuvitha onkundana ombwanawa nuulaadhi pethimbo lyEdhimbuluko.
10 Egongalo limwe lyaauvithi 107 naakokolindjila yondjigilile 9 olya kundaneke kutya oya li ye na “omwedhi gwa dhenga mbanda” muApilili gwomumvogu, sho lya li li na aakwathelikokolindjila 53, mwa kwatelwa aakuluntugongalo ayehe naayakuligongalo. Aakuluntugongalo oya tungu po ngiini ombepo yehwamo yuukwathelikokolindjila moomwedhi ndhoka? Oya tameke kuyele okuladhipika oyendji ngaashi tashi vulika yi inyolithe muukokolindjila. Okugongala kwiilonga yomomapya okwa li kwa ningwa pomathimbo ga yoolokathana omutenya opo ku kwatele mo ayehe megongalo. Omuthindo gwi ikalekelwa ogwa li gwa tsuwa kokugandja uunzapo mongodhi, unene tuu kwaamboka ye li iingolomena.
11 Omumwameme gumwe gwomimvo 86, ngoka ihaa vulu okweenda molwuupyakadhi wuukolele, okwi inyolitha muukwathelikokolindjila. Mokutameka ongula, okwa li a longo oowili dhontumba mokugandja uunzapo womongodhi manga a kuutumba poshitaafula shomonkombitha, okwa ka vululukwa po oowili dhontumba, nopo nduno ta galuka e ta longo oowili oonkwawo. Omuntu gumwe ngoka omumwameme a li a dhengele ongodhi okwa li a silwa omusamane gwe noyanamati yoomvula omulongo nasha yaali oomvula mbali dha piti noka li ta vulu oku shi uva ko molwashike Kalunga e etha iinima iiwinayi ngawo yi ningwe. Uunzapo uuwanawa owa li wa gandjwa, nekonakonombimbeli olya li lya tameke. Uunzapo womongodhi koongulohi nopomathimbo galwe owo omukalo omwaanawa okuya kaantu mboka ya kala momatungo nenge miitopolwa mbyoka ihaayi vulu okuyiwa. Otashi wapitha wo aauvithi ya popye naantu mboka ihaaya kala pegumbo omutenya.
12 Aakuluntugongalo oya thiki pehulithodhiladhilo lyolopota yawo taya ti: “Otwa li twe shi nyanyukilwa noonkondo notwa pandula uuthembahenda wi ikalekelwa nosho wo omalaleko nuuyamba ngoka Jehova a ningi taga wapa kukehe gumwe gwomutse.” Pamwe nelongekidho ewanawa, egongalo lyeni nalyo otali vulu okunyanyukilwa omayambeko ga tya ngaaka.
13 Ningeni onkambadhala opo kehe gumwe a kale e na ombinga muukalele: Ohole yetu yokuhola Kalunga nosho wo ooyakwetu otayi tu inyengitha tu lande ethimbo omwedhi kehe okukutha ombinga monkundana ombwanawa pamwe nayalwe. (Mat. 22:37-39) Aatonateli yEkonakono lyEmbo lyEgongalo naapeha yawo oye na okukambadhala okukwathela mboka ye li mongundu yawo ya kuthe ombinga muukalele momwedhi kehe. Omukalo omwaanawa oku shi ninga ogwo okuninga omalongekidho manga kuyele okulonga muukalele pamwe noohandimwe yokondandalunde mongundu. Pehala lyokutegelela u shi ninge kehulilo lyomwedhi, tameka manga kuyele. Shika otashi ke ku pa oompito odhindji okugandja ekwatho lyopahole.
14 Opu na mbela aauvithi mboka ye li iingolomena mongundu yekonakono lyeni lyembo mboka haya kutha ombinga nuudhigu uunene muukalele? Ngele yamwe oye li momagumbo moka taya silwa oshimpwiyu nenge ihaaya vulu okuza mo momagumbo gawo, oshi shi okuuviwa ko kutya oompito dhawo dhokugandja uunzapo otadhi ka kala oonshona. Ihe opo ya mone uuwanawa moompito dhawo oonshona okweetha uuyelele wawo u yele, otaya vulu okwiinyengitha mboka ye wete iilonga yawo iiwanawa ya kale ye na ohokwe yashili moshili. (Mat. 5:16) Aatonateli yekonakono lyembo oye na okushilipaleka kutya aauvithi ya tya ngaaka oye shi shi kutya otaya vulu okulopota iilonga yawo yomomapya nando odho ominute 15. Okulopota ethimbo ndyoka ya longa mokugandja uunzapo otaku ladhipike aauvithi mbaka aadhiginini, notashi ye etele enyanyu nembilipalelo. Otashi kwathele wo okukala nuushili kutya olapota yiilonga yoshigwana shaKalunga muuyuni auhe oyi li mondjila.
15 Aagundjuka mboka yi ipyakidhila okulonga shoka oshiwanawa. Kashi talaleka tuu okumona aagundjuka Aakriste taya longitha oonkondo dhawo miilonga yaJehova! (Omayel. 20:29) Ngele ngoye omugundjuka, ongiini to vulu okuulika uulaadhi woye kuJehova pethimbo lyomaipyakidhilo moomwedhi ndhika?
16 Ngele ku shi omuuvithi inaa ninginithwa natango megongalo, oto vulu mbela okulalakanena uuthembahenda mboka? Ipula omapulo taga landula: ‘Ondi na mbela ontseyo yopetameko yoshili yOmbimbeli? Onda hala mbela okukutha ombinga miilonga yUukwaniilwa? Ondi shi okuholelwa mbela meihumbato lyandje? Otandi wapa mbela okupopya paumwene eitaalo lyandje mokupopya nayalwe kombinga yonkundana ombwanawa? Omutima gwandje ogwi inyengithwa mbela oku shi ninga?’ Ngele oto vulu okuyamukula kutya eeno komapulo ngoka, opo nduno popya naakuluntu yoye kutya owa hala okuninga omuuvithi. Aakuluntu yoye otaya vulu okuya kugumwe gwomaakuluntugongalo mboka ye li mokomitiye yiilonga.
17 Ngele ou li nale omuuvithi gwonkundana ombwanawa, ito vulu mbela okulongitha nawa ethimbo lyefudho lyosikola okutamununa mo okukutha ombinga kwoye muukalele? Mokukala ye na elandulathano ewanawa nosho wo ekwatho lyaakuluntu nolyayalwe, aagundjuka oyendji ya ninginithwa oya li ya vulu okukutha uukwathelikokolindjila. Ngele shika itashi wapa, opo nduno kala wa tokola okukutha ombinga ya gwedhwa po momapya. Itulila po elalakano. Kakele kelalakano lyokulonga oowili dhontumba miilonga yomomapya, tula po elalakano limwe li na ko nasha nuukwatya wuukalele woye. Oto vulu okukambadhala okulongitha enyolo pomweelo kehe, okuhwepopaleka uukwatya womaishunoko goye, okutameka ekonakonombimbeli, nenge okutamununa mo uukalele woye nokukwatela mo okugandja uunzapo mongodhi nenge okulongitha omukalo gulwe gwokulonga momapya. Ongiini kombinga yelalakano lyokukala u na aashiinda shoye, aanasikola ooyakweni, nenge aakwanezimo lyoye taye ya pamwe nangoye kEdhimbuluko lyonuumvo? Okukala u na ombinga yu udha momaipyakidhilo gopauteokratika otaku ka kala ku na ondjambi notaku ka ladhipika yalwe shili megongalo.—1 Tes. 5:11.
18 Kwathela aape ya hume komeho: Omumvo gwiilonga gwa za ko, omakonakonombimbeli gopegumbo konyala guupokati 90 000 oga li ga ningwa omwedhi kehe moSouth Africa, moBotswana, moLesoto, moNamibia, mo St. Helena nomoSwaziland. Konima yethimbo, oyendji yomaakonakoni mbaka otaya ka ninga ehumokomeho sigo opokwiiyapula nokuninginithwa. Ihe manga inaaya adha elalakano ndika, otwa pumbwa oku ya kwatha ya kale ya gwana okukala aauvithi yonkundana ombwanawa. Ndjika oyo onkatu ya simana yokulonga aape ya kale aalanduli yaJesus Kristus. (Mat. 9:9; Luk. 6:40) Ou na mbela omukonakonimbimbeli ngoka i ilongekidha okukutha onkatu ndjoka?
19 Ngele ku na uushili kombinga yehumokomeho lyaangoka to konakona naye, konga ekwatho komutonateli gwekonakono lyembo lyeni nenge omutonateli gwiilonga. Oto vulu oku mu hiya okuya nangoye kekonakono. Aamwatate mbano oye na owino u na oshilonga mboka tau vulu okukwathela okuutha ehumokomeho lyopambepo lyomukonakoni. Otashi vulika ye na omaetopo ngoka taga ka kwathela omukonakoni a tsikile okuninga ehumokomeho lyopambepo.
20 Uuna ngoka to konakona naye tu ulike ohokwe mokuninga omuuvithi inaa ninginithwa noto dhiladhila kutya okwa gwana, popya nomutonatelikwatelikomeho megongalo. Ota ka ninga elongekidho aakuluntugongalo yaali ya popye nangoye pamwe naangoka ho konakona naye ya tale ngele okwa gwana, taya longitha uuyelele u li pepandja 98-99 lyembo Our Ministry. (Tala Oshungonangelo yOshiingilisa, 15 Novomba 1988, epandja 17.) Ngele omukonakoni okwa ziminwa a ninge omuuvithi, ou na okutameka oku mu dheula nziya. Ngele a gandja olopota yiilonga yomomapya, egongalo otali ka tseyithilwa kutya omukonakoni oku li omuuvithi inaa ninginithwa. Etegameno lyetu olyo kutya omayovi gomaauvithi aape, aagundjuka naakulupe, otaya vulu okwaadha oshitsa shika sha simana pethimbo lyomaipyakidhilo moomwedhi ndhika dhi ikalekelwa.
21 Okuninga oopulanda komeho gethimbo otaku kwathele okutsakanitha oshindji: Okuninga oopulanda komeho gethimbo otaku eta omupondo momaipyakidhilo getu gopauteokratika pethimbo lyEdhimbuluko ndika. (Omayel. 21:5) Opu na iinima oyindji mbyoka ya pumbwa okupewa eitulomo kaakuluntugongalo.
22 Opo ya kwathele egongalo li tsakanithe oshindji muukalele womomapya, aakuluntugongalo oye na okuninga omalongekidho ge na oshilonga pu gongalwe omolwiilonga yomomapya moshiwike ashihe nomomahuliloshiwike. Omutonateli gwiilonga oku na okukwatela komeho omalongekidho ngaka. Otapu vulu mbela okuningwa omalongekidho ga gwedhwa po gokuya miilonga yomomapya ongula onene, komatango nenge kongulohi? Egongalo oli na okutseyithilwa omalongekidho ngoka. Otashi vulika shi kwathele ngele elandulathano tali tulwa kekatha lyomauyelele.
23 Aakuluntugongalo oye na okushilipaleka kutya omalongekidho gEdhimbuluko oga longekidhwa nale manga 16 Apilili inaaga thika. Shika osha kwatela mo okuunganeka elongitho lyOshinyanga shUukwaniilwa pamwe nomagongalo galwe ngoka tashi vulika haga gongala moka, okwoopaleka Oshinyanga shUukwaniilwa, okuhogolola aayakuli nosho wo okumona omandhindhiliko. Egongalo oli na okutseyithilwa kutya Edhimbuluko otali ningwa pongapi nopeni nosho wo omalunduluko kehe ga ningwa melandulathano lyokugongala kwoshiwike. Etonatelo lyuudhiginini lyiinima mbika otali ka pitika edhimbuluko li “ningwe komukalo omwaanawa, [nokelandulathano].” — 1 Kor. 14:40.
24 Omitse dhomaukwanegumbo otashi vulika dha hala okulongitha ombinga yadho yekonakono lyuukwanegumbo okukundathana nkene uukwanegumbo tau vulu okukutha ombinga momaipyakidhilo ga gwedhwa po pethimbo lyEdhimbuluko. Uukwanegumbo woye auhe otau vulu mbela okuninga uukwaathelikokolindjila? Nenge mbela uukwanegumbo otau vulu okuyambidhidha oshilyo shimwe nenge yi vulithe po oku shi ninga? Ngele shika itashi wapa, tula po omalalakano gokondandalunde mu li uukwanegumbo okulongitha ethimbo olindji muukalele. Muukwanegumbo omu na mbela oshilyo oshigundjuka tashi vulu okuninga omuuvithi inaa ninginithwa ngele tashi ladhipikwa nokukwathelwa? Yangapi uukwanegumbo woye tau vulu okuhiya kEdhimbuluko lyonuumvo? Okuninga oopulanda komeho yethimbo otaku ke eta omayambeko ogendji nenyanyu muukwanegumbo woye.
25 Natu longitheni nawa ethimbo lya hupa ko: Mokunyolela Aakriste yomethelemumvo lyotango, omuyapostoli Petrus okwe ya dhimbulukitha nkene ethimbo lye endelela molwashoka ehulilo lyonkalelo yiinima yOshijuda olya hedha popepi. (1 Pet. 4:7) Nena omauliko agehe otagu ulike kutya ehulilo lyonkalelo yiinima yuuyuni wongashingeyi oli li popepi. Esiku kehe onkalamwenyo yetu oyi na okuulika uushili mbuka. Tu li aapiya aalaadhi yaJehova, otu na okuukitha eitulomo kiilonga ye endelela yeuvitho lyonkundana ombwanawa.—Tit. 2:13, 14.
26 Ngashingeyi olyo ethimbo lyokuulika uulaadhi nokukatuka onkatu. Tedhatedha kwaashoka Jehova e ku ningila, a ningila uukwanegumbo woye nosho wo egongalo. Nonando itatu vulu nando oku mu futa omolwomikalo odhindji e tu monitha uuwanawa, otatu vulu okulongela Jehova nomutima gwetu aguhe. (Eps. 116:12-14) Oonkambadhala dhetu dhuulaadhi otadhi ka futwa nomayambeko okuza kuJehova. (Omayel. 10:22) Otatu vulu okukala “aalaadhi mwaashoka oshiwanawa” pethimbo ndika lyi ikalekelwa lyokukutha ombinga momaipyakidhilo ga gwedhwa po, “Kalunga opo a simanekwe mwaayihe omolwaJesus Kristus.” — 1 Pet. 3:13, NW; 4:11.
[Oshimpungu pepandja 3]
Aakali pEdhimbuluko muuyuni auhe
1999 14,088,751
2000 14,872,086
2001 15,374,986
2002 15,597,746
[Oshimpungu pepandja 4]
Oolye to ka hiya ye ye kEdhimbuluko?
□ Mboka ya kala megumbo lyaayeni naakwanezimo
□ Aashiinda naashiwikile
□ Aaniilonga ooyakweni naanasikola ooyakweni
□ Mboka ho ningi omaishunoko kuyo naamboka ho konakona nayo Ombimbeli
[Oshimpungu pepandja 5]
Kwathela mboka taya kala pEdhimbuluko
□ Ya popitha nenyanyu
□ Ninga omaishunoko
□ Ninga nayo ekonakonombimbeli
□ Ya hiya koshipopiwa shi ikalekelwa
[Oshimpungu pepandja 6]
Omalalakano goye pethimbo lyEdhimbuluko ogeni?
□ Kala u na gumwe ngoka wa hiya a ye kEdhimbuluko
□ Kala wa gwana okuninga omuuvithi a ninginithwa gwonkundana ombwanawa
□ Longitha oowili dhontumba muukalele
□ Hwepopala miinima yontumba yuukalele
□ Longa u li omukwathelikokolindjila