Hekeleka mboka ya nika oluhodhi
1. Omolwashike mboka ya nika oluhodhi ya pumbwa ehekeleko?
1 Okusilwa omuholike gwoye oshinima shiyemateka noonkondo, unene tuu kwaamboka kaaye na etegameno lyUukwaniilwa. (1 Tes. 4:13) Oyendji ohayi ipula taya ti: ‘Omolwashike aantu haya si? Ohaya yi peni? Mbela opu na ngaa esiku natu ka mone oonakusa yetu aaholike?’ Mpaka opu na omaetopo gamwe ngoka tatu vulu okuhekeleka nago mboka ya nika oluhodhi omolweso lyomukwanezimo nenge lyakuume kawo uuna tu li miilonga yomomapya. — Jes. 61:2.
2. Ngele omunegumbo okwe tu lombwele kutya oku li moluhodhi, mbela otatu ka gandja uunzapo kuye ethimbo ele?
2 Uuna tatu uvitha egumbo negumbo: Omunegumbo otashi vulika e tu lombwele kutya opo owala a silwa. Mbela eso ndyoka olye mu piyaganeka pamadhiladhilo? Mbela megumbo omu na aakwanezimo mboka ye ya koosa? Ngele osho shi li ngawo, inashi pumbiwa tu gandje uunzapo ethimbo ele megumbo ndyoka. (Omuuv. 3:1, 7) Otatu vulu okuulika uukwawo wanankali kuye, e tatu mu pe okatraktate, oshifo nenge okabroshure hoka taka opalele e tatu mu thigi po nombili. Opo ihe otatu vulu okugaluka pethimbo ndyoka li li nawa tu mu pe ehekeleko lyi ihwa po okuza mOmbiimbeli.
3. Ngele onkalo otayi shi pitike, omanyolo geni tatu vulu okuulukila omunegumbo ngoka e li moluhodhi?
3 Poompito dhimwe, otashi vulika shi kale shi li nawa okupopya ethimbo ele metalelopo lyotango. Nonando kali shi ethimbo lyokutompa omataloko gawo ngoka ga puka, otatu vulu okulesha nayo omauvaneko gOmbiimbeli kombinga yeyumuko. (Joh. 5:28, 29) Nenge otatu vulu oku ya ulukila shoka Ombiimbeli tayi ti kombinga yonkalo yoonakusa. (Omuuv. 9:5, 10) Ehokololo lyopaMbiimbeli li na ko nasha neyumuko otali vulu wo okugandja ehekeleko. (Joh. 11:39-44) Shimwe ishewe tatu vulu okuninga, okutala koohapu dheinekelo muJehova ndhoka dha li dha popiwa komudhiginini Job. (Job 14:14, 15) Omanga inaatu ya, otatu vulu oku ya pa okabroshure Uuna gumwe ngoka wu hole a sa nenge okatraktate Etegameno lini koonakusa aaholike? nenge oshileshomwa kehe tashi opalele. Otatu vulu wo oku ya thigila embo Omalongo gOmbiimbeli e tatu ya ulukile uuyelele mboka wu li montopolwa 6 nokuninga omalongekidho opo tu ye tu kundathane natango kombinga yaashoka ngele tatu galuka.
4. Opoompito dhilwe dhini tu na okugandja ehekeleko?
4 Poompito dhilwe: Ngele efumviko nenge oshituthidhimbuluko otashi ningilwa pOshinyanga shUukwaniilwa, mbela aakwanezimo mboka kaaye shi Oonzapo opo taya ka kala? Otaya vulu okupewa iileshomwa mbyoka tayi gandja ehekeleko. Omahangano gomafumviko gamwe oge hole okukala niileshomwa mbyoka tayi opalele aakwanezimo mboka ye li moluhodhi. Ethimbo limwe, omatseyitho gomafumviko ngoka haga kala miifokundaneki ohage tu pe ompito okuuvithila aakwanezimo mboka ya silwa moku ya nyolela ontumwafo yehekeleko ofupi nenge oku ya dhengela ongodhi. Omusilwalume gumwe nokamwanakadhona ke oya li ya nyolelwa ontumwafo komuuvithi gumwe mwa tulwa uutrakatate. Oya li ya yi kegumbo lye nokupula kutya “one mwa tumine ndje ontumwafo ndjika? Onda hala okutseya oshindji kombinga yOmbiimbeli.” Omusamane nokamwanakadhona ke oya li ya zimine ekonakonombiimbeli noya tameke okuya kokugongala.
5. Omolwashike tu na okukala twi ilongekidha okuhekeleka mboka ye li moluhodhi?
5 Omuuvithi 7:2 ota ti: ‘Okuya kegumbo taku lilwa oosa oku vule okuya kegumbo li na oontselela.’ Olundji mboka ye li moluhodhi ohaya pulakene Oohapu dhaKalunga shi vulithe mboka ye li menyanyu. Atuheni otu na okukala twi ilongekidha okuhekeleka mboka ya silwa aaholike yawo.