Oshoongalele shopashikandjo shomomudo woilonga 2009
Ongahelipi hatu dulu okukondjifa nouladi ovo tava pataneke nonyanya elongelokalunga lashili? Ongahelipi hatu dulu okuhenuka oinima oyo tai dulu oku tu kokela mounyuni ou wovahenakalunga? Omapulo oo a fimanenena otaa ka nyamukulwa poshoongalele shopashikandjo shomomudo woilonga 2009. Oshipalanyole shoshoongalele osho otashi ti: “Findeni owii nouwa.” (Rom. 12:21, OB-1986) Natu ka taleni kutya oshike she tu longekidilwa poshoongalele osho.
Omupashukili woshitukulwa ota ka yandja oipopiwa ngaashi, “Otwa pumbwa okukala twa pama opo tu finde owii nouwa,” “Ino kala we lineekela mwoove mwene!,” “Mafiku owii aushe otau ka xula po!” nosho yo “Natu pamekeni eitavelo letu opo tu dule okufinda ounyuni.” Omupashukilishikandjo ota ka yandja oipopiwa ngaashi, “Paife olo efimbo lokukala oupafi!,” sha kanghamena kOvaroma 13:11-13, nosho yo “Ino fya ounye mefiku loudjuu,” osho sha kanghamena kOmayeletumbulo 24:10, yelekanifa NW. Omupashukilishikandjo ote ke tu pa yo oshipopiwa osho shi na oshipalanyole “Yandja elitulemo keemhumbwe doshikandjo.” Poshoongalele osho otapa ka yandjwa yo oshipopiwa shitunhula shi na oshipalanyole tashi ti, “Oto dulu mbela okulonga ‘oshilongayakulo’ shoukokolindjila?” MOlomakaya, otapa ka yandjwa oipopiwa ya pambafana, i li koshi yoshipalanyole, “Natu kondjifeni omakonda Ondiaboli.” Oipopiwa oyo tai ke tu kwafela tu didilike mo notu henuke omakonda Ondiaboli ngeenge tashi uya poinima yopaunongononi nongeenge tashi uya pomalihafifo nosho yo ehongo. MOsoondaxa, otapa ka yandjwa yo oipopiwa ya pambafana, i li koshi yoshipalanyole, “Natu lipamekeni opo tu dule okulipopila mefiku lii.” Oipopiwa oyo otai ke tu kwafela tu shiive nghee hatu dulu okutula moilonga pauyadi omayele a nwefwa mo oo taa hangwa mOvaefeso 6:10-18.
Okuudifa etumwalaka lOuhamba otaku dana onghandangala ya fimana mokufinda owii. (Eh. 12:17) Nomolwaasho Satana oha ponokele nonyanya Eendombwedi daJehova. (Jes. 43:10, 12) Ndele eenghendabala daSatana itadi ka pondola nandenande, molwaashi otwa tokola toko ‘okufinda owii nouwa.’ Ninga omalongekido a pumbiwa, opo u ka mone ouwa pauyadi pomitumba adishe di li nhee doshoongalele osho shopashikandjo.