Iitegelelwa yomukalele Omukriste
1 Ehangano lyaJehova olya tameke okuninga omalongekidho omape mo 1938. Omagongalo gi ili nogi ili oga kala nokuhiywa kiigongi mbyoka hatu ithana ngashingeyi iigongi yopashikandjo. Onelalakano lyashike? O-Informant (ndjoka hayi ithanwa ngashingeyi Uukalele Wetu wUukwaniilwa) yaJanuali 1939 oya ti: “Iigongi mbyoka oyi li oshitopolwa shEhangano lyaJehova lyoPauteokratika shokuhumitha komeho iilonga ye yUukwaniilwa. Elongo ndyoka hali gandjwa puyo olya simanenena kukehe gumwe opo a longe iilonga ye mbyoka a pewa.” Ngele tatu tala komwaalu gwaauvithi ngoka gwa londa okuza po 58 000 mo 1938 sigo opaauvithi ye vilithe 7 000 000 mo 2009, osha yela kutya iigongi yopashikandjo otayi gwanitha po elalakano lyayo lyokukwathela aakalele ya “longe iilonga yawo mbyoka ya pewa.”
2 Oshipalanyolo shomumvo twa taalela: Otwa tegelela nondjuulukwe onene iigongi yopashikandjo mbyoka tayi ka tameka muSeptemba oku tu tsa omukumo. Oshipalanyolo shoshigongi osho: “Kamu shi oshitopolwa shuuyuni,” sha za muJohannes 15:19, NW. Iipopiwa yimwe yini tayi ke tu tunga tu li aakalele Aakriste? MOlyomakaya otatu ka pulakena koshipopiwa “Ongiini iilonga yethimbo lyu udha hayi tu gamene?” Otatu ka nyanyukilwa wo iipopiwa itatu ya pambathana “Inamu etha mu nyatekwe . . . ” ‘koshilikama,’ ‘kohonda kamana’ ‘nokaahalithi yiipindi.’ MOsoondaha otatu ka pulakena kiipopiwa ya pambathana yi na oshipalanyolo tashi ti: “Hola Jehova, pehala lyokuhola uuyuni.” Iipopiwa yilwe ongaashi: “Tsikileni mu li ‘oondjendi naakwiilongo muuyuni mbuka’ ” nosho wo “Inamu tila, ngame onda sinda uuyuni!”
3 Omumwameme gumwe ngoka a li ihaa kutha naanaa ombinga muukalele konima sho a kala poshigongi shopashikandjo opo sha zi ko okwa nyola kutya opolohalama oye mu kwathela a talulule nawa onkalo ye noku kale a tokola toko a kuthe “ombinga muukalele nopwaahe na okweetha.” Osha yela kutya opolohalama yomumvo omupe gwiilonga yoshigongi shopashikandjo otayi ke tu kwathela atuhe tu kale tu hole Jehova, pehala lyokuhola uuyuni. (1 Johannes 2:15-17) Opo wu ka mone uuwanawa poshigongi shika, shi li esiloshimpwiyu lyopahole lyaakalele Aakriste, sa oshimpwiyu wu ka kale po nokupulakena neitulomo.
[Omapulo gokukonakonwa]
1. Elongekidho lini lya li lya ningwa mo 1938, nonelalakano lyashike?
2. Iipopiwa yini tayi ka gandjwa poshigongi shopashikandjo shomumvo twa taalela?
3. Uuwanawa wuni tatu ka mona ngele otwa kala poshigongi shopashikandjo?