Otu na eliko li na ondilo okulombwela yalwe
1 Oohapu dhaKalunga odhi na elongo li na ondilo ndyoka tu na okukala tu hole. (Eps. 12:6; 119:11, 14) Pompito yimwe, Jesus okwa li a longitha eyele okuthaneka iinima yi ili noyi ili kombinga yUukwaniilwa, nokwa li a pula aalongwa ye a ti: “Omu uvu ko tuu adhihe ndhoka?” Sho ye mu yamukula kutya oye dhi uva ko okwa ti kuyo: “Ano okehe tuu omulongimpango ta ningi omulongwa gwOshilongo shegulu, okwa fa mwene gwegumbo ta holola mompungulilo ye iinima iipe niikulu.” — Mat. 13:1-52.
2 Ooshili dhOmbiimbeli ndhoka twi ilonga sho opo twa tameke okukonakona otatu vulu oku dhi tala ko dhi li eliko ekulu. Ohatu mono eliko epe lyooshili dhilwe dhOmbiimbeli sho tatu tsikile okukonakona paumwene iinima yomuule kombinga yOohapu dhaKalunga. (1 Kor. 2:7) Natango okupitila ‘momupiya omudhiginini nomunandunge’ ohatu ilongo uuyelele uupe. — Mat. 24:45, KB.
3 Otu na okukala twa lenga ooshili dhOmbiimbeli ndhoka tu shi nale naandhoka opo tatu ilongo. Shika ohashi tu inyengitha tu konge notu mone ontseyo tu li aalongi yOohapu dhaKalunga noku topolela yalwe nehalo ewanawa ooshili dhi na ondilo ndhoka twi ilonga.
4 Ilonga koshiholelwa shaJesus: Jesus okwa li a kambadhala okulombwela yalwe ooshili shoka tashi ulike nkene a li u uvite kombinga yeliko ndyoka. Nokuli naasho a li a vulwa okwa li a gandja eliko okuza “miigandhi” ye. — Joh. 4:6-14.
5 Molwaashoka Jesus okwa li e hole oohepele dhopambepo osha li she mu inyengitha a lombwele yalwe ooshili dhaKalunga eliko ndyoka tali gandja omwenyo. (Eps. 72:13) Okwa li e uvitile ohenda mboka ya li ya sa ondjala yopambepo noshe mu inyengitha ‘e ya longe iinima oyindji.’ — Mark. 6:34.
6 Holela Jesus: Ngele otwa lenga eliko ndyoka tu na, ngaashi Jesus, otatu ka kala nehalo okuulukila aantu uuyamba mboka wopambepo okuza mOmbiimbeli. (Omayel. 2:1-5) Nonando ethimbo limwe otashi vulika tu kale twa vulwa otatu ka popya kombinga yooshili dhopamanyolo twa hwama nomutima aguhe. (Mark. 6:34) Ngele otu na olupandu neliko ndyoka tu na, otashi ke tu inyengitha tu ninge ngaashi tatu vulu muukalele nokukutha aluhe ombinga muwo.