Ilongekidha nawa uuna to ka longa aantu
1. Omolwashike sha simana tu kwathele omukonakoni a kale nolupandu lwaashoka ti ilongo?
1 Uuna tatu ningi ekonakonombiimbeli, otu na okwiilongekidha nawa ngele otwa hala tu inyengithe omukonakoni a longele Jehova. Otu na okuninga oonkambadhala dha mana mo opo omukonakoni a kokeke olupandu lwoshili yOmbiimbeli ndjoka ti ilongo, naashoka otashi ke mu guma. (Deut. 6:5; Omayel. 4:23; 1 Kor. 9:26) Ongiini tatu vulu oku shi ninga?
2. Egalikano otali tu kwatha ngiini uuna tatu ilongekidhile ekonakono?
2 Galikana ngele to ilongekidha: Molwaashoka Jehova oye ha kokeke oshili momutima gomukonakoni, oshi li nawa uuna tatu tameke okwiilongekidhila ekonakono tu galikane kombinga yomukonakoni noompumbwe dhe dhokondandalunde. (1 Kor. 3:6; Jak. 1:5) Egalikano otali vulu oku tu kwatha tu kale twa tokola toko okukwathela tu udhithe omutima gwomukonakoni “ontseyo okutseya” ehalo lyaJehova. — Kol. 1:9, 10.
3. Ongiini tatu vulu okukaleka omukonakoni momadhiladhilo uuna tatu ilongekidha?
3 Kaleka omukonakoni momadhiladhilo: Jesus okwa li e shi kutya opo elongo lye li pondole oku na okukaleka aapulakeni ye momadhiladhilo. Jesus okwa li a pulwa lwiikando iyali epulo lya faathana taku ti: “Ondi na okuninga shike, ndi mone omwenyo gwaaluhe?” Oshikando kehe okwa li a yamukula momukalo gwi ili. (Luk. 10:25-28; 18:18-20) Uuna tatu ilongekidha natu kaleke omukonakoni gwetu momadhiladhilo. Omanyolo geni ngoka inaaga tothwa mo tu na okulesha naye? Otu na okulesha oshitopolwa shi thike peni? Iitsa yini moshileshwa omukonakoni ke uvite ko nawa nenge iidhigu oku yi taamba ko? Ngele otwi ilongekidha omapulo ngoka omukonakoni tashi vulika a ka pule, otatu ke mu pa omayamukulo ngoka tage mu mbilipaleke.
4. Okwiilongekidha nawa okwa kwatela mo shike?
4 Ilongekidha: Kutya nduno oshitopolwa owe shi konakona nale iikando oyindji, otashi ka kala oshikando shotango to shi konakona nomukonakoni ngoka. Ngele otwa hala tu adhe omutima gwe nena otu na okwiilongekidha nawa oshikando kehe tatu ka konakona. Ngele tatu shi ningi nena otatu ladhipike wo aakonakoni yetu ye shi ninge. Okwiilongekidha okwa kwatela mo okulesha omanyolo ngoka inaaga tothwa mo nokutenda iitsa ya simana nokukaleka omukonakoni momadhiladhilo. — Rom. 2:21, 22.
5. Ongiini tatu vulu okuholela Jehova?
5 Jehova oku na ohokwe lela mehumokomeho lyomukonakonimbiimbeli kehe. (2 Pet. 3:9) Ngele ohatu kongo ethimbo tu ilongekidhile ekonakonombiimbeli kehe, otatu ulike kutya otu na ohokwe ya faathana.