Otu li Oonzapo ethimbo alihe
1. Oshike tatu ilongo mehokololo lyaJesus lyokugandja uunzapo komukiintu ngoka a li e ya pomuthima?
1 Oshikando shimwe konima sho Jesus a li e ende oshinano oshile uule woowili dhontumba, okwa li a vulwa nokwa sa enota. Omanga aalongwa ye ya ka landa iikulya, Jesus okwa kuutumba pomuthima moshilando shaSamaria a vululukwe po. Ka li e ya okuuvitha muSamaria, ihe okwa li a piti mo owala opo a ka tsikile nuukalele we kuGalilea. Nonando ongaaka, okwa li a longitha ompito ndjoka okuuvithila omukiintu ngoka a li e ya okuteka omeya. (Joh. 4:5-14) Omolwashike mbela? Molwaashoka Jesus okwa li ethimbo alihe “omuhokololi omudhiginini nomunashili” gwaJehova. (Eh. 3:14, OB-1954) Otu na okuholela Jesus tu kale Oonzapo dhaJehova ethimbo alihe. — 1 Pet. 2:21.
2. Ongiini tatu vulu okwiilongekidha tu gandje uunzapo wontukuluka?
2 Kala wi ilongekidha: Otatu vulu okwiilongekidha okugandja uunzapo wontukuluka mokukala tu na iileshomwa ethimbo alihe. Aauvithi oyendji ohaye ende nuutraktate, mboka haya gandja kaaniilonga yomoositola, yopomahooli naayehe mboka taya tsakaneke momukokomoko gwesiku. (Omuuv. 11:6) Omumwameme ngoka ha yi molweendo olundji oha kala aluhe e na Okambiimbeli okashona nembo Omalongo gwOmbiimbeli mokandjato ke noha kambadhala okutameka oonkundathana naamboka ya kuutumba ontega naye.
3. Ongiini tatu vulu okutameka oonkundathana?
3 Tameka oonkundathana: Uuna tatu gandja uunzapo wontukuluka, katu na okutameka efalomo lyetu nEnyolo lyontumba. Sho Jesus a li a tameke oonkundathana nomukiintu pomuthima, ini iholola ye mwene tango kutya oye Mesiasa. Ihe okwa li e mu pula omeya opo a penduthe ohokwe muye. (Joh. 4:7-9) Omumwameme gumwe okwa li a tameke oonkundathana konima sho a li a pulwa ngele oku hole okudhana omasiku gomafudho. Pehala lyokuyamukula shu ukilila kutya ihe ga dhana molwaashoka ye Oonzapo yaJehova, okwa ti: “Onda tokola paumwene kaandi ga dhane.” Nakupula okwa li a hala a tseye kutya omolwashike, naashoka osha ningitha omumwameme a gandje uunzapo.
4. Omolwashike Mateus 28:18-20 e li eladhipiko kungoye?
4 Nonando Jesus okwa mana uukalele we kombanda yevi nuulaadhi, oku na natango ohokwe onene opo iilonga yokuuvitha yi tsikile ngaashi a li e shi ningi. (Mat. 28:18-20) Onkee ano, ngaashi Jesus Oshiholelwa shetu, natse otu na okukala Oonzapo ndhoka dhi ilongekidha okugandja uunzapo ethimbo kehe. — Heb. 10:23.