‘Edhina lyaKalunga nali yapulwe’
1. Oshipalanyolo shoshigongi shoshikandjo shomumvo gwiilonga 2012 oshini, nosha kankamena koohapu dhini?
1 Otu na uuthembahenda unene shili sho twa lukilwa edhina lyOmunamapangelo agehe, Jehova. Oye mwene e tu pa edhina ndyoka twa tseyikila tu li Oonzapo dhaJehova, na unene tuu okuza mo 1931, otwa kala hatu ithanwa nedhina lyaJehova ndyoka lyi ikalekelwa. (Jes. 43:10) Omwana gwaKalunga epona, Jesus, okwa lenga edhina ndyoka noonkondo, nolyo a popi tango megalikano ndyoka a longo aalanduli ye. (Mat. 6:9) Oshipalanyolo shetu shoshigongi shoshikandjo shomumvo gwiilonga 2012, osha kankamena koohapu dhaJesus ndhoka tadhi ti: ‘Edhina lyaKalunga nali yapulwe.’
2. Iipopiwa yimwe po mbyoka tatu ka uva poshigongi oyini?
2 Shoka tatu ku uva: Olyomakaya otatu ka pewa oshipopiwa shi na oshipalanyolo: “Tseyithila yalwe edhina lyaKalunga wu li omulongi gwethimbo lyu udha,” notashi ke tu kwathela tu mone kutya omolwashike iilonga yethimbo lyu udha tayi tu mbilipaleke monkalamwenyo yetu. Otatu ka pulakena wo kiipopiwa ya pambathana yi na oshipalanyolo: “Takamitha opo waaha shekithe edhina lyaJehova,” notayi ke tu kwathela opo twaaha ye moomwigo ne ndhoka tadhi vulu oku tu yula. Oshipopiwa shi na oshipalanyolo: “Omolwashike edhina lyaKalunga li na okuyapulwa,” otashi ka yamukula omapulo taga landula: Oshike tashi ke tu kwathela tu tsikile nokuuvitha nuuladhi uuna tu wete aantu ya fa kaaye na naanaa ohokwe metumwalaka lyetu? Oshike tashi ke tu kwathela tu pondole muukalele? Iipopiwa ine ya pambathana otayi ka gandjwa mOsoondaha notayi ke tu kwathela nkene tu na okuyapulitha edhina lyaKalunga mokudhiladhila kwetu, mokupopya, mokuninga omatokolo nosho wo meihumbato lyetu. Mboka aape otaya ka nyanyukilwa oshipopiwa shomontaneho shi na oshipalanyolo: “Jehova ota ka yapulitha edhina lye enene puArmagedon.”
3. Otu na uuthembahenda wuni, noshigongi otashi ke tu kwathela ngiini?
3 Masiku Jehova ota ka katuka onkatu a yapulithe edhina lye. (Hes. 36:23) Ihe omanga twa tegelela shi ningwe otu na uuthembahenda unene wokutseyithila yalwe eityo lyedhina lyaJehova eyapuki. Molwaashoka otwa lukilwa edhina lye, otu na einekelo kutya oshigongi shoka otashi ka kwathela kehe gumwe gwomutse a gwanithe po oshinakugwanithwa she sha kwata miiti shokutseyitha edhina lyaKalunga.