Iimoniwa

◼ Australia: Omulumentu gumwe a longekeka gwedhina, John, okwa li hayi kongeleka sho okanona. Ihe konima yethimbo okwa kala ‘ini itaala muKalunga’ nando eta. Omukokolindjila gumwe okwa li e mu pe okabroshure Was Life Created? nokonima sho e ke mu talela po ishewe okwa li e mu thigile okabroshure Origin of Life. Omukokolindjila okwa kala nokukokeka ohokwe ye moku mu etela iifo mbyoka opo ya piti, noku mu ulukila iitopolwa mbyoka tayi popi kombinga yeshito nenge kombinga yomahunganeko gOmbiimbeli. Sho a mono kutya John ote ya nawa okwa li e mu pe embo The Bible — God’s Word or Man’s? Sho John a tameke oku li lesha okwa ti: ‘inandi itaala muKalunga,’ ihe meitaalo ndyoka inandi pwila mo naanaa. Omukokolindjila okwe mu pe embo Omalongo gOmbiimbeli, e ta yanuna pepandja 20 e te mu ulukile okatendo 8. Okwa yi ishewe pepandja 23-24 e te mu ulukile okatendo 13-16. Omanyolo ngoka ge etwa po oga li ga gumu John noonkondo e ta ti: “Otashi vulika nda pumbwa nani okulesha Ombiimbeli ishewe.”

◼ Meksiko: Omulumentu gumwe okwa li a lombwele omumwatate kutya Ombiimbeli inayi nyolithwa kuKalunga. Omumwatate okwe mu pula e mu ulukile kutya Ombiimbeli yo yene otayi ti ngiini. Omutima gomulumentu ngoka ogwa li gwi inyengithwa kwaashoka i ilongo mOmbiimbeli, konima owala sho ya kundathana po kashona. Okwa li a kumwa unene tuu sho u uvu kombinga yomithikampango dhopakalunga. Okwa lombwele omumwatate a ti: “Sho ngame nangoye twa li hatu lesha Ombiimbeli pamwe, omayele gayo kaga li haga gumu ndje, molwashoka oga li owala ga fa omayele gomambo galwe. Ihe ngashingeyi sho tatu yi lesha, ohashi gumu omutima gwandje, uunene tuu uuna tatu lesha omayele ngoka ga pamba uuyogoki wopamikalo.”

◼ Amerika: Aaihokani yamwe oya li ya popi nomukiintu a za koTaiwan sho ye li miilonga yi ikalekelwa yokuuvitha miilando iinene. Omukiintu ngoka okwiitaala muKalunga, ihe okwa li u uvite kutya Ombiimbeli oyi li embo lyaantu mboka ya za kiilongo yuuninginino. Nonando okwa li omukengeli, okwa li e wete a kambelasha monkalamwenyo ye. Onkee ano, okwa li e ya poshitaafula shiileshomwa shaiihokani mboka. Okwa li e na einekelo kutya Ombiimbeli otayi ke mu kwathela a mone elalakano lyonkalamwenyo. Aaihokani oya tameke okukonakona naye membo Omalongo gOmbiimbeli nosho wo mokabroshure Lasting Peace and Happiness — How to Find Them. Pehala lyokutameka nontopolwa 2 membo Omalongo gOmbiimbeli oya tameke naye oshitopolwa mokabroshure shoka shi na oshipalanyolo: “A Guidebook for the Blessing of All Mankind.” Konima owala sho ya lesha uutendo uhamano moshitopolwa shoka, omukiintu okwa li a kuminwa uushili mboka kutya Ombiimbeli oyi ikalekelwa lela oku yi yelekanitha niinyolomwa yilwe yomalongelokalunga. Konima sho ya tala nkene omahunganeko gOmbiimbeli ga gwanithwa, omukiintu ngoka okwa ti: “Kapu na we embo limwe tandi dhiladhila ndyoka li na uushili ngaashi Ombiimbeli.”

◼ Japan: Omulumentu gumwe okwa li a lombwele omuuvithi gUukwaniilwa kutya ye ini itaala muKalunga. Ihe nonando ongaaka, omuuvithi okwa kala noku mu talela po nokukundathana naye paufupi iitopolwa yomo-Awake! yi na oshipalanyolo: “Was It Designed?” Omulumentu okwe ende ta lundulula etaloko lye kashona nakashona. Okwa tameke okuzimina kutya oku na okukala ku na Omushiti. Ngashingeyi omulumentu ngoka okwiitaala thiluthilu kutya Kalunga oko e li, nomuuvithi ota tsikile okukonakona naye mokabroshure Onkundana ombwanawa ya za kuKalunga.

◼ Kanada: Omumwameme gumwe okwa li a gandja oshifo shoka opo sha piti komukiintu gumwe ngoka a li ta zi megumbo lye u uka kohauto ye. Ihe sho omumwameme a shuna ko kuye, omukiintu okwa li e mu lombwele a tokola a mana kutya ye ke na ohokwe, ye natango ini itaala muKalunga. Omumwameme ina shuna omutse miipeta, ihe okwa tokola e mu etele okabroshure: A Satisfying Life — How to Attain It. Sho omumwameme a adha mo omukiintu ngoka megumbo, okwe mu lombwele kutya nonando oku shi shi kutya ini itaala muKalunga, okwa kala ta dhiladhila kombinga ye molwaashoka omumwameme oku shi shi kutya oku li omuvali ngoka ta tekula oyana oye awike. Omumwameme okwa penuna pepandja 4 lyokabroshure noku mu ulukila okatendo 6 hoka taka kundathana mpoka tatu adha omayele omawanawa. Omumwameme okwe mu ladhipike a leshe oshileshwa 2 shoka tashi popi kombinga yokuputudha aanona. Omukiintu okwa li a nyanyukwa sho a pewa okabroshure hoka.