Ino kala owala wa mwena sho to longo nagumwe muukalele
1. Otatu vulu ngiini okuholela omuyapostoli Paulus sho tatu longo nayalwe muukalele?
1 Omuyapostoli Paulus okwa li a tala ko ethimbo ndyoka ha kala nooitaali ooyakwawo li li ethimbo ‘lyokutsaathana omukumo.’ (Rom. 1:12) Uuna to longo nomuuvithi omukweni, mbela oho longitha ngaa ompito ndjoka wu mu tse omukumo noku mu kwathela? Pehala lyokukala owala wa mwena, popya shoka hashi ku kwathele wu pondole muukalele.
2. Otatu vulu okuninga shike opo tu tse ngoka tatu longo naye momapya omukumo, nomolwashike sha simana?
2 Ya tsa omukumo: Aauvithi yamwe ihaya kala naanaa ye na omukumo sho taya uvitha. Shika oto shi iyuvile momutono gwewi lyawo nohashi imonikila wo meholokopo lyawo lyokoshipala. Otatu vulu oku ya tsa omukumo moku ya pandula. Ongiini ishewe tatu vulu oku ya tsa omukumo? Omutonateli omweendi gumwe oha hokololele omuuvithi ngoka ta longo naye kombinga yuumbanda mboka ha kala e na nosho wo nkene ha pula ekwatho megalikano opo e wu sinde. Omumwatate gumwe okwa popi kombinga yaashoka hashi mu kwathele opo a kale nomukumo, a ti: “Shotango, ohandi imemeha. Omathimbo gamwe ondi na okupula ekwatho megalikano, opo ndi vule oku shi ninga.” Mbela opu na shoka she ku kwathela wu kale wu na omukumo muukalele? Oshike itoo shi hokololele ngoka tamu longo naye momapya?
3. Oshike tatu vulu okulombwela ngoka tatu longo naye, shoka tashi vulu oku mu kwathela a pondole muukalele we?
3 Lombwela yalwe omikalo dhi ili nodhi ili dhokuuvitha: Mbela owu na po epulo ewanawa ndyoka hali pendutha ohokwe momunegumbo, pamwe kombinga yoshinima shontumba sha ningwa moshitopolwa? Nenge owu na po oshiholelwa shefalomo ndyoka wa zula nawa nohali ku etele iizemo iiwanawa? Li lombwela mukweni. (Omayel. 27:17) Manga mu uka keishunoko, oto vulu okulombwela ngoka mu li naye shoka wa hala oku ka kundathana nomuntu ngoka mu uka kuye nankene to ke shi ninga. Konima yekonakono, oto vulu okulombwela ngoka mu li naye kutya omolwashike wa kundathana nomunegumbo oshitsa nenge enyolo lyontumba, nenge omolwashike wa longitha omukalo gwontumba okukwathela omunegumbo.
4. Omolwashike tu na okukala twa hala okukwathela aauvithi ooyakwetu?
4 Aauvithi yomethelemumvo lyotango kaya li owala ya hala okukwathela mboka kaaye shi ooitaali. Oya li wo ye shi kutya osha simana okutsa yalwe omukumo noku ya nkondopaleka. (Iil. 11:23; 15:32) Omuyapostoli Paulus okwa li a dheula Timoteus manga a li omugundjuka nokwa li e mu ladhipike a lombwele wo yalwe shoka i ilonga. (2 Tim. 2:2) Ngele itatu dhimbwa okuningila Aakriste ooyakwetu uuwanawa uuna tu li muukalele, itatu ka gwedha ko owala kenyanyu lyawo noku ya kwathela ya kale haya pondola, ihe otashi ka nyanyudha wo Tate yetu gwomegulu. — Heb. 13:15, 16.