Okuhwepopaleka uunkulungu wetu muukalele — Kwathela ngoka to longo naye

Etompelo kutya omolwashike sha simana: Jesus okwa li a mono kutya osha simana okulonga nagumwe muukalele. Onkee sho a tumu aalongwa ye 70 ye ku uvithe, okwa li e ya tumu kooyaali. (Luk. 10:1, yelekanitha OB-1954.) Ngoka ta longo namukwawo ota vulu oku mu kwathela uuna pwa holoka onkalo ondhigu nenge uuna keehe shi nkene e na okuyamukula omunegumbo. (Omuuv. 4:9, 10) Ota vulu oku mu lombwela iimoniwa ye nopoompito dhimwe te mu pe omaetopo ngoka tashi vulika ga kwathele ngoka ta longo naye a kale omuuvithi a pyokoka. (Omayel. 27:17) Ota vulu wo e mu ladhipike moku mu lombwela iinima tayi tungu uuna ya zi megumbo limwe yu uka mekwawo. — Fil. 4:8.

Nkene tatu vulu oku shi ninga:

Kala ho pulakene uuna ngoka tamu longo naye ta gandja uunzapo. (Jak. 1:19) Uuna tapu leshwa enyolo, landula mOmbiimbeli yoye. Shika otashi ke ku pa ompito wu kwathele mpoka sha pumbiwa.
Longitha oondunge dhokuyoolola opo wu mone kutya opompito yini wu na okuya mo moonkundathana. (Omayel. 25:11) Uuna wa yi nomuuvithi gulwe kekonakombiimbeli lye, oto vulu okuninga omatyokosha omashona. Ihe ngele to uvitha egumbo negumbo, ngoka to longo naye otashi vulika a kale a hala wu mu ethe a popye ngele ompito ye ya thiki. Ihe ngele omuuvithi omupe, nenge ngele ke shi kutya na yamukule ngiini epulo, nenge omuntu ngoka ta pataneke, otashi vulika a ka pandule ekwatho lyoye. Ihe kutya nduno oto longo egumbo negumbo, omaishunoko, nenge oto ningi ekonakonombiimbeli nomuuvithi omukweni, ino mu kwata melaka, wu kwate ko oonkundathana, nenge wu popye shimwe shi ili kaashi shi kombinga yaashoka tamu kundathana.
Popya kombinga yiimoniwa yoye. Ngele pompito yimwe oto vulu okupa omuuvithi ngoka to longo naye eetopo ndyoka tali mu kwathele a kale ha pondola muukalele, ino kala inoo shi ninga. (Omayel. 3:27) Pompito mpoka tashi opalele, oto vulu wu mu lombwele to ti: “Sho to tala owe shi enditha nduno ngiini?” nenge “Mbela otandi vulu oku ku pa eetopo lyontumba?” nenge “Ngame ohandi kambadhala okuninga nge.” Shi kaleka momadhiladhilo kutya nonando yalwe ohaya pandula okupewa eetopo pompito yontumba, otashi ke ya teya omukumo ngele ya lombwelwa epuko kehe ya ninga.

Kambadhala oku shi ninga momwedhi nguka:

Uuna wa longo nagumwe muukalele, mu lombwela shoka a popi nenge shoka a ninga she ku kwathela.