Nkene tatu vulu okuhwepopaleka uunkulungu wetu muukalele — Okuuvitha okupitila mokambako kopomweelo

Omolwashike sha simana: Okuuvitha okupitila mokambako kopomweelo ohaku vulu okukala taku tilitha. Oshike tatu vulu okuninga po opo eshongo ndika kaali nkundipaleke uulaadhi wetu wokulonga iilonga iiwanawa? Shi kaleka momadhiladhilo kutya okuuvithila aantu okupitila mokambako kopomweelo otaku vulu okukala okwo owala omukalo moka to vulu okuuvithila aantu yamwe onkundana ombwanawa. (Rom. 10:14) Iimoniwa oye shi ulika kutya okugandja uunzapo momukalo tagu pondola otaku vulu okuningwa momukalo nguka. (Tala o-2011 Yearbook, ep. 65-66 nosho wo o-2000 Yearbook, ep. 54, okat. 3.) Natu tale komaetopo taga landula.

Nkene tatu vulu oku shi ninga:

Ilongekidha efalomo efupi, e to li nyola opo wu ka vule oku li leshela omunegumbo okupitila mokambako kopomweelo. Shika otashi ke ku kwathela wu kale wu na omukumo. Petameko, popya kutya elalakano lyetalelopo lyoye olyashike. Tumbula edhina lyomunegumbo ngele olyu ulikwa membo lyootelefona. Hulitha oonkundathana noku mu lombwela kutya oto mu etele okatraktate nenge oshifo shoka shi na uuyelele wa gwedhwa po (nenge wu shi thige momweelo gwe).
Kala wu na etaloko ewanawa. Imemeha nokwiinyenga ngaashi andola to popi nomuntu oshipala noshipala.
Kala wa manguluka, ino kala owala ongoye to popi. Popya newi lya yela noli uvitikiwe ko nawa. Ino kala to popi to mwena po inaashi pumbiwa, ngoye ino popya to endelele.
Longitha oondunge dhokuyoolola. Momatungo omanene, otashi vulika mu kale mu na uumbako owundji. Otashi ka kala shi li nawa wu longe owala oondunda oonshona, e to ndhindhilike mpoka wa hulile. Aakalimo otashi vulika ya tameke okukala ya limbililwa ngele otwa kala mpoka hapu thikilwa ethimbo ele opo tu popye pokambako kehe.

Kambadhala oku shi ninga momwedhi ngu:

Pelongelokalunga lyeni lyuukwanegumbo idheuleni tamu shi ningi mwa pilamenathana.