Oto ilongekidhile ngaa Edhimbuluko?

Opaasa yaJesus ya hugunina oya li tayi ka kala ya simana. Molwaashoka okwa li e li poku ka dhipagwa, okwa longekidha opo a lye Opaasa pamwe naayapostoli ye nokwa li a dhike po edhimbuluko ndyoka lya li tali ka kala hali ningwa aluhe komumvo, ano Uulalelo wOmuwa. Onkee okwa li a tumu Petrus naJohannes ya ka longekidhe ondjugo. (Luk 22:7-13; tala ethano lyokombanda.) Shika otashi tu dhimbulukitha kutya otu na okwiilongekidhila Edhimbuluko ndyoka ta li ka ningwa 27 Maalitsa. Omagongalo otashi vulika ga longekidha nale omupopi, omandhindhiliko, nosho tuu. Ihe oshike tatu vulu okuninga pauhandimwe, opo tu ilongekidhile Edhimbuluko?

Longekidha omutima gwoye. Lesha nokutedhatedha kElesho lyOmbiimbeli lyEdhimbuluko. Elandulathano otali adhika mokambo Konakona Omanyolo esiku kehe. Mokambo Ekwatho kungoye wi ilonge Oohapu dhaKalunga montopolwa 16 omu na elandulathano li na uuyelele owundji. (Tala wo Okafo Onkalamwenyo yopaKriste niilonga yetu yokuuvitha kaApilili 2020.) Omaukwanegumbo otaga vulu okumona uuyelele kombinga yankene ekulilo lya simana mboka taga vulu okukonakona pethimbo lyelongelokalunga lyuukwanegumbo wago mo-Watch Tower Publications Index nenge mEmbo lyokukonga uuyelele lyOonzapo dhaJehova.

Hiya yalwe. Kutha ombinga moshikonga shokuhiya aantu kEdhimbuluko. Dhiladhila kombinga yaamboka to vulu okuhiya, ngaashi mboka ho talele po, mboka wa li ho konakona nayo Ombiimbeli, aantu mboka wu shi nosho wo aakwanezimo. Aakuluntugongalo naya shilipaleke kutya oya hiya mboka inaayi ipyakidhila we. Ngele ngoka wu shi ke li moshitopolwa sheni, oto vulu okukonga ethimbo nehala mpoka tapu ka ningilwa Edhimbuluko moshitopolwa moka e li, to thindi mpoka pwa nyolwa KOMBINGA YETU, pombanda kepandja lyetu kointaneta, e to thindi mpoka pwa nyolwa “Edhimbuluko.”

Oshike ishewe tatu vulu okuninga, opo tu ilongekidhe?