Longitha nawa ethimbo kehe wu na muukalele
Momumvo gwiilonga 2014, Oonzapo dhaJehova odha li dha longo muukalele oowili 1 945 487 604. Shika oshi li euliko lya yela kutya otwa halelela okukala twi ipyakidhila miilonga yaJehova. (Eps. 110:3; 1 Kor. 15:58) Ombiimbeli otayi ti: “Ethimbo ndyoka lya hupa ko efupi.” Mbela itatu vulu oku li longitha nawa muukalele tu lombwele aantu oyendji oshili yOmbiimbeli? — 1 Kor. 7:29, NW.
Opo tu longithe nawa ethimbo lyetu muukalele otu na okukala hatu tifuka. Mbela oho longitha owili, nenge ethimbo li vulithe po inoo popya naantu, mokukala owala wi ipyakidhila niinima ya pamba uukalele? Ngele osho, mbela ito vulu okuninga po sha wu popye nayo? Otu shi kutya omidhingoloko inadhi faathana. Ihe omaetopo taga landula otaga vulu ku ku kwathela wu longithe nawa ethimbo lyoye muukalele. Uuna to shi ningi ito ka ‘dhenga mombepo.’ — 1 Kor. 9:26, OB-1954.
Okuuvitha egumbo negumbo: Uule womimvo odhindji, aauvithi oyendji oya kala nondjigilile yokuuvitha egumbo negumbo ethimbo lyongula. Ihe aantu oyendji momagumbo ohaya meneka mo yu uka kiilonga. Mbela ito vulu okukala ho uvitha egumbo negumbo ethimbo lyokomatango nenge kongulohi? Ethimbo ndyoka aantu oyendji ohaya kala momagumbo, yo ihaya kala unene yi ipyakidhila. Momukokomoko gwesiku, okugandja uunzapo womepandaanda nopomahala goongeshefa otashi vulika ku ete iizemo iiwanawa.
Uunzapo womontaneho: Iitaafula nuutemba wokuulika iileshomwa nayi tulwe pomahala mpoka hapu ende aantu oyendji moshitopolwa moka egongalo lyeni hali uvitha. (Tala Uukalele Wetu wUukwaniilwa waJuli 2013, ep. 5.) Ihe ongiini ngele pehala mpoka hapu kala iitaafula nuutemba wokuulika iileshomwa ihapu ende we aantu oyendji? Okomitiye yIilonga yEgongalo otayi vulu okukonga ehala lilwe mpoka hapu ende aantu oyendji.
Omaishunoko nOmakonakonombiimbeli: Ethimbo lini hali kala lyo opala okuya komaishunoko nOmakonakonombiimbeli? Mpoka tashi vulika shi ninga pethimbo ndyoka aantu itaya inyenganyenga moshitopolwa. Pashiholelwa, ngele ohamu longo egumbo negumbo ongula yOlyomakaya, otashi ka kala shi li nawa okuya kOmakonakonombimbeli pethimbo lyomutenya nenge lyokomatango. Uuna tamu yi komaishunoko, otashi ka kala shi li nawa ngele tamu i topola muungundu, opo mu vule okulonga oshindji muukalele.
Odhoshili kutya otu na okuyalula oowili dhetu ndhoka twa longa. Ihe oshike hashi tu nyanyudha unene muukalele? Ongele twa pondola mo sha. Owu na okuninga po shike ngele owa mono kutya opu na omukalo ngoka ihagu pondola pethimbo lyontumba moshitopolwa sheni? Kambadhala omikalo dhilwe. Shimwe ishewe, galikana kuJehova “Mwene gweteyo,” opo e ku pe omayele wu vule okulongitha nawa ethimbo lyoye muukalele. — Mat. 9:38, NW.