Shoka aantu haya ti kombinga yokugalikana
MARIA ota ti: “Uuna tandi galikana, ohandi kala ndu uvite Kalunga e li pungame, a kwata ndje moshikaha nota wilike ndje uuna ndu uvite nda kana.”
RAÚL ota ti: “Omukulukadhi gwandje okwa si kokankela konima sho a kala nayo omimvo 13. Otandi dhimbulukwa nda li handi galikana kuKalunga esiku kehe nonda li ndu uvite kutya okwa li lela ha kala a pulakena ndje muuwehame wandje. Onda li ndu uvite ombili.”
ARNE ota ti: “Egalikano omagano omawanawa ngoka Kalunga a pa aantu.”
KuMaría, Raúl, Arne nayalwe oyendji, egalikano omagano ge na ongushu. Ayehe oyu uvite kutya otaya vulu okupopya naKalunga, oku mu pandula nokukonga ekwatho kuye okupitila megalikano. Oyi itaala nomutima aguhe oohapu ndhika dhomOmbiimbeli kombinga yokugalikana kuKalunga tadhi ti: “Osho ngeyi otatu vulu okuhedha kuKalunga tu na omukumo, oshoka ngele tatu mu indile shaa shoka she mu opalela, oye ote tu uvu ethimbo kehe ndyoka tatu mu indile.” — 1 Johannes 5:14.
Ihe aantu yalwe oyendji ohaye shi mono oshidhigu okwiitala shoka Ombiimbeli tayi ti kombinga yegalikano. Steve ota hokolola kutya okwa li ha kala uvite ngiini kombinga yegalikano. Ota ti: “Sho nda gwanitha omimvo 17, ookuume kandje yatatu oya li ya si miiponga iyali ya yoolokathana. Gumwe okwa si moshiponga shohauto, nayaali oya si omeya mefuta.” Steve okwa ningi po shike? Ota ti: “Onda galikana kuKalunga a yamukule ndje kutya omolwashike iinima ayihe mbyoka ya ningwa, ihe inandi mona eyamukulo. Onkee ondi ipula nda ti ‘Omolwashike ndi na okutsikila okugalikana?’” Aantu oyendji oyu uvite kutya omagalikano gawo ihaga yamukulwa, onkee ohayi pula kutya omolwashike ye na okutsikila nokugalikana.
Aantu ohayi ipula wo ngele osha simana ngaa okugalikana omolwomatompelo galwe. Yamwe ohaya ti kutya molwaashoka Kalunga iinima ayihe oku yi shi, nena oompumbwe dhetu nomaupyakadhi getu oku ga shi, onkee inatu pumbwa oku ge mu lombwela.
Yalwe oyi itaala kutya Kalunga iha pulakene omagalikano gawo, omolwomapuko ngoka ya ninga monakuziwa. Jenny ota ti: “Uupyakadhi wandje uunene owo kutya, ohandi kala ndu uvite kaandi na nando oshilonga sha sha. Onda ninga iinima mbyoka handi ipe ombedhi omolwayo, onkee ohandi ilombwele kutya inandi gwana okupulakenwa kuKalunga.”
Owu uvite ngiini kombinga yokugalikana? Ngele nangoye osho ho kala twi ipula ngawo nenge wa limbililwa kombinga yegalikano, Ombiimbeli otayi vulu oku ku pa omayamukulo taga mbilipaleke kombinga yokugalikana ngoka taga vulu oku ku hekeleka. Otatu vulu okwiinekela shoka Ombiimbeli tayi ti kombinga yegalikano;a otayi vulu oku ku kwathela wu mone omayamukulo komapulo ngaashi:
Mbela Kalunga ohu uvu ngaa shili omagalikano getu?
Omolwashike omagalikano gamwe ihaaga yamukulwa?
Owu na okugalikana ngiini e to uvika kuKalunga?
Omagalikano otaga vulu ngiini oku ku kwathela?
a MOmbiimbeli omu na omagalikano gaapiya oyendji yaKalunga, mwa kwatelwa nogaJesus Kristus. MOmanyolo gOshihebeli ngoka haku tiwa Etestamendi Ekulu, omu na omagalikano ga konda 150.