Ontopolwa 18

Shi Ninga Elalakano Lyoye Okulongela Kalunga Sigo Aluhe

1, 2. Kakele kokukala u na ontseyo okutseya Kalunga, oshike tashi pulwa?

NATU tye nduno kutya ngoye owa thikama pomweelo gwa patwa gwokuya mela moka mu na omaliko ga simana. Natu tye kutya omuntu ngoka e na uuthemba wapo okwe ku pe oshipatululo e te ku lombwele kutya miinima mbika yi na ongushu oto vulu okukutha mo. Oshipatululo shoka itashi ke ku kwathela sha ngele ito shi longitha. Sha faathana, ontseyo ou na oku yi longitha ngele owa hala yi ku kwathele.

² Shika osho shi li wo ngawo unene tuu shi na ko nasha nontseyo okutseya Kalunga. Dhoshili, ontseyo yashili okutseya Jehova Kalunga naJesus Kristus otayi ti omwenyo gwaaluhe. (Johannes 17:3) Ihe etimaumbwile ndyoka itali vulu okumonika mokukala owala u na ontseyo. Ngaashi naanaa to ka longitha oshipatululo shi na ongushu, ontseyo okutseya Kalunga ou na oku yi longitha monkalamwenyo yoye. Jesus okwa ti kutya mboka taya longo ehalo lyaKalunga otaya ka ‘ya muukwaniilwa.’ Aantu ya tya ngaaka otaya ka kala ye na uuthembahenda okulongela Kalunga sigo aluhe!—Mateus 7:21, KB; 1 Johannes 2:17.

3. Ehalo lyaKalunga olyo shike kutse?

³ Konima yokwiilonga kutya ehalo lyaKalunga olyo shike, osha simana noonkondo oku li longa. Oto dhiladhila mbela kutya ehalo lyaKalunga olyo shike kungoye? Otali vulu okukwatelwa kumwe nawa noohapu ndhika: Holela Jesus. Petrus gwoTango 2:21 ote tu lombwele: “Osho tuu shika mwe shi ithanenwa, oshoka naKristus okwe mú hepekelwa nokwe mú thigile oshiholelwa, mu landule [naanaa, NW] oompadhi dhe.” Opo u longe ehalo lyaKalunga, ou na ano okulandula oshiholelwa shaJesus naanaa ngaashi tashi vulika. Ontseyo okutseya Kalunga osho u na oku yi longitha ngawo.

NKENE JESUS A LONGITHA ONTSEYO OKUTSEYA KALUNGA

4. Omolwashike Jesus a tseya oshindji kombinga yaJehova, nongiini ye a longitha ontseyo ndjika?

⁴ Jesus Kristus okwa tseya lelalela Kalunga e vule yalwe. Okwa kala nokwa longo pamwe naJehova Kalunga megulu uule womathelemimvo manga inee ya kombanda yevi. (Aakolossa 1:15, 16) Ihe Jesus ontseyo ayihe ndjoka okwe yi longitha shike? Ka li a mbilipalelwa kokukala owala e yi na. Jesus okwa kala payo. Shika osho molwashono ye a li omunalukeno, omwiidhidhimiki nomunahole mokukala kwe naantu ooyakwawo. Jesus okwa li a holele ano He gwomegulu nokwa longo ta tsu kumwe nontseyo ye okutseya oondjila dhaJehova nuukwatya we.—Johannes 8:23, 28, 29, 38; 1 Johannes 4:8.

5. Omolwashike Jesus a li a ninginithwa, nongiini a kala paityo lyeninginitho lye?

⁵ Ontseyo ndjoka Jesus a li e na, oye mu inyengitha wo a katuke onkatu ya simanenena. Okwa zi kuGalilea te ya kOmulonga gwaJordan, hoka a ninginithwa kuJohannes. (Mateus 3:13-15, yelekanitha NW.) Eninginitho lyaJesus olya thaneke shike? E li Omujuda, okwa li a valwa moshigwana shi iyapulila Kalunga. Onkee ano Jesus okwa li i igandja okuza pevalo. (Eksodus 19:5, 6) Mokuninginithwa, ye okwa li i igandja kuJehova okulonga ehalo lyaKalunga okuza ethimbo ndyoka. (Aaheberi 10:5, 7) Jesus nokwa kala paityo lyeninginitho lye. Okwa kala i itula miilonga yaJehova, nopompito kehe okwa tseyithile aantu ontseyo okutseya Kalunga. Jesus okwa li a nyanyukilwa okulonga ehalo lyaKalunga, nokwa ti nokuli kutya shika osha li sha fa iikulya kuye.—Johannes 4:34.

6. Okomukalo guni Jesus i idhimbike ye mwene?

⁶ Jesus okwa li a tseya thiluthilu kutya okulonga ehalo lyaJehova otashi ke mu pula oshindji noonkondo—kutya otashi ke mu kotha nokuli omwenyo gwe. Nonando ongaaka, Jesus okwa li i idhimbike ye mwene, nokwa ningi oompumbwe dhe dhopaumwene oshinima oshitiyali. Okulonga ehalo lyaKalunga okwa li aluhe oshinima shotango. Ongiini mbela tatu vulu okulandula oshiholelwa shaJesus sha gwanenena moshinima shika?

OONKATU NDHOKA TADHI FALA KOMWENYO GWAALUHE

7. Oonkatu dhimwe odhini omuntu e na okukatuka opo a kale a gwana okuninginithwa?

⁷ Tse inatu gwanenena ngaashi Jesus, notatu vulu owala okwaadha oshitsa sha simana sheninginitho konima yokukatuka oonkatu dhilwe dha simana noonkondo. Shika otashi tameke mokutaamba ko momitima dhetu ontseyo yashili okutseya Jehova Kalunga naJesus Kristus. Shika ngele tatu shi ningi otashi tu kaleke neitaalo tali longo nosho wo ohole onene yokuhola Kalunga. (Mateus 22:37-40; Aaroma 10:17; Aaheberi 11:6) Okugwanitha oompango, omithikampango nomakotampango yaKalunga oku na oku tu inyengitha tu iyele ombedhi, tu nikile oluhodhi lwopakalunga oondjo dhetu dhonale. Shika otashi fala meitedhululo, sha hala okutya, tse otwi igaluluka notwa thiga po ondjila kehe ya puka ndjoka twa li twa landula sho twa li kaatu na ontseyo okutseya Kalunga. (Iilonga 3:19) Ngele ohatu longo natango uulunde wontumba meholamo pehala lyokulonga shoka shi li pauyuuki, inatu igaluluka shili noinatu pukitha Kalunga nando. Jehova uufudhime auhe ohe u mono.—Lukas 12:2, 3.

8. Ou na okuninga shike uuna wa hala okutameka okukutha ombinga miilonga yeuvitho lyUukwaniilwa?

⁸ Ngashingeyi sho wa kala to mono ontseyo okutseya Kalunga, inashi eleka nando mbela u tale ko iinima yopambepo nkene tayi ku gumu naanaa paumwene? Otashi vulika wa hala okulombwela aakwanezimo lyoye, ookuume nayalwe shoka to ilongo. Dhoshili, shika otashi vulika ngoye we shi ninga nale, ngaashi naanaa Jesus naye a tseyithile wo yalwe onkundana ombwanawa poompito inaadhi longekidhwa. (Lukas 10:38, 39; Johannes 4:6-15) Ngashingeyi otashi vulika wa hala okuninga oshindji shi vulithe shoka. Aakuluntugongalo Aakriste otaya ka kala ya nyanyukwa okupopya nangoye opo ya mone ngele owa gwana noto vulu okukutha ombinga miilonga ihaayi faula yokuuvitha Uukwaniilwa yOonzapo dhaJehova. Ngele osho, aakuluntugongalo otaya ka ninga omalongekidho opo u ye pamwe nOnzapo yimwe muukalele. Aalongwa yaJesus oya li ya landula omalombwelo ge opo ya gwanithe uukalele wawo komukalo gu na elandulathano. (Markus 6:7, 30; Lukas 10:1) Oto ka kwathelwa kekwatho lya fa ndyoka sho to kutha ombinga mokuuvitha etumwalaka lyUukwaniilwa egumbo negumbo nokomikalo dhilwe dhi ili.—Iilonga 20:20, 21.

9. Omuntu oti iyapulile Kalunga ngiini, nongiini eiyapulo tali gumu onkalamwenyo ye?

⁹ Okuuvithila aantu yomaludhi agehe onkundana ombwanawa moshitopolwa shegongalo osho omukalo okumona mboka ye na iikala yu uka nosho shimwe shomiilonga iiwanawa mbyoka tayi ulike kutya ngoye ou na eitaalo. (Iilonga 10:34, 35; Jakob 2:17, 18, 26) Okukala aluhe pokugongala kwopaKriste nokukala nombinga tayi ti sha miilonga yeuvitho osho wo omikalo tadhi ulike kutya ngoye owi iyela ombedhi nowi itedhulula nongashingeyi owa tokola okukala pantseyo okutseya Kalunga. Onkatu yopandunge tayi landula ko oyini mbela? Oyo okwiiyapulila Jehova Kalunga. Shika otashi ti kutya oto lombwele Kalunga megalikano tali zi komutima kutya ngoye ou na ehalo noto gandja nomutima aguhe omwenyo gwoye kuye okulonga ehalo lye. Nguka ogwo omukalo gokwiiyapulila Jehova nokutaamba ondjoko yombili yaJesus Kristus.—Mateus 11:29, 30.

ENINGINITHO—SHOKA TALI TI KUNGOYE

10. Omolwashike u na okuninginithwa konima yokwiiyapulila Jehova kwoye?

¹⁰ PaJesus, ayehe mboka taya ningi aalongwa ye oye na okuninginithwa. (Mateus 28:19, 20, NW) Omolwashike shika sha pumbiwa konima yokwiiyapulila kwoye Kalunga? Molwashoka Jehova owe mu iyapulile, ye oku shi kutya ou mu hole. Ihe kapu na omalimbililo kutya ngoye oto ka kala wa hala okukatuka natango onkatu u tseyithile yalwe kombinga yohole yoye yokuhola Kalunga. Eninginitho otali ku pe ano ompito u tseyithe montaneho kutya owi iyapulila Jehova Kalunga.—Aaroma 10:9, 10.

11. Eninginitho otali ti shike?

¹¹ Eninginitho otali ti sha noonkondo pathaneko. Sho to ninginithwa, nenge to “fumvikwa,” kohi yomeya, osha fa wa sa shi na ko nasha nonkalamwenyo yoye yonale. Sho to zi momeya, osha fa to yi monkalamwenyo ompe, ndjoka tayi pangelwa kehalo lyaKalunga nohalyoye mwene. Dhoshili, shika itashi ti kutya ngoye ito ka ninga we omapuko, oshoka atuheni inatu gwanenena nonkee ano ohatu yono esiku kehe. Ihe u li omupiya gwaJehova i igandja nokwa ninginithwa, oto ka kala u na ekwatathano naye lyi ikalekelwa. Molwokwiiyela ombedhi kwoye nomolwokuninginithwa kwoye neifupipiko, Jehova oku na ehalo oku ku dhimina po oondjo dhoye kekankameno lyekuliloyambo lyaJesus. Ano eninginitho otali fala meiyuvo lya yogoka koshipala shaKalunga.—1 Petrus 3:21.

12. Otashi ti shike okuninginithwa (a) ‘medhina lyaHe’? (b) ‘medhina lyOmwana’? (c) ‘medhina lyombepo ondjapuki’?

¹² Jesus okwa lombwele aalanduli ye ya ninginithe aalongwa aape ‘medhina lyaHe nolyOmwana nolyombepo ondjapuki.’ (Mateus 28:19, yelekanitha NW.) Jesus okwa li a hala okutya shike? Okuninginithwa ‘medhina lyaHe’ otaku ulike kutya omuntu ngoka ta ninginithwa okwa taamba ko nomutima aguhe Jehova Kalunga e li Omushiti nosho wo kutya oku na uuthemba wokukala Omunamapangelo agehe gweshito alihe. (Epsalmi 36:10; 83:19 KB-1955; Omuuvithi 12:1) Okuninginithwa ‘medhina lyOmwana’ otashi ti kutya omuntu okwa zimina Jesus Kristus—nuunene tuu ekuliloyambo Lye—mungoka awike ehupitho lya gandjwa kuKalunga tali vulu okumonika. (Iilonga 4:12) Okuninginithwa ‘medhina lyombepo ondjapuki’ otashi ti kutya omuninginithwa okwa zimina ombepo ondjapuki yaJehova, nenge oonkondo dhe tadhi longo, dhi li oshilongitho shaKalunga shokugwanitha omalalakano Ge nokunkondopaleka aapiya Ye ya longe ehalo Lye lyuuyuuki melongelokumwe nehangano Lye ndyoka tali wilikwa kombepo ye.—Genesis 1:2; Epsalmi 104:30; Johannes 14:26; 2 Petrus 1:21.

OWI ILONGEKIDHILA ENINGINITHO?

13, 14. Omolwashike kaatu na okutila okuninga etokolo okulongela Jehova Kalunga?

¹³ Molwashoka eninginitho otali ti sha noonkondo nolyo oshitsa sha simana unene monkalamwenyo yomuntu, olyo mbela onkatu ndjoka u na okukala wa tila? Hasho nando! Nonando etokolo okukala wa ninginithwa kali na okutalika ko inaashi kwata miiti, kapu na omalimbililo, olyo etokolo lyopandungelela ndyoka ngoye to vulu okuninga.

¹⁴ Eninginitho olyo euliko kutya owa hogolola okulongela Jehova Kalunga. Dhiladhila kombinga yaantu mboka to ningi ekwatathano nayo. Mbela kehe gumwe gwomuyo iha longele omuwa gwe komukalo gwontumba nenge gwongandi? Yamwe aapika yuuyamba. (Mateus 6:24) Yalwe otaya lalakanene nuulaadhi omaithano gawo nenge tayi ilongele yo yene mokuninga egwanitho lyomahalo gawo yene oshinenenima monkalamwenyo yawo. Natango yalwe ohaya longele iikalunga. Ihe ngoye owa hogolola okulongela Kalunga kashili, Jehova. Kapu na gumwe i ili hu ulike olukeno, ohenda nohole shi thike puye. Kalunga ota simanekitha aantu moku ya pa iilonga yi na elalakano mbyoka tayi yu ulikile ondjila yehupitho. Ota pe aapiya ye ondjambi yomwenyo gwaaluhe. Dhoshili, okulandula oshiholelwa shaJesus nokugandja omwenyo gwoye kuJehova kashi shi nando ondjila yi na okutilika. Muushili wo wene, oyo ayike ondjila ndjoka ya hokiwa kuKalunga noyi li pandungelela.—1 Aakwaniilwa 18:21.

15. Iiyimbi yimwe yaapuhe yi na ko nasha neninginitho oyini?

¹⁵ Ihe eninginitho kali shi onkatu ndjoka yi na okuningwa molwashoka to thininikwa. Olyo oshinima shopaumwene pokati koye naJehova. (Aagalati 6:4) Sho wa humu komeho pambepo, otashi vulika wi ipula: “Oshike tashi imbi ndje, [ndi ninginithwe, NW]?” (Iilonga 8:35, 36) Oto vulu okwiipula: ‘Okupatanekwa mbela kuukwanegumbo taku imbi ndje? Ondi li natango mbela monkalo yontumba yaahe li pamanyolo nenge miilonga yuulunde? Otashi vulika mbela nda tila okukala inaandi hokiwa we momudhingoloko?’ Mbika oyo yimwe yomiinima mbyoka yi na okudhiladhilwa, ihe yi konakona paushili.

16. Ongiini mbela to ka mona uuwanawa mokulongela Jehova?

¹⁶ Kashi li pandunge okutala kutya okulongela Jehova otashi ka kotha shi thike peni pwaa na okudhiladhila omauwanawa gako. Pashiholelwa, tala oshinima shokupatanekwa kuukwanegumbo. Jesus oku uvaneke kutya aalongwa ye nokuli nando naya kanithe aakwanezimo yawo molwoku mu landula, otaya ka mona uukwanegumbo wopambepo uunenenene. (Markus 10:29, 30) Ooitaali ooyakweni mbaka otaye ke ku ulukila ohole yuumwayinathana, otaye ke ku kwatha wi idhidhimikile omahepeko, notaye ke ku ambidhidha mondjila ndjoka tayi fala komwenyo. (1 Petrus 5:9) Unene tuu aakuluntugongalo otaya vulu oku ku kwatha u kandule po omaupyakadhi nou sinde omashongo galwe. (Jakob 5:14-16) Shi na ko nasha nokukala inoo hokiwa we kuuyuni, ngoye oto vulu okwiipula: ‘Oshike mbela tashi vulu okuyelekanithwa nokuhokiwa kOmushiti gweshito alihe, shoka tashi mu ningitha a nyanyukilwe ondjila yonkalamwenyo ndjoka nda hogolola?’—Omayeletumbulo 27:11.

KALA PAIYAPULO LYOYE NOPANINGINITHO LYOYE

17. Omolwashike u na okutala ko eninginitho li li etameko pehala lyoku li tala ko li li ehulilo?

¹⁷ Osha simana okudhimbulukwa kutya eninginitho kali shi ehulilo lyokuhuma komeho kwoye kwopambepo. Olyo etameko lyokulongela Kalunga kwoye monkalamwenyo ayihe u li omukalele a yapulwa nagumwe gwomOonzapo dhaJehova. Nonando eninginitho olya simana noonkondo, kali shi eshilipalekelo lyehupitho. Jesus ina tya: ‘Kehe ngoka ta ninginithwa ota ka hupithwa.’ Pehala lyaashono okwa ti: “Oongoka ti idhidhimike sigo ehulilo, oye ta hupithwa.” (Mateus 24:13) Onkee ano, osha simana noonkondo opo u konge Uukwaniilwa waKalunga tango moku wu ninga oshinenenima monkalamwenyo yoye.—Mateus 6:25-34.

18. Omalalakano gamwe ogeni ge na okulalakanenwa konima yokuninginithwa?

¹⁸ Opo wi idhidhimike miilonga yoye okulongela Jehova, ou na okwiitulila po omalalakano gopambepo. Elalakano limwe li na oshilonga olyo okwiindjipaleka ontseyo yoye okutseya Kalunga okupitila mekonakono lyopaumwene ihali faula lyOohapu dhe. Itulila po ethimbo lyokulesha Ombimbeli esiku kehe. (Epsalmi 1:1, 2) Kala aluhe pokugongala kwopaKriste, oshoka ekwatathano ndyoka to ka mona hoka otali ke ku kwatha u mone oonkondo dhopambepo. Omolwashike mbela itoo shi ningi elalakano lyoye okugandja okomenda pokugongala kwegongalo nokungeyi oto hambelele Jehova noto kambadhala okutunga yalwe? (Aaroma 1:11, 12) Elalakano lilwe otashi vulika li kale okuhwepopaleka uukwatya womagalikano goye.—Lukas 11:2-4.

19. Omaukwatya geni ombepo ondjapuki tayi vulu oku ku kwathela u kale u ga na?

¹⁹ Ngele owa hala okukala paityo lyeninginitho lyoye, ou na okugandja aluhe eitulomo kwaashoka to ningi nou na okweetha ombepo ondjapuki yaKalunga yi imike omaukwatya mungoye ngaashi ohole, enyanyu, ombili, ontalanteni, olukeno, uuwanawa, eitaalo, uunambili neipangelo. (Aagalati 5:22, 23, NW; 2 Petrus 3:11) Dhimbulukwa kutya Jehova oha gandja ombepo ye ondjapuki kwaayehe mboka taye yi pula megalikano notaya vulika kuye ye li aapiya ye aadhiginini. (Lukas 11:13; Iilonga 5:32) Ano galikana Kalunga to pula ombepo ye nosho wo e ku kwathe u kale u na omaukwatya ngoka tage mu nyanyudha. Omaukwatya ga tya ngaaka otaga ka kala gi iwetikile mokupopya kwoye nomomikalo dhoye sho to inyengithwa kenwethomo lyombepo yaKalunga. Dhoshili, omuntu kehe megongalo lyopaKriste ota kambadhala okukala e na “uukwatya uupe” opo a kale a fa unene Kristus. (Aakolossa 3:9-14, NW) Kehe gumwe gwomutse okwa taalelwa komashongo gi ili nogi ili moku shi ninga molwashoka tse otu li poondondo inaadhi faathana dhehumokomeho lyopambepo. Molwashoka ngoye ino gwanenena, ou na okulonga nuudhiginini opo u kale nuukwatya wa fa waKristus. Ihe ino teka omukumo shi na ko nasha naashika, oshoka kekwatho lyaKalunga otashi vulika.

20. Okomikalo dhini to vulu okuholela Jesus muukalele?

²⁰ Limwe lyomomalalakano goye gopambepo oli na okukala olyo okuholela naanaa oshiholelwa shinyanyudha shaJesus. (Aaheberi 12:1-3) Ye okwa li e hole uukalele. Ngele ou na uuthembahenda okukutha ombinga miilonga yokuuvitha Uukwaniilwa, ano ino etha wu ninge oshinima showala. Lalakana okumona enyanyu mokulonga yalwe kombinga yUukwaniilwa waKalunga ngaashi Jesus a ningi. Longitha elongo ndyoka tali gandjwa kegongalo oku ku kwatha u ninge omulongi e li nawa unene. Kala wo nuushili kutya Jehova ota vulu oku ku nkondopaleka u gwanithe uukalele woye.—1 Aakorinto 9:19-23.

21. (a) Otu shi shi ngiini kutya aantu aadhiginini mboka ya ninginithwa, Jehova ohe ya tala ko ye na ongushu? (b) Oshike tashi ulike kutya eninginitho olya simana ngele otwa hala okuhupa uuna Kalunga ta ka gwanithila epangulo lye onkalelo ndjika yiinima yuukolokoshi?

²¹ Omuntu i igandja nokwa ninginithwa ngoka ta kambadhala nuudhiginini okulandula Jesus, kuKalunga ye okwi ikalekelwa. Jehova oha konakona omitima dhaantu ayehe omamiliyona omayuvi nokwa tseya nkene aantu ya tya ngaaka ya pumba. Ohe ya tala ko ye li ‘omaliko.’ (Haggai 2:7) Omahunganeko gOmbimbeli otagu ulike kutya Kalunga oha tala ko aantu ya tya ngaaka ye li aantu mboka ya ndhindhilikwa okuhupa po sho ye masiku ta ka gwanithila epangulo lye onkalelo ndjika yiinima yuukolokoshi. (Hesekiel 9:1-6; Malakia 3:16, 18) Ngoye ou na mbela “iikala yu uka yokuya momwenyo gwaaluhe”? (Iilonga 13:48, NW) Osho mbela ehalo lyoye lya mana mo u ndhindhilikwe u li omuntu ngoka ta longele Kalunga? Eiyapulo neninginitho oyi li oshitopolwa shendhindhiliko ndyoka, noyo iinima ya simanenena omolwehupitho.

22. “Ongundu onene” otayi vulu okukala yi na omatimaumbwile geni?

²² Konima yEyelu lyomuuyuni auhe, Noa nuukwanegumbo we oya zi monguluwato yu uka kevi lya yelithwa. Nena, “ongundu onene” ndjoka tayi longitha ontseyo okutseya Kalunga monkalamwenyo yayo noya hokiwa kuJehova, nayo wo oyi na etegameno okuhupa mehulilo lyonkalelo yiinima yuukolokoshi nokunyanyukilwa omwenyo gwaaluhe kombanda yevi lya yelithwa sigo aluhe. (Ehololo 7:9, 14) Onkalamwenyo ndjoka otayi ka kala ya tya ngiini?

KONAKONA ONTSEYO YOYE

Jehova okwa hala u longithe ngiini ontseyo yoye oku mu tseya?

Oonkatu dhimwe odhini ndhoka tadhi fala meninginitho?

Omolwashike eninginitho kaali shi ehulilo, ihe etameko?

Ongiini tatu vulu okukala paiyapulo lyetu nopaninginitho lyetu?

[Picture on page 172]

Owi iyapulila mbela Kalunga megalikano?

[Pictures on page 174]

Oshike mbela tashi ku imbi u ninginithwe?