Ontopolwa 19
UUNA EVI TALI KA KALA LYU UDHA ONTSEYO OKUTSEYA KALUNGA
1, 2. Ongiini eshito lyaJehova lya yonagulwa?
NATU tye nduno onkulunguelela opo owala ya mana okupainda ethano ewanawa. Yo oyi wete ewanawa noonkondo—oshilonga shuunkulungu! Ihe uusiku omutondi omunefupa ote li yonagula. Shi shi okuuviwa ko, shika otashi yemateke unene onkulungu. Inayi halelela tuu omukolokoshi ngoka a tulwe mondholongo! Ngoye oto vulu wo okudhiladhila nkene onkulungu tayi kala ya halelela opo oshilonga shayo shi kale ishewe oshiwanawa ngaashi sha li nale.
2 Ngaashi onkulungu ndjoka, Jehova okwa shiti oshinima shuunkulungu sho a longekidha evi nokwa tula ko aantu kulyo. Konima yokushita omulumentu nomukiintu, okwa popi kutya iilonga ye ayihe yokevi ‘oya longekeka shili.’ (Genesis 1:31) Adam naEva oya li oyana yaKalunga mwene, nokwa li e ya hole. Okwa li e ya nine onakuyiwa yelago nombwanawa. Dhoshili, Satana okwe ya ningitha oshipotha, ihe eshito lyaKalunga ekumithi kalya li ando lya yonuka itaali vulu okwoopalekwa.—Genesis 3:23, 24; 6:11, 12.
3. “Omwenyo gwashili” oshike?
3 Kalunga okwa tokola oku li opaleka. Ye okwa halelela shili oku tu mona tu li monkalamwenyo ngaashi ndjoka ya li oyo elalakano lye lyopetameko. Okukala po kwetu okufupi noku udha omaupyakadhi hako “omwenyo gwashili,” oshoka okwa pitilila po unene pwaashoka Jehova a li a dhiladhila. “Omwenyo gwashili” ngoka Kalunga e tu halela ogwo “omwenyo gwaaluhe” monkalo ya gwanenena.—1 Timoteus 6:12, 19.
4, 5. (a) Etegameno lyOparadisa otali ka shilipalekwa ngiini? (b) Omolwashike tu na okudhiladhila kombinga yetegameno lyetu lyonakuyiwa?
4 Ontseyo okutseya Kalunga otayi ku pe oshinakugwanithwa koshipala shaJehova. (Jakob 4:17) Ihe dhiladhila komalaleko nuuyamba mpoka ge thike ngoka to ka nyanyukilwa ngele to longitha ontseyo ndjoka noto lalakanene omwenyo gwaaluhe. MOohapu dhe, Ombimbeli, Jehova Kalunga okwa thaneke ethano ewanawa lyaashoka onkalamwenyo tayi ka kala mEviparadisa ndyoka li li popepi noonkondo. Dhoshili, tu li oshigwana shaJehova itatu longele Kalunga molwashoka twa hala owala tu pewe ondjambi. Otatu longele Kalunga molwashoka otu mu hole. (Markus 12:29, 30) Kakele kaashono, omwenyo itagu vulu okulongelwa mokulongela Jehova. Omwenyo gwaaluhe ogwo omagano gaKalunga. (Aaroma 6:23) Otashi ka kala oshiwanawa kutse okutedhatedha kombinga yomwenyo gwa tya ngaaka molwashoka etegameno lyOparadisa otali tu dhimbulukitha kutya Jehova oKalunga a tya ngiini—‘omugandji gwondjambi omunahole kwaamboka taye mu kongo.’ (Aaheberi 11:6, KB) Etegameno ndyoka li li lyashili noonkondo momadhiladhilo getu nomomitima dhetu, otali ke tu kwatha tu idhidhimikile omaudhigu muuyuni waSatana.—Jeremia 23:20.
5 Ngashingeyi natu ukitheni eitulomo lyetu ketegameno lya kankamena kOmbimbeli lyomwenyo gwaaluhe mOparadisa yokevi yomonakuyiwa. Onkalamwenyo otayi ka kala ya tya ngiini uuna evi tali kala lyu dha ontseyo okutseya Kalunga?
KONIMA YAHARMAGEDON—EVIPARADISA
6. Harmagedon oshike, notashi ka tya shike kaantu?
6 Ngaashi shu ulikwa nale, Jehova Kalunga masiku ota ka hanagula po onkalelo yongashingeyi yiinima yuukolokoshi. Uuyuni otau hedha neendelelo kwaashoka Ombimbeli tayi ithana Harmagedon, nenge Armagedon. Oshitya shika otashi vulika tashi dhiladhilitha aantu yamwe okudhipaga okunenenene niilwitho yopalute kwe etithwa kiigwana tayi kondjithathana, ihe Harmagedon hasho e li ngawo. Ngaashi Ehololo 16:14-16 tali ulike, Harmagedon oyo ‘iita yesiku enene lyaKalunga, omupangeli gwaayihe.’ Oyo iita moka ‘aakwaniilwa yuuyuni auhe,’ nenge iigwana tayi ka kala yi na ombinga. Omwana gwaJehova Kalunga, Omukwaniilwa a langekwa po, masiku ota ka ya molugodhi. Kapu na nando omalimbililo kutya oshizemo otashi ka kala ngiini. Ayehe mboka taya pataneke Uukwaniilwa waKalunga noye li oshitopolwa shonkalelo yuukolokoshi yaSatana otaya ka hanagulwa po. Oomboka owala ya dhiginina muJehova taya ka hupa.—Ehololo 7:9, 14; 19:11-21.
7. Satana noompwidhuli dhe otaya ka kala peni pethimbo lyElelo lyOomvula Eyuvi lyaKristus, nongiini shika tashi ka kwathela aantu?
7 Natu tye nduno kutya ngoye owa hupu moshiponga shoka oshinenenene. Onkalamwenyo otayi ka kala mbela yi li ngiini kombanda yevi muuyuni uupe wu uvanekwa kuKalunga? (2 Petrus 3:13) Katu na nando oku shi tengeneka, oshoka Ombimbeli otayi shi tu lombwele, naashoka tayi popi oshinyanyudhi. Otatu lombwelwa kutya Satana noompwidhuli dhe itaya ka vula we oku tu etela oshiponga, oshoka otaya ka patelwa mondholongo molumbogo lwokwaahalonga sha pethimbo lyElelo lyOomvula Eyuvi lyaJesus Kristus. Iishitwa mbyoka iiwinayi yi na onyanya itayi ka kala we ye tu langela meholamo nokupendutha omaupyakadhi e tayi kambadhala oku tu hongaidha tu longe iilonga yokwaahenuudhiginini muKalunga. Epepelelo otali ka kala li thike peni!—Ehololo 20:1-3.
8, 9. Muuyuni uupe, oshike tashi ka ningilwa omaunkundi, omikithi nuukulupe?
8 Konima yethimbo, omikithi dhomaludhi agehe otadhi ka nena po. (Jesaja 33:24) Opo nduno iilema otayi ka thikama, tayi ke enda, tayi ka matuka notayi ka tanta nomagulu ga aluka noga kola. Aathitamatsi konima yokukala uule woomvula muuyuni wawo wa mwena, otaye ku uva omawi taga nyanyudha momudhingoloko gwawo. Aaposi otaya ka kumwa noonkondo sho taya vulu okumona uuyuni u na omalwaala nosho wo omitungilo omikumithi. (Jesaja 35:5, 6) Lwahugunina, yo otaya ka mona iipala yaaholike yawo! Opo nduno, otashi vulika taya ka kala kaaye wete ko nawa uule wokathimbo okafupi kowala omolwomahodhi genyanyu.
9 Dhiladhila owala! Itaapu ka kala we omakende gokomeho, omampango noontondje, omiti, uuklinika womayego nenge iipangelo! Omikithi dhopamaiyuvo nepolimano itayi ka yuga we aantu elago. Aanona itaye ke ehamekwa we nando komikithi. Eshunduko lyolutu ndyoka lye etwa kuukulupe otali ka hulithwa po. (Job 33:25) Otatu ka kala tu na uukolele uuwanawa notwa kolelela. Ongula kehe otatu ka penduka tu na oonkondo dha pepalekelwa moomposi dhuusiku dhi vululukitha, tu udha oonkondo notwa nyanyukilwa esiku epe lyonkalamwenyo yituntula nolyiilonga yi uvitha ombili.
10. Iilonga yini aahupipo puHarmagedon taya ka longa?
10 Aahupipo puHarmagedon otaya ka kala ye na iilonga oyindji yinyanyudha okulonga. Yo otaya ka lundululila evi moparadisa. Okanima kehe hoka ka hupa po konkalelo onkulu ya nyatekwa otaka ka kuthwa po kaaka kale po we. Ooparka niikunino otayi ka pingena po oombashu nomavi ga yonuka. Ayehe otaya ka nyanyukilwa omagumbo omawanawa. (Jesaja 65:21) Molweendo lwethimbo, iitopolwa yevi mbyoka ya fa oparadisa otayi ka koka notayi ka kwatathana sigo evi alihe tali adha pomuthika gweopalo ndyoka lya li lya tulwa po kOmushiti nale moshikunino shaEden. Itashi ka kala tuu shimbilipaleka okukala nombinga miilonga mbyoka yetungululo!
11. Monakuyiwa aantu otaya ka kala ye na ekwatathano lya tya ngiini nomudhingoloko gwevi nosho wo niinamwenyo?
11 Ayihe mbika otayi ka longwa kohi yewiliko lyaKalunga opo omudhingoloko kaagu yonagulwe. Pokati kaantu niinamwenyo otapu ka kala ombili. Pehala lyoku yi dhipaga po pwaa na engambeko, omuntu ota ka tameka ishewe okuwilika evi pamukalo omwaanawa noku yi sila nawa oshimpwiyu. Dhiladhila owala omambungu noonzigona, oonkoshi nuutana, tayi napele pamwe—niinamwenyo yomegumbo ya gamenwa thiluthilu. Nokuli okanona okashona itaka ka pumbwa okutila iilikama, nosho wo egundjilo lyuuyuni uupe itali ka piyaganekwa we kaantu aakwanyanya. (Jesaja 11:6-8) Itashi ka kala tuu uuyuni uupe u na ombili!
AANTU YA LUNDULUKA
12. Jesaja 11:9 ota gwanithwa ngiini nena, nongiini ta ka gwanithwa mOparadisa?
12 Jesaja 11:9 ote tu lombwele molwashike kevi alihe itaaku ka longwa we uuwinayi. Ota ti: “Evi alihe otali kala lyu udha [ontseyo okutseya Jehova, ya fa, NW] omeya ga kala ga siikile efuta.” Shika oshi na ko nasha naantu, molwashoka iinamwenyo itayi vulu okumona “ontseyo okutseya Jehova” nokuninga omalunduluko, oshoka yo ohayi wilikwa koondunge dhuuvalelwamo. Ihe ontseyo okutseya Omushiti gwetu otayi lundulula aantu. Kapu na omalimbililo, ngoye mwene owa ninga nale omalunduluko gontumba molwashoka wa longitha ontseyo okutseya Kalunga monkalamwenyo yoye. Omamiliyona oge shi ninga. Ano ehunganeko ndika olya tameka nale okugwanithwa kwaamboka taya longele Jehova. Ihe otashi ulike wo kethimbo uuna aantu muuyuni auhe taye ki ihula uukwatya kehe wa fa woshinamwenyo nenge wonyanya e taya ningi aanambili sigo aluhe.
13. Oprograma yelongo yini tayi ka ningwa kevi?
13 Itashi ka kala tuu oshiwanawa uuna ontseyo okutseya Kalunga tayi ka kala yu udha evi! Otapu ka kala oprograma onene yelongo kohi yewiliko lyOmukwaniilwa Jesus Kristus naapangeli ooyakwawo 144 000. Opo nduno ‘ooraamata’ oompe otadhi ka tameka okulongithwa. Osha yela kutya ndhika odho omalombwelo gaKalunga ga nyolwa ngoka taga ka kala ge li ekankameno lyokulonga aakali kevi. (Ehololo 20:12) Aantu itaye ki ilonga iita, ihe ombili. Iilwitho ayihe iihanaguli itayi ka kala po we sigo aluhe. (Epsalmi 46:10Correct in OB) Oonakukala muuyuni uupe otaye ki ilonga okukala naantu ooyakwawo nohole nonesimaneko.
14. Uuyuni otau ka kala wi ili ngiini uuna aantu taya ka kala uukwanegumbo umwe auke wa hangana?
14 Aantu otaya ka ninga uukwanegumbo umwe auke wa hangana. Itapu ka kala we sha shoka tashi imbi uukumwe nuumwayinathana. (Epsalmi 133:1-3) Itapu ka kala we ngoka e na okupata egumbo lye opo aafuthi yaaha ye mo. Ombili otayi ka pangela momutima kehe, megumbo kehe nomoshitopolwa kehe shevi.—Mika 4:4.
EYUMUKO LINYANYUDHA
15. Oongundu mbali dhini tadhi ka yumudhilwa kombanda yevi?
15 Eyumuko otali ka ningwa pethimbo lyEyuvimimvo ndyoka. Mboka ya yonene owina kombepo ondjapuki yaKalunga, nenge oonkondo dhe tadhi longo, mokukatuka oonkatu tadhi kondjitha okulonga kwayo nenge ewiliko lyayo pwaa na okwiiyela ombedhi, itaya ka yumuka. (Mateus 23:15, 33; Aaheberi 6:4-6) Dhoshili, Kalunga oye ta ka tokola kutya olye a yono komukalo nguka. Ihe opu na oongundu mbali dha yoolokathana tadhi ka yumuka—‘aayuuki naalunde.’ (Iilonga 24:15) Molwashoka otapu ka kala elandulathano ewanawa, oshi li pandunge okuya pehulithodhiladhilo kutya aayuuki mboka ya longele Jehova nuudhiginini, oyo taya ka kala aatango mboka taya ka galulilwa momwenyo kombanda yevi.—Aaheberi 11:35-39.
16. (a) Oolye taya ka kala mokati ‘kaayuuki’ mboka taya ka yumudhilwa kombanda yevi? (b) Aantu aadhiginini yeni yomethimbo lyonale wa hala unene tuu okutsakaneka, nomolwashike?
16 Pehala lyokuuva oonkundana dhiita, iiponga iinene neso, aapiya yaJehova otaye ku uva omahokololoningomwa omakumithi geyumuko. Otashi ka kala shituntula okuuva kombinga yokuyumuka kwaalumentu naakiintu aadhiginini ngaashi Abel, Henok, Noa, Abraham, Sara, Job, Moses, Rahab, Rut, David, Elia, Ester. Ooshili dhopandjokonona kadhi tuntula tuu ndhoka taya ka hokolola uuna taya gandja uuyelele wumwe natango wu na ko na sha nomahokololo ogendji gOmbimbeli! Kapu na omalimbililo, yo naayuuki mboka ya sa methimbo opo lya piti nayo otaya ka kala ya halelela okuuva kombinga yehulilo lyonkalelo yaSatana nonkene Jehova a yapulitha edhina lye eyapuki nokwa yuukipalitha uunamapangelo we.
17. Aadhiginini otaya ka kwathela ngiini yalwe mboka taya yumuka?
17 Aadhiginini mbaka itaya ka kala tuu ekwatho enene pethimbo lyonkatu tayi landula yeyumuko, uuna omamiliyona omayuvi ‘gaalunde’ taga mangululwa moomango dheso! Oyendji yomaantu kaya li ya mona nando ompito okutseya Jehova. Satana okwa li a ‘tsikitha omadhiladhilo gawo.’ (2 Aakorinto 4:4) Ihe iilonga yOndiaboli otayi ka hulithwa po. Aalunde otaya ka galukila kevi lyo opala nolyombili. Yo otaya ka hambelelwa kaantu mboka yu unganekwa nawa oku ya longa kombinga yaJehova nOmwana gwe ta pangele, Jesus Kristus. Sho aayumuki omamiliyona omayuvi taya ka tseya notaya ka kala ye hole Omushiti gwawo, ontseyo okutseya Jehova otayi ka kala yu udha evi pamukalo inaagu monika nando onale.
18. Oto dhiladhila kutya oto ka kala wu uvite ngiini uuna to hambelele aaholike aayumuki?
18 Eyumuko itali ke eta tuu enyanyu momitima dhetu! Olye mbela inaa mona iihuna komutondi gwetu eso? Dhoshili, olye mbela a li kee uvitilile nayi sho omiya dhontumba dhohole nenge dhuukuume dha li dha tokoka molwashoka omukithi, uukulupe, oshiponga, nenge elongithonkondo lye etitha eso lyomuholike gwe? Dhiladhila owala nduno enyanyu lyokuhangana ishewe mOparadisa. Oomeme nootate, oyana aamati naakadhona, ookuume naakwanezimo, otaya ka matukilathana nokupapatelathana, taya yolo notaya lili kenyanyu.
HUGUNINA EGWANENENO!
19. Oshikumithalonga shini tashi ka longwa pethimbo lyEyuvimimvo?
19 Oshikumithalonga oshikumithi otashi ka ningwa pethimbo lyEyuvimimvo alihe. Kaantu, shika otashi vulika tashi ka kala oshinima shituntula unene shi vulithe ayihe yimwe mbyoka tayi ka ningwa pethimbo lyElelo lyOomvula Eyuvi lyaKristus. Jehova ota ka gandja elombwelo kOmwana a longithe omauwanawa gekuliloyambo kukehe omulumentu nomukiintu omudhiginini. Komukalo nguka, uulunde auhe otau ka kuthwa po, naantu otaya ka thikithwa megwaneneno.—1 Johannes 2:2; Ehololo 21:1-4.
20. (a) Otashi ka tya shike okukala wa gwanenena? (b) Uunake aahupipo puHarmagedon naayumuki taya ka tameka okukala nomwenyo mondunge ya gwanenena?
20 Egwaneneno! Shika otashi ka tya shike? Otashi ka tya okugalukila monkalamwenyo ya fa ndjoka Adam naEva ya li ya nyanyukilwa manga ya li inaaya yona kuJehova Kalunga. Panyama, pamadhiladhilo, pamaiyuvo, pamikalo, pambepo—momukalo kehe gu shi okudhiladhilwa—aantu ya gwanenena otaya ka tsakanitha thiluthilu omithikampango dhaKalunga. Ihe aantu ayehe otaya ka kala ya faathana mbela? Hasho nando! Eshito alihe lyaJehova—omiti, oongala, iinamwenyo—otali tu longo kutya ye oku hole omaludhi gi ili nogi ili. Aantu ya gwanenena otaya ka kala ye na omaukwatya gi ili nogi ili niitalendi yi ili noyi ili. Kehe gumwe ota ka nyanyukilwa onkalamwenyo ngaashi Kalunga a li a dhiladhila yi kale. Ehololo 20:5 otali ti: “Aasi ooyakwawo inaa ninga omwenyo, sigo omimvo ndhoka dheyuvi dha hulu po.” Ngaashi ongundu onene yaahupipo puHarmagedon, aayumuki otaya ka kala lela nomwenyo uuna taya thiki megwaneneno lyaa na uulunde.
21. (a) Oshike tashi ka ningwa pehulilo lyElelo lyOomvula Eyuvi lyaKristus? (b) Hugunina oshike tashi ka ningilwa Satana naayehe mboka ya gama kombinga ye?
21 Aantu ya gwanenena otaya ka taalelwa kemakelo limwe lyahugunina. Pehulilo lyEyuvimimvo, Satana noompwidhuli dhe otaya ka mangululwa mo molumbogo uule wokathimbo okafupi notaya ka pitikwa ya ninge onkambadhala yahugunina okupilamenitha aantu Jehova. Yamwe uuhalu wawo uuwinayi otaye ke u pititha komeho gokuhola Kalunga, ihe oshipotha shika otashi ka mwenekwa mbala. Jehova ota ka pangula oonakwiihola mbaka pamwe naSatana noompwidhuli dhe adhihe. Opo nduno aalongi ayehe yuuwinayi otaya ka hulithwa po sigo aluhe.—Ehololo 20:7-10.
OTO KA NINGA SHIKE?
22. Owa tegelela oku ka ninga shike mOparadisa?
22 Uukwaaluhe otau ka nyanyukilwa kwaamboka ye hole Jehova Kalunga noye li mEviparadisa. Itatu vulu okudhiladhila naanaa enyanyu lyawo mpoka tali ka kala li thike, nangoye wo oto vulu okukutha ombinga mwaashika. Omusika, uunkulungu, iilonga yiikaha—eeno, omipondo dhaantu ya gwanenena otadhi ka pitilila po piilonga iiwanawa noonkondo yaalongi oonkulungu oonene muuyuni uukulu! Dhoshili, aantu otaya ka kala ya gwanenena notaya ka kala ye na ethimbo inaali ngambekwa. Dhiladhila owala shoka ngoye to ka vula okulonga u li omuntu a gwanenena. Dhiladhila wo kwaashoka ngoye naantu ooyakweni tamu ki ilonga kombinga yeshito lyaJehova—komilalawili omamiliyona omayuvi meyalelo alihe sigo okuutopolwa uushuushuka noonkondo. Oshinima kehe shoka aantu taya ka longa otashi ka nyanyudha natango omutima gwaTate yetu omunahole, Jehova.—Epsalmi 150:1-6.
23. Omolwashike onkalamwenyo mOparadisa itaayi ka kala yikenyeneka?
23 Onkalamwenyo yopethimbo ndyoka itayi ka kala yikenyeneka. Molweendo lwethimbo otayi ka ninga yihokitha noonkondo. Osha yela ano kutya ontseyo okutseya Kalunga kayi na ehulilo. (Aaroma 11:33, yelekanitha NW.) Muukwaaluhe auhe, otamu ka kala aluhe oshindji okwiilonga niinima iipe okukonakona. (Omuuvithi 3:11, OB-1986) Naashono to tsikile okwiilonga kombinga yaJehova Kalunga, oto ka kala nomwenyo—haomvula owala oonshona, ihe osigo aluhe!—Epsalmi 22:27Correct in OB.
24, 25. Omolwashike u na okukala ngashingeyi metsokumwe nontseyo okutseya Kalunga?
24 Onakuyiwa yinyanyudha meviparadisa hayo mbela ya gwana okuningilwa kungoye onkambadhala kehe nenge eiyambo kehe? Osho naanaa! Jehova okwe ku pa oshipatululo shonakuyiwa ndjoka ombwanawa noonkondo. Oshipatululo shoka osho ontseyo okutseya Kalunga. Oto ke shi longitha mbela?
25 Ngele ou hole Jehova, oto kala wa nyanyukwa okulonga ehalo lye. (1 Johannes 5:3) Omalaleko nuuyamba ngoka to ka mona otaga ka kala ge thike peni uuna to landula ondjila ndjoka! Ngele to longitha ontseyo okutseya Kalunga, otayi vulu oku ku etela onkalamwenyo yelago nokuli nomuuyuni mbuka wu udha omaupyakadhi. Noondjambi ndhoka to ka mona monakuyiwa oonenenene, oshoka ndjika oyo ontseyo ndjoka tayi fala komwenyo gwaaluhe! Ngashingeyi olyo ethimbo ewanawa kungoye u katuke onkatu. Kala wa tokola toko okukala metsokumwe nontseyo okutseya Kalunga. Ulika ohole yoye yokuhola Jehova. Simaneka edhina lye eyapuki e to ulike kutya Satana omuniifundja. Opo nduno Jehova Kalunga, Onzo yuunongo nontseyo yashili, ote ke ku nyanyukilwa momutima gwe omunene nogu na ohole. (Jeremia 31:3; Sefanja 3:17) Oye nota ka kala e ku hole sigo aluhe!
KONAKONA ONTSEYO YOYE
“Omwenyo gwashili” oshike?
Konima yaHarmagedon, oshike tashi ka ningwa kombanda yevi?
Oolye taya ka yumudhilwa kombanda yevi?
Ongiini aantu taya ka kala ya gwanenena nongiini taya ka makelwa konahiya?
Ou na etegameno lini shi na ko nasha nOparadisa?
[Picture on page 188, 189]
Ou na mbela etegameno oku ka kala mOparadisa, uuna evi tali ka kala lyu udha ontseyo okutseya Kalunga?