Okweenda mombepo otaku tu kwathele tu kale metsokumwe neiyapulo lyetu
“Kaleni nokweenda mOmbepo, one noitamu gwanitha uuhalu wopantu.”—GAL. 5:16, OB-1954.
1. Eninginitho lini lya li lya ningwa mesiku lyaPentekoste?
AALANDULI yaJesus oya li ya popi momalaka mesiku lyaPentekoste 33 E.N., konima sho ya li ya ninginithwa nombepo ondjapuki. Oya li yu ulike omagano omakumithi gombepo ondjapuki. (1 Kor. 12:4-10) Oshizemo shomagano ngaka noshoshipopiwa shoka omuyapostoli Petrus a li a gandja osha li shike? Oyendji oohapu dhe “odhe ya dhenge pomutima.” Sho Petrus e ya ladhipike, oyi itedhulula e taya ninginithwa. Ondjokonona otayi ti: “Oyendji yomuyo oyi itaale oohapu dhe noya [ninginithwa, NW]. Esiku ndyoka Omuwa okwa gwedhele ko ongundu yooitaali, aantu ye thike pomayuvi gatatu.” (Iil. 2:22, 36-41) Ngaashi Jesus a li a ti, oya li taya ka ninginithwa momeya medhina lyaHe nolyOmwana nolyombepo ondjapuki.—Mat. 28:19.
2, 3. (a)Yelitha eyooloko pokati kokukala wa ninginithwa nombepo ondjapuki nosho wo okukala wa ninginithwa medhina lyombepo ondjapuki. (b) Omolwashike okuninginithwa momeya ku li oshitegelelwa kwaayehe mboka haya ningi Aakriste yashili kunena?
2 Mbela opu na eyooloko pokati kokukala wa ninginithwa nombepo ondjapuki nokukala wa ninginithwa medhina lyombepo ondjapuki. Eeno. Mboka ya ninginithwa nombepo ondjapuki oya valululwa ye li oyana yaKalunga ya valwa pambepo. (Joh. 3:3) Oya gwayekwa ya ka kale aakwaniilwa naasaaseri yomUukwaniilwa waKalunga womegulu, noye li oshitopolwa sholutu lwaKristus lwopambepo. (1 Kor. 12:13; Gal. 3:27; Eh. 20:6) Onkee ano, eninginitho ndika lyokuninginithwa nombepo ondjapuki, olyo ndyoka Jehova a li a ningi mesiku lyaPentekoste nosho wo konima sho a hogolola oohandimwe ya ninge aathigululi pamwe naKristus. (Rom. 8:15-17) Ihe mbela ongiini kombinga yokuninginithwa medhina lyombepo ondjapuki, oshinima shoka hashi ningwa aluhe piigongi yoshigwana shaJehova pethimbo lyetu?
3 Aakriste yashili ohaya ninginithwa momeya shi li endhindhiliko lyokwiiyapulila thiluthilu Jehova Kalunga. Osho shi li ngawo nokwaamboka ya mona eithano lyomegulu. Ihe okuninginithwa momeya oku li wo onkatu ya pumbiwa kaalumentu naakiintu omamiliyona kunena mboka ye na etegameno ngashingeyi lyoku ka kala kombanda yevi sigo aluhe. Kashi na nduno mbudhi kutya etegameno lyomuntu olini, okuninginithwa momeya medhina lyaHe nolyOmwana nolyombepo ondjapuki oko onkatu ya pumbiwa ndjoka omuntu e na okukatuka opo a taambiwe ko kuKalunga. Aakriste ayehe mboka ya ninginithwa momukalo gwa tya ngeyi oya tegelelwa ‘ya kale nokweenda mombepo.’ (Lesha Aagalati 5:16.) Oto ende ngaa mombepo opo wu vule okukala metsokumwe neiyapulo lyoye?
Shoka “okweenda mombepo” tashi ti
4. “Okweenda mombepo” otashi ti shike paulelalela?
4 “Okweenda mombepo” okwa kwatela mo okutaamba ko ombepo ondjapuki yi longe mungoye nokweetha ombepo ondjapuki yi ku nwethe mo. Otashi vulika wu tye otashi ti okukala to pangelwa kombepo ondjapuki momaipyakidhilo goye gakehe esiku. Aagalati ontopolwa 5 otaya yelitha eyooloko pokati kenwethomo lyombepo ondjapuki naandyoka lyopanyama.—Lesha Aagalati 5:17, 18.
5. Okunwethwa mo kombepo ondjapuki okwa kwatela mo okwiidhilika iilonga yini?
5 Ngele owa nwethwa mo kombepo ondjapuki, oho idhilike iilonga yonyama. Mbyoka oya kwatela mo iinima ngaashi ‘uuholume, iipala uukeeneidhiliko, okusimaneka iimenka uumpulile okutondathana, okutamanana, efupa, okugeelathana, okukotokelathana, okutopoka moongundu nomiimpaga, uukodhi, uunkolwi nuufukedhi.’ (Gal. 5:19-21) Mokwiidhilika iilonga ya tya ngaaka, oto ‘dhipagitha iilonga yolutu kombepo.’ (Rom. 8:5, 13, yelekanitha OB-1954.) Otashi ke ku kwathela wu tule omadhiladhilo goye kiinima yopambepo nokulongela pamwe newiliko lyayo, pehala lyokwiiyethela mokupangelwa komahalo gopanyama.
6. Gandja ethaneko lyaashoka omuntu a pumbwa okuninga opo i imike iiyimati yombepo.
6 Sho ombepo ondjapuki tayi longo mungoye, oho ulike omaukwatya gopakalunga, “iiyimati yOmbepo.” (Gal. 5:22, 23) Ihe owu shi shi kutya shika otashi pula wu ninge oonkambadhala. Oku shi thaneka: Omunafaalama okwa longo epya lye. Dhoshili, oonte dhetango nomeya oya pumbiwa, molwaashoka ngele iinima mbyoka kayi po ita ka kala a tegelela eteyo lyasha. Ombepo ondjapuki oya fa oonte dhetango. Otwe yi pumbwa opo tu holole iiyimati yombepo. Natango, mbela oshike tashi ke ya po nopwaahe na okulonga nuudhiginini kwomunafaalama? (Omayel. 10:4) Nkene ho longo evi lyopathaneko lyomutima gwoye otashi ku utha kutya oto ka imika iiyimati yombepo ondjapuki yi thike peni noyi na ongushu ya tya ngiini. Onkee ano ipula: ‘Mbela ohandi pitike ombepo ondjapuki yi imike iiyimati yayo mokulonga pamwe nayo?’
7. Omolwashike okukonakona nokutedhatedha kwa simana ngele owa hala okukokeka iiyimati yombepo ondjapuki?
7 Aanafaalama oya pumbwa wo okukala haya tekele iimeno yawo opo ya mone eteyo ewanawa. Opo wu kokeke iiyimati yombepo, owa pumbwa omeya goshili ngoka taga adhika mOmbiimbeli nosho wo ngoka taga monika okupitila megongalo lyopaKriste kunena. (Jes. 55:1) Otashi vulika wu ulukila nale aantu oyendji kutya Omanyolo Omayapuki oga nyolithwa kombepo ondjapuki. (2 Tim. 3:16) Ongundu yomupiya omudhiginini nomunandunge oya gandja wo euvoko enene ndyoka lya pumbiwa lyomeya golela goshili yOmbiimbeli. (Mat. 24:45-47) Onkee ano, osha yela kutya opo tu kale twa nwethwa mo kombepo ondjapuki, otu na okukala hatu lesha Oohapu dhaKalunga nokutedhatedha kudho. Ngele oto ningi ngawo, oto holele iiholelwa iiwanawa yaapolofeti mboka ya li haya ‘kongo nokukonakona neitulomo’ uuyelele mboka wa li wa gandjwa. Oshi li oshindhindhilikwedhi kutya nokuli naayengeli oyu ulika eitulomo lyomuule ooshili dhopambepo dhi na ko nasha nOmbuto ndjoka yu uvanekwa nosho wo egongalo lyAakriste aagwayekwa.—Lesha 1 Petrus 1:10-12.
Ongiini to vulu okunwethwa mo kombepo?
8. Omolwashike sha simanenena wu pule Jehova ombepo ye?
8 Inashi gwana owala okukonakona Omanyolo nokutedhatedha kugo. Owa pumbwa okutsikila okupula ekwatho kuJehova nosho wo ewiliko lye. Ota vulu “okulonga oshindji shi vulithe pushoka tatu shi indile nenge tatu shi dhiladhila.” (Ef. 3:20; Luk. 11:13) Ihe oto ka yamukula ngiini ngele gumwe okwe ku pula ta ti: “Omolwashike ndi na okutsikila okupula Kalunga ngele oku shi shi nale ‘shoka nda pumbwa, manga inaandi mu indila’?” (Mat. 6:8) Oshinima shimwe, mokugalikana wu pewe ombepo ondjapuki, owa zimina kutya owi inekela muJehova. Pashiholelwa, ngele gumwe okwe ya kungoye wu mu kwathele, oto ka ninga ashihe shoka to vulu opo wu mu kwathele, molwaashoka okwe ku pula wu mu kwathele shoka tashi ulike kutya okwe ku inekela. (Yelekanitha Omayeletumbulo 3:27.) Sha faathana, Jehova oha kala a nyanyukwa ngele to mu pula ombepo ye, note ke yi ku pa.—Omayel. 15:8.
9. Ongiini okukala pokugongala kwopaKriste taku ku kwathele opo wu nwethwe mo kombepo yaKalunga?
9 Osha yela kutya omukalo gulwe ngoka to vulu okunwethwa mo kombepo yaKalunga ogwa kwatela mo okugongala kwetu niigongi yetu. Osha simanenena okuninga oonkambadhala okukala po nokugandja eitulomo kopolohalama. Okuninga ngawo otaku ke ku kwathela wu uve ko ‘iinima yomuule yomadhiladhilo gaKalunga.’ (1 Kor. 2:10) Okukala ho gandja omatyekosha pandjigilile ohaku eta wo uuwanawa. Dhiladhila kombinga yokugongala hoka wa li wa yi iiwike ine yahugunina. Mbela olungapi wa li wa yelutha oshikaha shoye nokugandja eyamukulo, opo wu ulike eitaalo lyoye? Mbela owu wete mpoka wu na okuninga elunduluko moshinima shika? Ngele osho, tokola kutya oto ka ninga po shike miiwike tayi landula. Jehova ota ka mona kutya owu na ehalo lyokukutha ombinga note ke ku pa ombepo ondjapuki ye ndjoka tayi ke ku kwathela wu mone mo oshindji mokugongala.
10. Okweenda mombepo okwa kwatela mo okugandja ehiyo lini kuyalwe?
10 Okweenda mombepo okwa kwatela mo okuyamukula kehiyo ndyoka tatu lesha mEhololo 22:17 taku ti: “Ombepo nomuyalekwa otaa ti: ‘Ila!’ Kehe ngoka tu uvu ko, na tye ‘Ila!’ Kehe ngoka a sa enota, ne ye; naangoka a hala, na taambe omeya gomwenyo omagano.” Ombepo ndjoka tayi longo okupitila mongundu yomuyalekwa, otayi gandja ehiyo ndika li na ko nasha nomeya gomwenyo. Ngele owa taamba ko eithano ndika tali ti “ila!”, mbela owa tokola wu tye “Ila!”? Kashi li tuu uuthembahenda okukutha ombinga miilonga mbika yokuhupitha oomwenyo!
11, 12. Ongiini ombepo ondjapuki ya kwatelwa mo miilonga yokuuvitha?
11 Iilonga mbika ya simanenena otayi gwanithwa ngashingeyi mewiliko lyombepo ondjapuki. Otwa lesha nkene ombepo ondjapuki ya li ya kwatelwa mo methelemumvo lyotango moku shi ninga tashi wapa kaatumwa ya ye kiitopolwa iipe. Omuyapostoli Paulus nooyakwawo oya li ya ‘keelelwa kombepo ondjapuki kaayu uvithile oohapu dhaKalunga moshitopolwa shaAsia’ nokaya li wo ya pitikilwa okuya muBitinia. Katu shi shi naanaa kutya ongiini ombepo ya li ye ya keelele okuya momahala ngoka, ihe osha yela kutya ombepo oyo ya li ya wilike Paulus momahenene omanene gaEuropa. Okwa li a mono emoniko lyomulumentu Omumakedonia te mu indile ekwatho.—Iil. 16:6-10.
12 Sha faathana, kunena ombepo yaJehova otayi wilike iilonga yokuuvitha muuyuni auhe. Jehova iha longitha we omamoniko gopashikumithalonga okugandja ewiliko, pehala lyaashono oha wilike aagwayekwa nombepo ondjapuki. Ombepo ondjapuki ohayi inyengitha aamwatate naamwameme ya ninge ashihe shoka taya vulu miilonga yokuuvitha noyokulonga aantu. Nopwaahe na omalimbililo, owa kala to kutha ombinga miilonga mbika ya simanenena. Mbela ito vulu okwiindjipaleka enyanyu lyoye miilonga mbika yinyanyudha?
13. Ongiini to vulu okuvulika kewiliko lyombepo ondjapuki? Shi thaneka.
13 Oto vulu okuvulika kewiliko lyombepo ondjapuki mokutula miilonga uuyelele mboka wa pewa oshigwana shaKalunga. Tala koshiholelwa shomugundjuka Mihoko gwokuJapani. E li omukokolindjila omupe, okwa li u uvite inaa gwana okuninga omaishunoko, nokwa li u uvite kutya ke shi okupopya momukalo ngoka tagu ka kala gwa hokiwa komunegumbo. Lwopethimbo mpoka, mUukalele wetu wUukwaniilwa omwa li mu na omaetopo taga ti sha nkene tu na okuninga omaishunoko paufupi. Opo ihe okabroshure A Satisfying Life—How to Attain It oka li ka nyanyangidhwa. Oka kala haka kwathele, unene tuu miilonga yomomapya moJapani. Mihoko okwa li a tula miilonga omaetopo ngoka ga gandjwa nkene okabroshure ke na okulongithwa, unene tuu nkene shi na ko nasha nokuninga omaishunoko paufupi. Mbalambala okwa li a tameke omakonakonombiimbeli pamwe naamboka ya li nale inaaya hala okukonakona. Okwa ti: “Onda li ndi na aakonakoni oyendji, ye thike po 12 pethimbo limwe, nomolwaaashoka onda li nda pula yamwe ya tegelele manga.” Dhoshili, ngele to ende mombepo nokutula miilonga ewiliko ndyoka lya pewa aapiya yaJehova, oto ka teya oshindji.
Inekela mombepo yaKalunga
14, 15. (a) Ongiini tashi vulika aantu inaaya gwanenena ya kale metsokumwe neiyapulo lyawo? (b) Ongiini to vulu okumona ookuume aawanawaelela?
14 Wu li omuuvithi a yapulwa, owu na uukalele mboka wu na okugwanitha po. (Rom. 10:14) Otashi vulika wu kale wu uvite inoo gwana okugwanitha po oshinakugwanithwa sha tya ngawo. Ihe ngaashi shi na ko nasha naagwayekwa, Kalunga oye he ku ningi wa gwana. (Lesha 2 Aakorinto 3:5.) Oto vulu okukala metsokumwe neiyapulo lyoye mokuninga ashihe shoka to vulu nokwiinekela mombepo yaKalunga.
15 Dhoshili, kashi shi oshipu kutse tu li aantu inaatu gwanenena tu kale metsokumwe neiyapulo lyetu kuKalunga ketu a gwanenena, Jehova. Uupyakadhi wumwe owo kutya yamwe mboka wa li ho endathana nayo nale otaya ka kala ya limbililwa konkalo yoye ompe yonkalamwenyo notaye ke ku ‘sheka.’ (1 Pet. 4:4) Nonando ongaaka, ku na okudhimbwa kutya owa mona ookuume aape, naamboka ya simanenena yomuyo oyo Jehova naJesus Kristus. (Lesha Jakob 2:21-23.) Osha simanenena wo okukala wu shi aamwatate naamwameme megongalo lyeni, shi li oshitopolwa ‘shuumwayinathana’ muuyuni auhe. (1 Pet. 2:17, NW; Omayel. 17:17) Okupitila mombepo ye, Jehova ote ke ku kwathela wu kale nookuume mboka taya ka tsikila oku ku nwetha mo nawa.
16. Omolwashike to vulu ‘okunyanyukilwa okukala muunkundi’ ngaashi Paulus?
16 Nonando owu kale nookuume megongalo mboka haye ku kwathele, natango otashi vulika to ke shi mona oshidhigu okuungaunga nomashongo gakehe esiku. Shoka wu na okuungaunga nasho, omathimbo gamwe otashi vulu oku ku ningitha wu kale wu uvite wa fa wa kana, wa fa wu li komututu omule gwomaupyakadhi. Ndyoka olyo unene tuu ethimbo kungoye okutaalela kuJehova noku mu indila ombepo ye ondjapuki. Omuyapostoli Paulus okwa nyola ta ti: “Uuna ndoka ndi na uunkundi, opo mpoka ndi na oonkondo.” (Lesha 2 Aakorinto 4:7-10; 12:10.) Paulus okwa li e shi shi kutya ombepo yaKalunga otayi vulu okukutha po uunkundi waantu, kashi na nduno mbudhi kutya owa tya ngiini. Onkee ano, ombepo yaKalunga tayi longo otayi vulu oku ku nkondopaleka ethimbo kehe wu uvite kuu na oonkondo nowa pumbwa ekwatho. Paulus okwa nyola kutya okwa li ta vulu ‘okunyanyukilwa okukala muunkundi.’ Sho a li kee na oonkondo, opo tuu mpoka okwa li wu uvite ombepo tayi longo muye. Nangoye oto vulu okukala wu uvite sha faathana.—Rom. 15:13.
17. Ongiini ombepo ondjapuki tayi vulu oku ku kwathela sho to ende wu uka kethikilo?
17 Otwa pumbwa ombepo yaKalunga opo tu vule okukala nonkalamwenyo ye mu iyapulila. Dhiladhila ando wu li kapitiya gwombautu hayi hingwa noothaila. Elalakano lyoye olyo okulongela Jehova sigo aluhe. Ombepo ondjapuki oya fa ombepo ndjoka wa hala oothaila dhi kwate opo wu thike kethikilo lyoye wu li nawa. Ino hala okukala to tengatengithwa kombepo yuuyuni waSatana. (1 Kor. 2:12) Oku shi popya pathaneko, owu na okutala kutya ombepo yi li mondjila yini to ka kwata. Owu na okukwata ombepo ondjapuki. Okupitila mOohapu dhaKalunga nosho wo mehangano lye ndyoka tali wilikwa kombepo, ombepo ondjapuki otayi ku ukitha mondjila ndjoka yu uka.
18. Ngashingeyi owa tokola toko okuninga shike, nomolwashike?
18 Ngele owa kala nokukonakona nOonzapo dhaJehova noho nyanyukilwa eendathano lyopambepo pamwe nadho, ihe ino katuka natango oonkatu dha simanenena dhokwiiyapulila Jehova nokuninginithwa, ipula to ti: ‘Omolwashike tandi kwatakwata?’ Ngele owa taamba ko onkandangala ndjoka tayi dhanwa kombepo ondjapuki mokutsakanitha ehalo lyaJehova kunena nokupandula iilonga yayo, onkee ano katuka oonkatu ndhoka wi ilonga kutya odho dhi li mondjila. Jehova ote ke ku laleka nuuyamba. Ote ke ku pa ombepo ondjapuki ye nehalo ewanawa. Ngele owa ninginithwa nale omimvo nenge omimvo omilongo dha piti, osha yela kutya owa li wa mona nkene ombepo ondjapuki ye ku nwetha mo. Owa mona nowu uva nkene Kalunga ta vulu oku ku nkondopaleka nombepo ye. Shika otashi vulu okutsikila okuningwa monakuyiwa, nokuli sigo aluhe. Onkee ano, kala wa tokola toko okukala to ende mombepo ondjapuki.
Oto dhimbulukwa?
• ‘Okweenda mombepo’ otashi ti shike?
• Oshike tashi vulu oku ku kwathela wu ‘kale nokweenda mombepo’?
• Ongiini to vulu okukala metsokumwe neiyapulo lyoye?
[Ethano pepandja 17]
Okulonga evi lyopathaneko lyokomutima gwoye otaku pula oonkambadhala
[Omathano pepandja 18, 19]
Mbela owa nwethwa mo kombepo yaKalunga?