Ontopolwa 16

Nkene To Vulu Okuhedha Popepi naKalunga

1. Omafaathano geni taga monika momalongelokalunga ogendji?

OMUPASHIYONI ngoka a talele po oshilongo shimwe shokUuzilo okwa li a kuminwa omikalondjigilile dhopalongelokalunga ndhoka a mono motempeli yUubuddha. Nonando iiyelekela kaya li yaMaria nenge yaKristus, odhindji dhomomikalondjigilile odha li dha fa ndhoka dhongeleka ye koshilongo shawo. Pashiholelwa, okwa mono elongitho lyoteelushu nokwiimba omagalikano. Omafaathanitho ga tya ngaaka oga ningwa wo kuyalwe. Kutya nduno okUuzilo nenge okUuninginino, omikalo moka aagalikani haya kambadhala okuhedha popepi naKalunga nenge niinima mbyoka haya galikana, odha faathana unene.

2. Egalikano olya hokololwa ngiini, nomolwashike aantu oyendji haya galikana?

² Oyendji ohaya kambadhala okuhedha popepi naKalunga unene tuu moku mu galikana. Egalikano olya hokololwa kutya olyo “oshilonga shokupopya kwomuntu naashoka oshiyapuki—Kalunga, ookalunga, oshilongo shopambepo, nenge noonkondo kaadhi shi dhopaunshitwe.” (The New Encyclopædia Britannica) Ihe uuna yamwe taya yi kuKalunga megalikano, ohaya dhiladhila owala uuwanawa mboka taya vulu okumona mo. Pashiholelwa, oshikando shimwe omulumentu gwontumba okwa pulile gumwe gwomOonzapo dhaJehova a ti: “Ngele to galikanene ndje, omaupyakadhi ngoka ndi na muukwanegumbo wandje, kiilonga nonuukolele wandje otaga ka kandulwa po mbela?” Osha yela kutya omulumentu osho a li a dhiladhila, ihe oyendji ohaya galikana nohaya mono kutya omaupyakadhi gawo opo haga kala. Ano otashi vulika tu pule: ‘Omolwashike nduno tu na okuhedha popepi naKalunga?’

MOLWASHIKE TU NA OKUHEDHA POPEPI NAKALUNGA

3. Omagalikano getu oge na okuukithwa kulye, nomolwashike?

³ Egalikano kali shi omukalondjigilile itaagu ti sha, kali shi owala omukalo ngoka tatu vulu okumona sha. Etompelo lya simana lyokuhedha kuKalunga olyo okukala tu na ekwatathano lyopothingo naye. Onkee ano omagalikano getu oge na okuukithwa kuJehova Kalunga. “Omuwa ha kala popepi naamboka haye mu ithana,” omupsalmi David osho a ti. (Epsalmi 145:18) Jehova ote tu hiya tu ninge ekwatathano lyombili naye. (Jesaja 1:18) Mboka tayi inyenge kehiyo ndika otaya tsu kumwe nomupsalmi ngoka a ti: “Ihe ngame ondi uvite uutoye wokukala popepi naKalunga.” Omolwashike? Omolwashoka mboka taya kala popepi naJehova Kalunga otaya ka nyanyukilwa elago lyashili nombili yopamadhiladhilo.—Epsalmi 73:28.

4, 5. (a) Omolwashike sha simana okugalikana Kalunga? (b) Ekwatathano naKalunga lya tya ngiini tatu vulu okutunga okupitila megalikano?

⁴ Omolwashike tu na okugalikana Kalunga e tu kwathe ngele ye ‘oku shi shono twe shi pumbwa, manga inaatu mu indila’? (Mateus 6:8; Epsalmi 139:4) Egalikano otali ulike kutya tse otu na eitaalo muKalunga notwe mu tala ko oye Onzo ‘yoshipewa kehe oshiwanawa nomagano ga gwanenena.’ (Jakob 1:17; Aaheberi 11:6) Jehova oha nyanyudhwa komagalikano getu. (Omayeletumbulo 15:8) Ye oha nyanyukwa okuuva oohapu dhetu dholupandu nodhomahambelelo tadhi ti sha, ngaashi naanaa he ha nyanyukilwa okuuva okanona ke okashona taka popi oohapu dholupandu tadhi zi komutima. (Epsalmi 119:108) Uuna he nokanona ye na ekwatathano ewanawa, ohaya kundathana nohole. Okanona hoka ke holike oke na ehalo lyokupopya nahe. Osha faathana shi na ko nasha nekwatathano lyetu naKalunga. Ngele otwa pandula shili shoka tatu ilongo kombinga yaJehova nohole ndjoka e tu ulikile, otatu ka kala tu na ehalo lya kola oku mu lombwela megalikano nkene tu uvite.—1 Johannes 4:16-18.

⁵ Uuna tatu hedha kuKalunga Omukombandambanda, otu na okukala tu na esimaneko, nonando inashi pumbiwa okukala tatu ipula sha pitilila shi na ko nasha noohapu dholelalela ndhoka tatu longitha. (Aaheberi 4:16) Otu na aluhe uupitilo okupopya naJehova. Nokashi shi tuu uuthembahenda okukala tatu vulu ‘okupukumunina oomwenyo dhetu’ Kalunga megalikano! (Epsalmi 62:9) Olupandu okupandula Jehova otali eta ekwatathano naye lyopahole, ngaashi ndyoka omulumentu omudhiginini Abraham a li a nyanyukilwa e li kuume kaKalunga. (Jakob 2:23) Ihe uuna tatu galikana Omuwa Omunamapangelo agehe gweshito alihe, otu na okuninga shoka ta pula kwaamboka taya hedha kuye.

IITEGELELWA YOKUHEDHA POPEPI NAKALUNGA

6, 7. Nonando Kalunga ita pula iimaliwa opo u uve omagalikano getu, ye ota pula shike kutse uuna tatu galikana?

⁶ Opo tu hedhe kuKalunga otwa pumbwa mbela iimaliwa? Aantu oyendji ohaya futu aawiliki yopambepo ye ya galikanene. Yamwe nokuli oyi itaala kutya omagalikano gawo otagu uvika shi ikwatelela kuuwindji womayambidhidho ngoka haya gandja. Ihe Oohapu dhaKalunga itadhi ti kutya otu na okugandja iimaliwa opo tu vule okuya kuJehova megalikano. Omasiloshimpwiyu ge gopambepo nomalaleko nuuyamba ge gekwatathano naye megalikano otayi vulu okumonika inapu futwa sha.—Jesaja 55:1, 2.

⁷ Oshike nduno tashi pulwa? Iikala yomomutima yu uka oyo oshitegelelwa shimwe. (2 Ondjalulahokololo 6:29, 30; Omayeletumbulo 15:11) Momitima dhetu omu na okukala mu na eitaalo tali longo muJehova Kalunga e li ‘Omuuvi gwomagalikano’ nokutya ‘ota pe ondjambi mboka taye mu kongo.’ (Epsalmi 65:3, KB; Aaheberi 11:6) Otu na wo okukala tu na omutima gwi ifupipika. (2 Aakwaniilwa 22:19; Epsalmi 51:19) Jesus Kristus mulimwe lyomomathaneko ge oku ulike kutya omufendelithi omwiifupipiki e na iikala yomutima gwi ishonopeka, okwa li omuyuuki e vule Omufarisayi e na uuntsa sho ya hedha kuKalunga. (Lukas 18:10-14) Ngele tatu yi kuKalunga megalikano, natu dhimbulukwe kutya “onakuhola uuntsa iihuna koshipala shOmuwa.”—Omayeletumbulo 16:5.

8. Ngele otwa hala Kalunga a yamukule omagalikano getu, otu na okwiitheta shike?

⁸ Ngele otwa hala Kalunga a yamukule omagalikano getu, otu na okukala twi itheta eihumbato lyuulunde. Sho omulongwa Jakob a ladhipike yalwe ya hedhe popepi naKalunga, okwa gwedha ko: “Itheteni iikaha yeni, one aalunde, yelitheni oomwenyo dheni, one yomitima mbali.” (Jakob 4:8) Nokuli aayoni nayo otaya vulu okuninga ekwatathano lyombili naJehova uuna tayi iyele ombedhi notaye etha onkalamwenyo yawo yonale. (Omayeletumbulo 28:13) Itatu vulu okuholoka koshipala shaJehova ngele otatu iningitha owala kutya otwa yogola onkalamwenyo yetu. “Omeho gOmuwa oga taalela aayuuki nomakutsi ge oge endekela komagalikano gawo, ihe oshipala shOmuwa sha tsu ondumbo naamboka haa longo uuwinayi,” Oohapu dhaKalunga osho tadhi ti.—1 Petrus 3:12.

9. Okupitila mulye tu na okuhedha kuJehova, nomolwashike?

⁹ Ombimbeli otayi ti: “Kombanda yevi kaku na omuntu omuyuuki, ha gwanitha uuwanawa auke, ye . . . ita yono andola.” (Omuuvithi 7:20) Ano otashi vulika to pula: ‘Ongiini nduno tatu vulu okuhedha kuJehova Kalunga?’ Ombimbeli otayi yamukula: “Ngele ku na ngoka a yono, nena otu na Omupopili, Jesus Kristus, omuyuuki.” (1 Johannes 2:1) Nonando tse aalunde, otatu vulu okuhedha kuKalunga tatu popi twa manguluka okupitila muJesus Kristus, ngoka a si e li ekuliloyambo omolwetu. (Mateus 20:28) Oye awike uupitilo mungoka tatu vulu okuhedha kuJehova Kalunga. (Johannes 14:6) Katu na okutaamba ko ongushu yekuliloyambo lyaJesus ngeya nokulonga uulunde owina. (Aaheberi 10:26) Ihe ngele omathimbo gamwe tatu yono nonando otatu longo ashihe shoka tatu vulu opo twaa longe shoka oshiwinayi, otatu vulu okwiiyela ombedhi nokupula edhiminopo kuKalunga. Uuna tatu hedha kuye nomutima gwi ifupipika, ote tu uvu.—Lukas 11:4.

OOMPITO DHOKUPOPYA NAKALUNGA

10. Shi na ko nasha negalikano, ongiini tatu vulu okuholela Jesus, nopoompito dhimwe dhini tatu vulu okugalikana paumwene?

¹⁰ Jesus Kristus okwa li a tala ko ekwatathano lye naJehova li na ongushu noonkondo. Onkee ano, Jesus okwa li a tula po ethimbo okupopya naKalunga megalikano lyopaumwene. (Markus 1:35; Lukas 22:40-46) Otatu ningi nawa ngele tatu holele oshiholelwa shaJesus notatu galikana Kalunga kehe ethimbo. (Aaroma 12:12) Oshe eleka okutameka esiku noohapu dhegalikano, nomanga inaatu ka lala, otatu vulu okupandula shili Jehova omolwomaipyakidhilo gesiku. Ethimbo lyomutenya, shi ninga wo elalakano lyoye okuhedha kuKalunga “pompito kehe.” (Aaefeso 6:18, NW) Otatu vulu nokuli okugalikana twa mwena momutima, tu shi kutya Jehova ota vulu oku tu uva. Okupopya naKalunga paumwene otaku tu kwatha tu koleke ekwatathano lyetu naye, nokugalikana esiku kehe kuJehova otashi tu kwatha tu hedhe popepi naye shi vulithe nale.

11. (a) Omolwashike omaukwanegumbo ge na okugalikana pamwe? (b) Otashi ti shike uuna to ti “amen” kehulilo lyegalikano?

¹¹ Jehova oha pulakene wo komagalikano ngoka taga ningwa molwoongundu dhaantu. (1 Aakwaniilwa 8:22-53) Otatu vulu okuhedha popepi naKalunga tu li uukwanegumbo, nomutse gwegumbo otagu vulu oku wu kwatela komeho megalikano. Shika otashi koleke epaya lyuukwanegumbo, Jehova e ta ningi gwoshili kaagundjuka ngele tayu uvu aavali yawo taya galikana Kalunga neifupipiko. Oshi li ngiini mbela ngele omuntu gumwe ta kalele po ongundu megalikano, tashi vulika pokugongala kwOonzapo dhaJehova? Ngele otu li maapulakeni, natu pulakene neitulomo opo kehulilo lyegalikano tu vule okutya nomutima aguhe “amen,” shoka tashi ti: “Nashi kale ngawo.”—1 Aakorinto 14:16.

OMAGALIKANO NGOKA JEHOVA HU UVU

12. (a) Omolwashike Kalunga ihaa yamukula omagalikano gamwe? (b) Omolwashike kaatu na owala okugalikana shi na ko nasha noompumbwe dhopaumwene?

¹² Yamwe otashi vulika taya dhiladhila kutya Kalunga iha yamukula omagalikano gawo nokuli nando onaye mu galikane okupitila muKristus. Ihe omuyapostoli Johannes okwa ti: ‘Nge tatu indile sha opahalo [lyaKalunga], ote tu uvu.’ (1 Johannes 5:14) Ano otu na okupula sha pahalo lyaKalunga. Molwashoka ye oku na ko nasha nonkalonawa yetu yopambepo, shaashono tashi gumu uupambepo wetu oshi li she eleka okugalikana. Otu na okukondjitha emakelo okugalikana owala shi na ko nasha noompumbwe dhopanyama. Pashiholelwa, nonando oshi li shu uka okugalikana omolwomayele noonkondo okwiidhidhimikila omukithi, omaipulo shi na ko nasha nuukolele kage na okushiga iinima yopambepo. (Epsalmi 41:1-3) Sho omukiintu gumwe Omukriste a tseya kutya ye okwa li ti ipula sha pitilila kombinga yuukolele we, okwa pula Jehova e mu kwathe a kale netaloko lyu uka li na ko nasha nomukithi gwe. Oshilanduliko, omaupyakadhi ge guukolele oga ningi oshinima inaashi simana we unene, nokwa li e uvite kutya ye okwa pewa “oonkondo dhi vule dhopaunshitwe.” (2 Aakorinto 4:7, NW) Ehalo lye okukwathela yalwe pambepo olyi indjipala, nokwa ningi omuuvithi gwethimbo lyu udha gwUukwaniilwa.

13. Ngaashi shu ulikwa muMateus 6:9-13, iinima yini yo opala okukwatelwa momagalikano getu?

¹³ Oshike mbela tatu vulu okukwatela momagalikano getu opo Jehova a hokwe oku gu uva? Jesus Kristus okwa longo aalongwa ye nkene ye na okugalikana. Moshiholelwa shegalikano ndyoka lya nyolwa muMateus 6:9-13, ye okwa gandja oshiholelwa shiinima mbyoka shi li nawa okugalikana kombinga yayo. Oshike mbela shi na okukala sha simanenena momagalikano getu? Edhina lyaJehova Kalunga nUukwaniilwa we oyi na okukala oyo iinima yotangotango. Oshu uka okupula shi na ko nasha noompumbwe dhetu dhopanyama. Osha simana wo okupula edhiminopo lyoondjo dhetu nokuhupithwa momamakelo nokomwiinayi, Satana Ondiaboli. Jesus ka li a hala tu imbe egalikano ndika nenge tu li endulule moku li popyagula noku li hokolola itaatu dhiladhila kutya otali ti shike. (Mateus 6:7) Ekwatathano lya tya ngiini andola tali kala po ngele okanona ethimbo kehe taka popi nahe taka longitha iitya ya faathana?

14. Kakele komaindilo, omagalikano geni tu na okuninga?

¹⁴ Kakele komaindilo nomagalikano taga zi komutima, otu na okuninga omagalikano gomapandulo nomahambelelo. (Epsalmi 34:2; 92:2; 1 Aatessalonika 5:18) Otatu vulu wo okugalikanena yalwe. Omagalikano ge na ko nasha naamwatate naamwameme yetu yopambepo mboka taya mono iihuna nenge taya hepekwa otagu ulike kutya otu na ko nasha nayo, notashi nyanyudha Jehova okuuva tatu popi kutya otu na ko nasha nayo. (Lukas 22:32; Johannes 17:20; 1 Aatessalonika 5:25) Dhoshili, omuyapostoli Paulus okwa nyola: “Kaleni mwaa na nando oshimpwiyu shasha, aawe, uuthigona weni u tseyithileni Kalunga momagalikano nomomaindilo pamwe nomahambelelo, nombili yaKalunga yi vule uunongo auhe, otayi gamene oomwenyo dheni nomadhiladhilo geni muKristus Jesus.”—Aafilippi 4:6, 7.

DHIGININENI MEGALIKANO

15. Otu na okudhimbulukwa shike ngele omagalikano getu oga fa itaaga yamukulwa?

¹⁵ Nonando ngoye oto mono ontseyo kombinga yaKalunga, otashi vulika wu uvite kutya omathimbo gamwe omagalikano goye ihaga yamukulwa. Shika otashi vulika shi kale ngawo molwashoka otashi vulika halyo ethimbo lyaKalunga okuyamukula egalikano lyontumba. (Omuuvithi 3:1-9) Jehova otashi vulika e etha onkalo yi tsikile uule wokathimbo, ihe ye omagalikano ohe ga yamukula noku shi ethimbo ndyoka ewanawa oku shi ninga.—2 Aakorinto 12:7-9.

16. Omolwashike tu na okudhiginina megalikano, nongiini tashi vulu okuguma ekwatathano lyetu naKalunga ngele tatu shi ningi?

¹⁶ Okudhiginina kwetu megalikano otaku holola ohokwe yetu yokomutima mwaashoka tatu lombwele Kalunga. (Lukas 18:1-8) Pashiholelwa, otashi vulika tatu pula Jehova e tu kwathe tu sinde uunkundi wontumba. Mokudhiginina megalikano nokukatuka tatu tsu kumwe nomaindilo getu, otatu ulike uuyuuki wetu. Otu na okutumbula kondandalunde shoka tatu galikanene nokupopya oshili momaindilo getu. Osha simana unene tuu okugalikana twa mana mo uuna tatu makelwa. (Mateus 6:13) Uuna tatu tsikile okugalikana manga tatu kambadhala okupangela omagamo getu guulunde, otatu ka mona nkene Jehova te tu kwatha. Shika otashi ka tunga eitaalo lyetu notashi ka koleka ekwatathano lyetu naye.—1 Aakorinto 10:13; Aafilippi 4:13, NW.

17. Otatu kwathelwa ngiini kokukala niikala yokugalikana mokulongela Kalunga kwetu?

¹⁷ Ngele tatu kokeke iikala yokugalikana mokulongela kwetu Jehova Kalunga iilonga iiyapuki, otatu ka tseya kutya tse itatu mu longele koonkondo dhetu yene. Ngoka ha ningitha iinima oJehova. (1 Aakorinto 4:7) Ngele shika tatu shi zimine otashi ke tu kwatha okukala twi ifupipika notashi ka koleka ekwatathano lyetu naye. (1 Petrus 5:5, 6) Eeno, tse otu na omatompelo omawanawa okudhiginina megalikano. Omagalikano getu ga mana mo nontseyo yetu yi na ondilo yankene tatu hedha popepi naTate yetu omunahole gwomegulu otayi ka ninga onkalamwenyo yetu yi kale yi na shili elago.

OKUPOPYA NAJEHOVA HAKOMBINGA OWALA YIMWE

18. Ongiini tatu vulu okupulakena kuKalunga?

¹⁸ Ngele otwa hala Kalunga u uve omagalikano getu, otu na okupulakena shoka te tu lombwele. (Sakaria 7:13) Ye iha tumu we omatumwalaka ge okupitila maaprofeti ya nwethwa mo kuKalunga, noshoshili kutya ye iha longitha nando omikalo dhuumpulile. (Deuteronomium 18:10-12) Ihe tse otatu vulu okupulakena kuKalunga mokukonakona Oohapu dhe, Ombimbeli. (Aaroma 15:4; 2 Timoteus 3:16, 17) Ngaashi naanaa tashi vulika twa pumbwa okukala tu hole iikulya yopanyama mbyoka iiwanawa kutse, otatu ladhipikwa tu ‘hale shili omahini ngaka gomoohapu inamu ya mo sha.’ Kala u hole iikulya yopambepo mokulesha Oohapu dhaKalunga esiku kehe.—1 Petrus 2:2, 3; Iilonga 17:11.

19. Oshi na uuwanawa washike okutedhatedha shoka tatu lesha mOmbimbeli?

¹⁹ Tedhatedha shoka to lesha mOmbimbeli. (Epsalmi 1:1-3; 77:12, 13) Shika otashi ti okudhiladhila muule shi na ko nasha naashoka wa lesha. Shika oto vulu oku shi yelekanitha nokumyanga iikulya. Oto vulu okumyanga iikulya yopambepo mokukwatakanitha kumwe shoka to lesha niinima mbyoka u shi nale. Dhiladhila nkene uuyelele mboka tau gumu onkalamwenyo yoye, nenge u dhiladhile shoka tau holola kombinga yomaukwatya gaJehova niilonga ye. Ano okupitila mekonakono lyopaumwene, ngoye oto vulu okulya iikulya yopambepo mbyoka Jehova ta gandja. Shika otashi ke ku hedhitha popepi naKalunga note ke ku kwatha u sinde omaupyakadhi gesiku kehe.

20. Okukala pokugongala kwopaKriste otashi tu kwatha ngiini tu hedhe popepi naKalunga?

²⁰ Ngoye oto vulu wo okuhedha popepi naKalunga mokupulakena Oohapu dhe uuna tadhi kundathanwa pokugongala kwopaKriste, ngaashi naanaa Aaisrael ya li ya pulakene neitulomo sho ya li ya gongala okupulakena elesho lyOmpango yaKalunga lyomontaneho. Aalongi yopethimbo ndyoka oya li ya lesha Ompango noye yi fatulula nokungeyi oya kwathele aapulakeni yawo yu uve ko noyi inyengithwe okulongitha shoka yu uva. Shika oshe eta enyanyu enene. (Nehemia 8:8, 12) Ano shi ninga omukalondjigilile gwoye okukala pokugongala kwOonzapo dhaJehova. (Aaheberi 10:24, 25, OB-1986) Shika otashi ke ku kwatha u uve ko ontseyo okutseya Kalunga noku yi longitha monkalamwenyo yoye notashi ke ku etela elago. Okukala oshitopolwa shuumwayinathana wopaKriste wuuyuni auhe otashi ke ku kwathela u kale popepi naJehova. Nongaashi tatu ke shi mona, ngoye oto vulu okumona egameno lyashili mokati koshigwana shaKalunga.

KONAKONA ONTSEYO YOYE

Omolwashike u na okuhedha popepi naJehova?

Iitegelelwa yimwe oyini yokuhedha popepi naKalunga?

Oshike to vulu okukwatela momagalikano goye?

Omolwashike u na okudhiginina megalikano?

Oto vulu ngiini okupulakena kuJehova nena?

[Full-page picture on page 157]