Ontopolwa 6

Omulongi Omunene okwa li ha yakula yalwe

MBELA oho kala wa nyanyukwa uuna yalwe ye ku ningila sha oshiwanawa?— Yalwe nayo ohaya kala ya nyanyukwa uuna gulwe e ya ningile sha oshiwanawa. Eeno, atuheni osho hatu kala ngaaka. Omulongi Omunene okwa li e shi shi nokwa li aluhe ha yakula yalwe. Okwa ti: ‘Inandi ya okuyakulwa, ihe okuyakula.’—Mateus 20:28.

Onkee ano, ngele otwa hala okukala twa fa Omulongi Omunene, otu na okuninga shike mbela?— Otu na okukala hatu yakula yalwe. Otu na okukala hatu ya ningile uuwanawa. Odhoshili kutya aantu oyendji ihaye shi ningi. Dhoshili, aantu oyendji ohaya kala aluhe ya hala yalwe ye ya yakule. Pompito yimwe nokuli naalongwa yaJesus osho ya li yu uvite ngaaka. Kehe gumwe gwomuyo okwa li a hala okukala oye omunene nenge a simana e vule ooyakwawo.

Esiku limwe Jesus okwa li te ende pamwe naalongwa ye mboka ya li aalanduli ye. Sho ye ya moshilando shaKapernaum, popepi nefuta lyaGalilea, oya yi megumbo lyontumba. Moka Jesus okwe ya pula a ti: “Mondjila omwa li tamu kundathana shike?” Oya li owala ya mwena molwaashoka mondjila oya li taya tsu oompata kutya olye omunene e vule ooyakwawo ayehe.—Markus 9:33,34.

Jesus okwa li e shi shi kutya kashi li mondjila aalongwa ye ya kale taya dhiladhila kutya gumwe gwomuyo omunene e vule ooyakwawo. Onkee ano, ngaashi twi ilongo montopolwa yotango yembo ndika, okwa li a thikameke okanona okashona mokati kawo e te ya lombwele kutya oye na okukala yi ifupipika ngaashi okanona hoka okashona. Ihe natango kaya li yi ilonga mo sha. Konima yethimbo efupi manga Jesus inaa sa, okwa li e ya longo oshiilongomwa shoka ya li itaaya ka dhimbwa nando. Okwa li a ningi po shike?—

Manga ya li taya li pamwe uulalelo, Jesus okwa thikama e ta kutha oshihanduke e te shi idhingile mombunda. Okwa kutha oshiyaha shokwiiyogela e ta tula mo omeya. Otashi vulika aalongwa ye ya li tayi ipula kutya okwa li a hala okuninga po shike. Manga ya li taye mu tala, Jesus okwa tsu oongolo e ta tameke okuyoga oompadhi dhawo. Opo nduno okwa kukutike oompadhi dhawo noshihanduke. Dhiladhila owala kwaashoka! Natu tye nduno opo wa li, ando owa kala wu uvite ngiini?—

Aalanduli ye oya li yu uvite kutya kashi li mondjila Omulongi Omunene e ya yakule momukalo nguka. Oya li ya sa ohoni. Dhoshili, Petrus ka li a pitika Jesus a longe oshilonga shika shidhinitha. Ihe Jesus okwa ti kutya osha li sha simana kuye oku shi ninga.

Kunena ihatu yogo oompadhi dhayalwe. Ihe shika osha li hashi ningwa sho Jesus a li kombanda yevi. Mbela owu shi shi kutya omolwashike?—Moshilongo moka mwa li mwa kala Jesus naalanduli ye, aantu oya li haya zala oongaku dhoosandala. Uuna ye ende moondjila dhi na efululu, oompadhi dhawo odha li hadhi kala dhu udha ontsi. Osho molwaashono sha li hashi kala oshilonga shohenda okuyoga ko ontsi koompadhi dhomuntu ngoka e ya megumbo okutalelapo.

Ihe pompito mpaka kapwa li nando ogumwe gwomaalongwa ye a li a yogo oompadhi dhayakwawo. Onkee ano, Jesus okwa li e shi ningi ye mwene. Mokuninga ngeyi, Jesus okwa longo aalanduli ye oshiilongomwa sha simana. Oya li ya pumbwa okwiilonga oshiilongomwa shika. Shika osho oshiilongomwa shoka natse twa pumbwa okwiilonga kunena.

Mbela owu shi kutya oshiilongomwa shika oshini?— Konima sho Jesus a shuna pehala lye, okwe ya pula a ti: “Omu uvite ko tuu shoka nde shi mu ningile? Ohamu ithana ndje Muhongi nOmuwa noshu uka, sho hamu ningi ngaaka. Ongame Omuwa nomuhongi gweni sho nda yogo ngashingeyi oompadhi dheni nane wo omu na okuyogathana koompadhi.”—Johannes 13:2-14.

Mpaka Omulongi Omunene okwa li u ulike kutya okwa li a hala aalanduli ye ya kale haya yakulathana. Ka li a hala ya kale owala yi i hole yo yene. Ka li a hala ya dhiladhile kutya oya simana unene ye vule ooyakwawo noye na okukala aluhe taya yakulwa kuyalwe. Okwa li a hala ya kale ye na ehalo lyokuyakula yalwe.

Mbela shoka kasha li oshiilongomwa oshiwanawa? Mbela ino hala okukala wa fa Omulongi Omunene nokukala ho yakula yalwe?— Atuheni otatu vulu okuyakula yalwe. Shika otashi ka nyanyudha yalwe. Komeho gaayihe, otashi ka nyanyudha Jesus naHe.

Kashi shi oshidhigu okuyakula yalwe. Ngele owa kala ho tala nawa, oto ka mona kutya opu na iinima oyindji mbyoka to vulu okuningila yalwe. Ngashingeyi dhiladhila kwaashika: Mbela opu na sha shoka to vulu okuninga wu kwathele meme gwoye? Owu shi shi kutya ohe ku ningile iinima oyindji nosho wo iilyo ayihe yuukwanegumbo. Mbela ito vulu oku mu kwathela?— Omolwashike itoo mu pula?

Oto vulu okutula uuyaha poshitafula manga uukwanegumbo inaawu ya okulya. Nenge oto vulu okukutha po uuyaha poshitafula konima ngele uukwanegumbo wa mana okulya. Aanona yamwe ohaya ka teka omeya kehe esiku. Kehe shoka to ningi, oto yakula yalwe, ngaashi naana Jesus a li a ningi.

Mbela owu na aamwanyoko aashona kungoye mboka to vulu okuyakula? Dhimbulukwa kutya, Jesus, Omulongi Omunene, okwa li nokuli a yakula aalanduli ye. Ngele to yakula aamwanyoko mboka aashona kungoye, nena oto holele Jesus. Oshike to vulu oku ya ningila?— Oto vulu oku ya kwathela yi ilonge okukala haya pungula iidhanitho yawo ngele ya mana okudhana. Oto vulu oku ya kwathela oku ya zaleka. Nenge nokuli wu ya kwathele okuyala oombete dhawo. Mbela oto vulu ishewe oku ya kwathela mokuninga shike?— Otaya ka kala ye ku hole uuna to ya ningile iinima mbika, ngaashi naanaa aalunduli yaJesus ya li ye mu hole.

Oto vulu wo okuyakula yalwe kosikola. Tashi vulika aanasikola ooyakweni nenge omulongi gwoye. Ngele gumwe a gwithile omambo ge pevi, otashi ka kala shi li nawa wu mu kwathele oku ga toola po. Otashi vulika wu opalekele omulongi gwoye oshipelende nenge wu mu ningile sha shilwe shi ili. Okweegululila gumwe omweelo nako oku li oshilonga oshiwanawa.

Omathimbo gamwe otashi vulika aantu ya kale inaaye tu pandulila shoka twe ya ningila. Mbela oto dhiladhila kutya shika oshi na oku tu ningitha tu ethe po okulonga uuwanawa?— Aawe. Aantu oyendji kaya li ya pandula Jesus omolwiilonga ye iiwanawa. Ihe shoka kasha li she mu imbi a longe uuwanawa.

Onkee ano, inatu etha nando okuyakula yalwe. Natu dhimbulukwe Omulongi Omunene, Jesus nokukambadhala aluhe okulandula oshiholelwa she.

Omanyolo ga gwedhwa po kombinga yokukwathela yalwe ogo Omayeletumbulo 3:27, 28; Aaroma 15:1,2 nosho wo Aagalati 6:2.

[Ethano pepandja 37]

Aalongwa yaJesus oya li taya tsu oompata kombinga yashike?

[Ethano pepandja 39]

Oshiilongomwa shini Jesus a li ta longo aalanduliye?

[Omathano pepandja 40]

Oshike to vulu okuninga po opo wu kwathele yalwe?